Buonso buetu tudi ne mushinga bua kukumbaja mudimu

¹ Muyidi yonso wa Yezu udi ne bua kujingulula ne: madikolela ende menza bua kukuatshisha bumanyishi bua Bukalenge ne kudifilamu adi a mushinga mukole. Yezu uvua mumanye se: bayidi bende nebapatule mamuma mu bungi bushilangane. (Mat. 13:23) Nansha mudi mudimu munene wa bumanyishi mukumbaja kudi bampanda-njila bavule ba bukitu, bonso badi batungunuka ne kutumbisha Nzambi ne diluijakana mu dipatula mamuma bilondeshile makanda abu onso, mba kuela ka-lumbandi.​—Yone 15:8.

² Madikolela a mu tshi-bungi adi apatula bia bungi: Yezu wakadianjila kumanyisha ne: dituangaja pamue dia madikolela a bayidi bende bonso divua ne bua kuenza malu manene kupita ende yeye. (Yone 14:12) Nansha bikala nsombelu wetu utupetesha anu mushindu mukese wa kuenza bitudi mua kuenza peshi utupesha mpunga wa kufila dîba dia bungi mu buambi, yonso wa kutudi udi ne mushinga bua kukumbaja mudimu. Ke bualu menemene buakamba Paulo: ‘Bitupa bionso bia mubidi bidi biakajangana ne bidi bilamakajangana kudiye bua dikuatshishangana dia manungu onso, bu mudi mudimu wa tshitupa tshionso, bidi bidiundisha mubidi mujima.’​—Ef. 4:16.

³ Bamue badi mua kuela meji ne: madikolela abu kaena ne bua nsongo. Pabi, tshidi ne mushinga ku mêsu kua Yehowa, ntshia se: tukumbaje mudimu wetu ne anyima wetu mujima. Tshionso tshitudi tumuenzela tshidi ne mushinga, ne udi utshianyisha.​—Fuanyikija ne Luka 21:1-4.

⁴ Tutungunuke ne dikuatshisha mudimu: Bonso tudi ne muabi wa kufila diambuluisha ne bintu bia ku mubidi bua mudimu wa pa buloba bujima. Bamue badi kabidi mua kudifila mu midimu ya bianza milela kudi mudimu wa Bukalenge. Yonso wa kutudi udi mua kudienzeja bua kufila mandamuna malongolola bimpe mu bisangilu ne kuenza midimu mu Kalasa ka Mudimu wa Teokrasi. Mu dibabidila bikondo bia kukankamija bakuabu, tudi tuambuluisha mu mushindu muakane nsombelu wa mu nyuma wa tshisumbu, ne patudi tuenza nunku tshisumbu netshimone mua kukumbaja bimpe mudimu watshi.

⁵ Eyowa, buonso buetu tudi ne mushinga bua kukumbaja mudimu. Muntu nansha umue kêna ne bua kudiumvua kayi ne mushinga nansha. Madikolela etu matuangaja bua kusadila Yehowa, nansha mikale makese peshi mavule, adi aleja ne: tudi ku bungi bua batendeledi balelela ba Yehowa. (Mal. 3:18) Yonso wa kutudi udi mua kuenza mudimu munene bua bidi bitangila kutumbisha Yehowa ne kuambuluisha bakuabu bua bamumanye ne bua bamusadile.