Sungula biena-bualu bua kujula dijinga dia pa buadi dia kumanya bia bungi

¹ Anu mudi bantu badi ne buta baludika ne ntema mikole mikete yabu, bamanyishi ne bampanda-njila bavule badi ne bipeta bitambe buimpe mu ditumika ne biena-bualu bisunguluke bia mu Tshibumba tshia Nsentedi ne Réveillez-vous! bua kujula kudi bantu dijinga dia pa buadi dia kumanya bivule mu teritware wabu. Badi bajadika bantu badi pamu’apa mua kunanga kubala bimue biena-bualu bia mu bibejibeji. Mmunyi mudibu benza nunku?

² Tshia kumpala badi babala nimero yonso mu bujima buende. Pashishe badi badikonka ne: Mmuntu kayi udi tshiena-bualu etshi mua kusankisha? Nunku badi benza madikolela bua kukumbula bantu badi pamu’apa mua kusankidila dibala dia tshiena-bualu etshi. Padibu bamona se: nimero kampanda nebamuangate bikole mu teritware wabu, badi benza dilomba bua kupeta mikuabu ya pa mutu.

³ Bibejibeji bietu mbinemeka bikole: Umue wa ku badi ne abonema udi wenza mudimu ku biro bia tshibejibeji tshia bukua-matunga tshitubu batamba kubala mu Nigeria wakamba bua bualu bua Réveillez-vous! ne: “Ka-lumbandi bua tshibejibeji tshitambe buimpe tshia buloba bujima tshidi ne malu a mishindu yonso adi asankisha.” Mubadi munene kampanda wa bibejibeji bietu wakamba ne: “Mmabue a mushinga kayipu a dikema ne a meji kaayi kutuila mushinga! Kakuena tshiena-bualu tshidi tshisankisha tshitubu kabayi bakonkonona mu tshimue tshia ku [bibejibeji] ebi.”

⁴ Bibejibeji bidi bikonkonona biena-bualu kabukabu, malu a mu Bible, mianda idi yenzeka pa buloba, ntatu ya mu dîku, bilumbu bia mu nsangilu wa bantu, mianda ya kale, sianse, nsombelu wa nyama ne mitshi, pa kutela anu bikese ebi. Bushuwa bidi bitamba kusaka muntu bua kubala malu kampanda padiwu atangila majinga ende, nsombelu anyi mudimu wende. Bu mutudi tuyukila ne bantu ba bungi, yonso wa kudibu muikale ne bidiye wanyisha ne yende ntatu, disungula biena-bualu mu mushindu muakanyine bua kujula ntema ya bantu batudi tupetangana nabu didi ditamba kupatula bipeta bimpe.

⁵ Tangila tshiakenzeka pakafila Bantemu babidi nimero wa Réveillez-vous! wa dia 8 Kabitende 1996, kudi mufundi kampanda wa bikandakanda. Wakafunda ne: “Bangabanga ne meme kupeta mpunga wa kubambila ne: kabiena binsankisha, umue wa kudibu wakasakidila ne: ‘Mudi tshiena-bualu pa bena Inde ba mu Amerike. Tudi bamanye se: udi mufunde malu a bungi pa tshiena-bualu etshi.’” Wakangata tshibejibeji ne kubalaye bidibu bafunde pa bena Inde mu dîba dia didia dia mu dinda, pashishe wakitaba ne: “bivua bimpe bitambe” ne “bilulame mu bujima buabi.”

⁶ Ntshinyi tshidi tshisankisha bantu mu teritware wenu? Ntshinyi tshiudi mumone mu bibejibeji bia ngondo eyi tshidi mua kujula ntema ya bena mudimu ba mu magazen ne bena mudimu bakuabu mu teritware wenu anyi bena mutumba nebe, bena mudimu nebe, ne balongi nebe? Ntshinyi tshidi mua kujula ntema ya pa buayi kudi bena mbulamatadi, balongeshi, bafidi ba mibelu mu mêku ne mu tulasa, babedi ba bansonga, batangidi ba midimu mu nsangilu wa bantu, ne bondapi? Dilama mu lungenyi bantu ba mishindu yonso paudi ukonkonona nimero yonso nedikupeteshe mishindu mitambe buimpe ya kumuangalaja dîyi dia bulelela.

⁷ Paudi upeta muntu udi uleja dijinga dia pa buadi dia kumanya bivule pa tshiena-bualu kampanda tshia mu Tshibumba tshia Nsentedi peshi Réveillez-vous! ne wangata tshibejibeji, udi mua kuamba ne: “Bikala mu nimero udi ulonda muikale tshiena-bualu tshingamona se: tshidi mua kukusankisha, nensanke bua kukutuadilaye.” Udi mua kusakidila muntu eu mu njila webe wa diabanya bibejibeji, umukumbula misangu ne misangu ne bibejibeji bia ndekelu. Ebi mbia muomumue ne tshitutu tuenza padi muntu udi ne dijinga dia pa buadi dia kumanya bimue biena-bualu bidi bipatuka mu bibejibeji bietu utubikila bua tuikale tumukumbula. Biena-bualu bia nunku bidi bia bungi mu bibejibeji bietu bia kale. Tudi mua kubisungula ne kubituadila bantu. Pa kuenza nunku, tudi mene mua kumana stoke wa bibejibeji bia kale.

⁸ Ikala ne tshipatshila tshia mu nyuma: Kukadi bidimu bikese, muntu mukuabu uvua ne lungenyi lutuma anu ku mudimu wende wakapeta tshibejibeji tshia Réveillez-vous! tshivua ne tshiena-bualu tshiakamusankisha. Kadi, muntu eu muena malu a Nzambi wakabala kabidi nimero wa Tshibumba tshia Nsentedi mupatula pamue ne Réveillez-vous! au, uvua ne tshiena-bualu tshiakamusaka ku dikonkonona ne lubatshi ditabuja diende dia kuonso eku dia Busatu Bunsanto. Kunyima kua ngondo isambombo wakatambula! Nunku, kuelakanyi bua kutuadija ne babadi ba bibejibeji bietu diyukidilangana pa Mifundu. Udi mua kuleja broshire wa Ntshinyi tshidi Nzambi utulomba? ne kulomba bua kuenza anu minute mikese bua kuyukilangana pa dilongesha dimue musangu wonso uudi upingana ne bibejibeji bipiabipia.

⁹ Jadika ne ntema yonso muntu wa ku makumbulula ebe ne wa ku bangenda baudi upetangana nabu udi pamu’apa mua kuanyisha bua kupeta nimero mipiamipia ya Tshibumba tshia Nsentedi ne Réveillez-vous! Pashishe wenze madikolela bua kumonangana nabu. Umonangane ne ba bungi menemene bilondeshile nsombelu ne bibejibeji ebi bia mushinga. Ne kupu muoyo ne: paudi uditatshisha bua kuambuluisha bantu ba bungi bua babale bibejibeji, udi ‘wela bidia biebe pa mutu pa mâyi.’ Tshikondo netshilue, newikale mua kupatula bipeta mu dimona bayidi nebe ba matuku atshilualua.​—Muam. 11:1, 6.