Mandamuna ku nkonko yenu

▪ Bua tshinyi tudi ne bua kutabalela mvuadilu wetu ne ndengejilu wetu wa nsuki mu mushindu wa pa buawu patudi tukumbula nzubu ya Société ku Brooklyn, ku Patterson, ne ku Wallkill (mu New York), ne biro bia filiale ya pa buloba bujima?

Mbatekemene bua bena nkristo balame mmuenekelu muakane. Dîba dionso mvuadilu wetu ne ndengejilu wetu wa nsuki bidi ne bua kumuenesha budipope ne bunême bidi biakanyine basadidi ba Yehowa Nzambi. Ebi mbitambe kuikala bilelela mu dikumbula dia nzubu ya Société mu New York ne mu mikuabu filiale pa buloba bujima.

Mu 1998, mpungilu ya distrike ne ya bukua-matunga neyenzeke. Binunu bia bana betu ba mu matunga mavule nebakumbule tshilombuelu tshia Société ku New York kabidi ne filiale ya mu matunga makuabu. Patudi tukumbula nzubu eyi, mu bikondo bu ebi ne mu bikondo bikuabu bionso, tudi ne bua ‘kudimanyisha bu bena mudimu ba Nzambi mu malu onso,’ kabidi ne ku mvuadilu wetu ne ndengejilu wetu wa nsuki biakanyine.​—2 Kol. 6:3, 4.

Mu dileja mushinga wa mvuadilu ne ndengejilu wa nsuki muimpe, mukanda wa Badilongolole bua kuenza mudimu wetu bimpe udi umvuija mudi mankenda a mubidi, mvuadilu ne ndengejilu wa nsuki bia tshitembu bikale bikengedibua patudi tuya mu mudimu wa budimi ne patudi tubuela mu bisangilu bia bena nkristo. Nunku, mu dibeji 131, tshikoso 1, udi wamba ne: “Bidi bia momumue kabidi patudi tukumbula Betele, ku Brooklyn nansha mu ditunga kayi dionso mudi filiale wa Bulongolodi usanganyibua. Kupu muoyo ne: Betele mmomumue ne: ‘Nzubu wa Nzambi.’ Ke bualu kayi tudi ne bua kukosesha nsuki yetu bimpe, kuikala ne mvuadilu ne ngikadilu wa tshitembu, ne kuikala ne ngikadilu eu patudi tuya mu bisangilu bietu mu Nzubu wa Bukalenge.” Bamanyishi ba Bukalenge ba muaba udi Betele ne aba badi bafuma miaba ya kule badi balua bua kumona bena mu dîku dia Betele ne kudisangisha pamue nabu ne kukumbula nzubu ya filiale, badi ne bua kunemeka dîyi-dikulu dimuedimue edi.

Mvuadilu wetu udi ne bua kuikala ne buenzeji buimpe pa bakuabu bua mushindu udibu bamona ntendelelu mulelela wa Yehowa. Kadi, mbimueneke ne: bamue bana betu balume ne bakaji, padibu bakumbula nzubu ya Société, batu ne mvuadilu mutambe kudilekelela. Mvuadilu wa mushindu eu kêna muakanyine padi muntu uya kukumbula nzubu kayi yonso wa Betele. Pa bualu ebu, anu bu mu malu makuabu a mu nsombelu wetu wa buena-nkristo, tudi tujinga kulama mêyi-makulu matumbuke amue-amue adi atapulula bantu ba Nzambi ku ba mu bulongolodi ebu mu dienza malu onso bua butumbi bua Nzambi. (Lomo 12:2; 1 Kol. 10:31) Bidi kabidi bimpe kuyukila ne balongi betu ba Bible ne bakuabu badi mua kulua kukumbula Betele bua musangu wa kumpala ne kubavuluija mushinga wa kuteya ntema ku mvuadilu ne ndengejilu wa nsuki bimpe.

Nenku paudi ukumbula nzubu ya Société, udiebeje ne: ‘Mvuadilu wanyi ne ndengejilu wanyi wa nsuki mbia budipope anyi?’ (Fuanyikija ne Mika 6:8.) ‘Bidiku ne lumu luimpe kudi Nzambi undi ntendelela anyi? Bakuabu mbafuane kutuma ntema kundi anyi kumvua bibi bua mmuenekelu wanyi anyi? Ndiku mfila tshilejilu tshilenga bua bakuabu badi mua kuikala balue kukumbula bua musangu wa kumpala anyi?’ ‘Tunemeshishe dilongesha dia [“Nzambi,” NW] Mupandishi wetu mu malu onso’ ku mvuadilu wetu ne ndengejilu wetu wa nsuki misangu yonso.​—Tite 2:10, MMM.