Mandamuna ku nkonko yenu

▪ Mbiakanyine bua muena nkristo kuvualaye katambala katoke dîba dia mvita anyi?

Mu mvita ivuaku mu matuku mashale aa mu ditunga dietu, bena ditunga bavule bakena basalayi bavua bavuale tutambala tutoke ku diboko anyi ku mutu. Bua tshinyi? Mu imue miaba, aba bavua bavuale tutambala etu bavua bamanyisha dikuatshisha diabu kudi tshiluilu tshivua tshimueneke tshitshimunyi kudibu. Imue misangu divuala dia katambala katoke divua dileja tshimanyinu tshia dilekela kuluangana. Kadi mu mikuabu miaba, bavua bangata divuala dia katambala katoke bu ngenzelu wa dikeba bukubi. Bantu bavua bakavuala bua kupeta bukubi.

Muena nkristo udi ne bua kuikala ne mmuenenu kayi? Bikala divuala dia katambala katoke diumvuija dikuatshisha tshiluilu kampanda anyi kansanga, eu udi ukavuala kêna ne ndubidilu nansha. Bikala dikavuala dikale tshimanyinu tshia dilekela kuluangana, ebi bidi biumvuija ne: eu udi ukavuala udi udileja muvuaye muluanganyi wa mvita. Mu nsombelu ya nunku, muena nkristo udi ne bua kuvuluka mêyi a Yezu adi mu Yone 17:16 (NW) adi aleja ne: bayidi bende ‘kabakuikala ba mu bulongolodi ebu.’ Udi kabidi ne bua kuvuluka diumvuija dia mu mulayi dia batendeledi balelela ba Yehowa bilondeshile Yeshaya 2:2-4. Mvese eyi idi ituambuluisha bua kuikala ne lungenyi lua Nzambi pa nkonko itu ijuka mu tshikondo tshia mvita.

Kadi netuambe tshinyi bua miaba idi divuala dia tutambala tutoke diumvuija anu ngenzelu wa dikeba bukubi, udi muntu mua kuikala mulonde bua kuepuka diashibua tshingoma? Mu nsombelu eu, muena nkristo yonso ke uvua ne bua kudiangatshila dipangadika dia kuvuala anyi kubenga kuvuala katambala katoke. Bikalaye muenze nunku muaba udi divuala dia katambala aka diangata bu ngenzelu wa dikeba bukubi, muntu nansha umue kamudiwudi to.a Bakulu kabena ne bua kukeba mua kumanya né udi ne ndubidilu anyi kêna nende. Kadi, bidi bikengela kulonda dîyi-diludiki didi mu Lomo 14:4: ‘Wewe udi nganyi udi ulumbuluisha muena mudimu wa mu nzubu wa mukuabu? Yeye udi wimana anyi udi upona bua mukalenge wende mene.’ Tudi mua kuela meji kayi padi bantu bonso kabayi bajadike bimpe diumvuija dia katambala katoke? Apa muntu ne muntu neadiangatshile dipangadika kumpala kua Yehowa Nzambi, bikalaye mua kuvuala katambala katoke anyi kubenga kukavuala.​—Gal. 6:5.

Mmushindu kayi utudi mua kulongolola bisangilu dîba dia mvita padiku mua kumueneka njiwu bua muoyo wa bana betu? Kudi mêyi-malombodi matambe buimpe pa bualu ebu mu mukanda wa Badilongolole bua kuenza mudimu wetu bimpe, dibeji 168, bikoso 2-4. Mêyi-malombodi aa ng’a kubala ne ntema yonso.

Anu bu mutudi bamanye bonso, mvita itu mpokolo wa disumpakana dinene ne itu itekela bena nkristo bilumbu bikole kumpala. Misangu mivule bitu bikengela kushala ‘batabale, bikale ne meji mapole.’ (1 Tes. 5:6) Bakulu badi nangananga ne bua kulama ntema bua kukuba bipatshila bia mu nyuma bia bana betu ne kubaludika bimpe mu ditumika ne mêyi-maludiki a mu Bible ne nkatshinkatshi.​—Yeshaya 32:2.

[Mêyi adi kuinshi]