Mudimu wetu: dileja dia dinanga dilelela
1 Ku mudimu wetu tudi tuleja butumike buetu ku mêyi-matuma matambe bunene abidi. (Mat. 22:37-39) Dinanga dietu bua Yehowa didi ditusaka bua kuakula ne mmuenenu muimpe bua bualu buende. Dinanga dietu bua bantu netu didi ditusaka bua kubakankamija bua kukeba dimanya dia disua dia Nzambi ne malongolola ende bua bamone mua kufika ku dinanga Yehowa ne kuditeka mu mulongo bua difutu dia muoyo wa kashidi bu tuetu. Nunku, ku mudimu wetu tudi tutumbisha dîna dia Yehowa ne tuabanyangana ne bantu netu ditekemena dia Bukalenge dikena kutuila mushinga. Eyowa, mudimu wetu ndileja dia dinanga dilelela bua Nzambi ne bua bantu.
2 Dinanga dietu didi dituenzeja bua kuakula ne bantu ba mishindu yonso mu nsombelu kayi yonso. (1 Kol. 9:21-23) Bu tshilejilu: Mu ndeke kampanda, mukulu muena nkristo uvua musombe ku luseke lua nsaserdose muena Katolike ka Roma. Mukulu eu wakakuisha nsaserdose mu dimuela tukonko tukese tua budimu ne, pashishe, wakaludika diyuki ku Bukalenge. Dîba diakatulukaye mu ndeke, nsaserdose eu ukavua muangate ibidi ya ku mikanda yetu. Ntshipeta kayipu tshilenga bua dileja dia dinanga dilelela dia mukulu eu bua muntu nende!
3 Dinanga didi ditusaka bua kuyisha: Aba badi baditua mu mudimu wa bumpanda-njila buambuluishi ne bua ku dîba ne ku dîba badi baleja bushuwa dinanga dilelela bua Nzambi ne bua muntu nabu. Bampanda-njila badi misangu yonso bafila dîba diabu ne makanda abu bua kuambuluisha bakuabu mu nyuma. Ntshinyi tshidi tshibasaka ku dienza nanku? Mpanda-njila kampanda wakamba ne: “Ndi mumanye se: dinanga ndimuma dia spiritu wa Nzambi. Nenku bu kabuyi buadi, tshivua mua kuikala mu bulelela nansha, tshivua mene nansha mua kulubuluka bu mpanda-njila. Dinanga didi dimvuija muditatshishi bua bantu, mumanye bidibu bakengela, ne ndi nganyisha mudi bantu bandamuna ku dinanga.” Yezu wakaleja dinanga dia nunku bua bantu. Umue musangu, pavuaye yeye ne bayidi bende bapungile baya muaba kampanda bua ‘kuikisha tshitupa,’ bantu bisumbu bakadianjila kufika muaba au kumpala kuabu. Yezu wakenza tshinyi? ‘Uvua nabu luse,’ wakateka majinga ende ku luseke bua “kubayisha malu a bungi.”—Mâko 6:30-34.
4 Nansha padi bantu babenga lumu luimpe lutudi tumanyisha, tudi tumvua disanka munda-munda, bamanye se: tudi benze muetu muonso, basaka kudi dinanga, bua kubambuluisha bua bapete lupandu. Ndekelu wa bionso, patulumbuluishabu buonso buetu kudi Kristo, netuikale ne disanka dinene bualu tuvua baleje dinanga dilelela mu ‘dikumbaja tshishiki mudimu wetu.’—2 Tim. 4:5, NW.