Tuikale ne disanka bua kufila bumanyishi mu buondoke
1 Yonso wa kutudi utu munange kuenza bintu bidiye mumanye kuenza bimpe. Bilondeshile Mâko 7:37, misumba ya bantu ivua yamba bua Yezu ne: “wakenza malu onso bimpe.” Nunku, kabiena bikemesha bua muvua Yezu ne disanka bua kuenza disua dia Yehowa! (Tangila Musambu 40:8.) Mu diela meji bimpe pa ngenyi mifila idi ilonda eyi, netupete tuetu petu disanka dia kutumikila dîyi-dituma dia Yezu, mmumue ne: kuyisha bantu ne kubapesha bumanyishi mu buondoke. (Bien. 10:42) Mu Luishi netufile mukanda kayi wonso wa mabeji 192 mupatula kumpala kua 1985, bikalayi mu stoke wa tshisumbu, anyi mukanda wa Muoyo wa kashidi. Mmunyi mutudi mua kufila bumanyishi mu buondoke ku diambuluisha dia mikanda eyi?
2 Bu mudi bantu ba bungi baditatshisha bua makanda abu a mubidi, udi mua kuamba ne:
▪ “Nansha mudiku malubuluka manene mu malu a luondapu, masama atshidi amu akengesha bantu bikole. Ku diebe dimona, mmunyi mutudi mua kumvuija bualu ebu? [Teleja diandamuna.] Yezu Kristo wakamba ne: bipupu bia masama, nebikale tshimanyinu tshia matuku a ku nshikidilu. (Luka 21:11) Kadi Bible udi uleja kabidi tshikondo tshikala disama kadiyiku kabidi. [Bala Yeshaya 33:24.] Mona tubingila tua kutekemena mu dilongesha edi dia nshindamenu dia mu Bible tudi mukanda eu utupesha.” Tela imue ngenyi miakanyine ya mu mukanda uudi ufila, pashishe uuleje mukuyukidishi ne mushinga wawu.
3 Paudi uyisha mu mpukapuka pabuipi ne tshijengu tshia bungenda, udi mua kuela muntu muoyo ne kumuebeja ne:
▪ “Kuenaku mumone se: nsombelu udi utamba kukola mpindieu ne bidi bitamba kukola bua kufikila ku ndekelu kua ngondo bikale ne kantu ku bianza anyi? [Teleja diandamuna.] Udiku wela meji ne: netupeteku dituku dikuabu bukubi bulelela bua bintu bia ku mubidi anyi?” Teleja diandamuna. Pashishe utele mvese wa mu Bible muakanyine muangatshila mu mukanda uudi ufila. Tungunuka ne: “Mukanda eu udi uleja muajikija Nzambi ntatu idi ivuija nsombelu mukole nunku lelu’eu ku diambuluisha dia Bukalenge buende.” Fila mukanda. Pashishe udi mua kumuambila muudi muanyishe diyukidilangana edi, ne umuebeje ne: “Kudiku mushindu wa kutungunuka diyuki edi dituku dikuabu anyi?” Nunku, neakupeshe pamu’apa adrese wende.
4 Biwatumika ne mukanda wa “Muoyo wa kashidi,” newikale pamu’apa ne mushindu wa kuteta mbuelelu eu pa ditalala mu bulongolodi ebu:
▪ “Ku diebe dimona, bua tshinyi mbikole bua bulongolodi ebu kufikabu ku ditalala? [Teleja diandamuna, pashishe uleje tshimfuanyi mu mabeji 20-21.] Tshimfuanyi etshi tshidi tshileja bualu kampanda bua mu Bible bumvuija mu mukanda wa Buakabuluibua. [Bala Buakabuluibua 12:7-9, 12 mu tshikoso 17. Pashishe ubale mêyi adi umvuija tshimfuanyi.] Nenku Diabolo uvua muimansha pa buloba, ne tshimue tshia ku bipeta bia bualu ebu ndijimina dia ditalala mu bulongolodi ebu. Mukanda eu udi wandamuna ku nkonko mivule ya mushinga mukole. Nensanke bua kukushilawu biwanyisha bua kuubala.”—Bua kupeta mamanyisha pa maleja makuabu a mukanda wa Muoyo wa kashidi adi apatula bipeta, tangila dibeji dia ndekelu dia Mudimu wetu wa Bukalenge wa Luabanya 1995, wa Luabanya 1994 ne wa Tshiongo 1993.
5 Paudi walukila bua kutangila aba bavua baleje dijinga dia kumanya, udi mua kuteta bua kutuadija dilonga dia Bible pa kulonda mbuelelu eu:
▪ “Mu diyuki dietu dia musangu mushale, uvua muleje bualu budi bukoka ntema bikole. [Amba lungenyi kampanda luvuaye mufile.] Mvua muelelepu meji, ne ndi musue kukuleja tshindi mupete mu dienza amue makebulula. [Konkonona ne muntu mvese wa mu Bible muakanyine.] Tudi tulomba bantu bua kuitaba dilonga kadiyi difutshila mfranga, dikadi diambuluishe miliyo ya bantu bua kumanya bimpe malongesha a nshindamenu a mu Bible mu tshikondo tshîpi. Dikonkonona edi dia Bible didi mua kukupetesha dieyemena mu dikumbana dia malaya a Nzambi didi kadiyi mua kupangila.” Tela imue nkonko yapeta mandamuna mu dilonga. Bikala muntu mubenge dilomba diebe, mumvuije ne: tutu kabidi ne dilonga dia pa buadi didi dienzeka anu mu minute 15 ku lumingu mu mbingu 16. Leja broshire wa Utulomba, mubulule pa dilongesha 1 ne ebeja mukuyukidishi né udi mua kumumvuija, ku diambuluisha dia dilongesha edi, mushindu utu dilonga dienzeka.
6 Bituakumbaja mudimu wetu ne nzanzu, netupeteleku disanka. ‘Tuikale badimuke misangu yonso’ bua kufila bumanyishi mu buondoke, ne tuikale ne disanka bua kuenza bimpe bitupa bionso bia mudimu wetu.—1 Tim. 4:16.