‘Balongolola biakane bua mudimu wonso muimpe’
1 Lelu’eu bantu ba Yehowa badi bapeta biakudia bilenga bia mu nyuma bivulavulayi. (Yesh. 25:6) Tudi ne biena-bualu bia mu Bible bitule bipuwe bia kukonkonona dîba dia dilonga dia muntu pa nkayende anyi dia mu dîku, mu bisangilu bia mu tshisumbu ne mu mpuilu. Kadi tutuku tutamba kupetelaku masanka ne tshipatshila tshia kulua ‘bakumbane tshishiki, balongolola biakane bua mudimu wonso muimpe’ anyi?—2 Tim. 3:17, NW.
2 Tuanjayi kuela meji kakese pa programe wa biakudia bia mu nyuma bua tshidimu etshi tshia 1998, tshikadi mene tshipite pankatshi! Mu bisangilu bia ku lumingu bia tshisumbu, tudi tukonkonona ku kakese ku kakese malu manene a mu mikanda 23 ya mu Mifundu ya tshiena-Greke, tudi tueleela meji pa nsombelu wa bantu ba mu Bible 49 ku diambuluisha dia mamanyisha mafila mu mukanda wa Auxiliaire ne tudi tukonkonona mabeji 138 a mukanda wa Prédicateurs. Tudi kabidi tulonga mukanda wa Dimanya mujima, tshitupa tshinene tshia mukanda wa Disanka mu dîku. Kupita apu, tudi kabidi badiisha ne Mudimu wetu wa Bukalenge mupatula misangu 12, biena-bualu 52 bia Tshibumba tshia Nsentedi ne miyuki ya patoke mitue ku bungi bumue ebu idi ikonkonona biena-bualu bishilangane bia mu Bible, kulua kusakidila ku bionso ebi ndongamu wa mpuilu ne mpungilu. Mbubanji kayipu bua mu nyuma bututekela!
3 Tuleje dianyisha bua malongolola adi Yehowa wenza: Bua kupetelaku masanka mavule, tudi tukengela kujingulula bua tshinyi Yehowa udi utupesha biakudia bivule nunku. Mu didia bintu bilenga ebi, tudi tuibaka ditabuja dietu ne tukolesha malanda etu nende. (1 Tim. 4:6) Kadi, biakudia bia mu nyuma ki mbitutekela anu bua ditushidimuja. Bidi bitusaka bua kumanyisha bulelela kudi bakuabu ne bitulongolola bua kutuvuija ba-ministre bapiluke ba lumu luimpe.—2 Tim. 4:5.
4 Katulenguludi bitudi tukengela mu nyuma, kadi tulame anu dijinga dikole bua malongolola mavule a mu nyuma adi afumina ku mesa a Yehowa ne adi asankisha. (Mat. 5:3; 1 Pet. 2:2) Bua kupetelaku masanka a bungi, bidi bikengela kulama pa tshibidilu dîba dikumbane bua kulonga Bible, muntu pa nkayende ne mu dîku, ne bua kubuela kabidi mu bisangilu. (Ef. 5:15, 16) Masanka adi afuminaku neikale bu dikankamija dipudija ku spiritu divua Paulo mupeshe bena nkristo bena Ebelu ba lulamatu mu Ebelu 13:20, 21.