Tubuele mu bisangilu, ‘tutambe kuenza nunku’
1 Disangila pamue ditu misangu yonso dia mushinga mukole bua bantu ba Yehowa. Kudi bena Izalele, ntempelo ne nsunagoga bivua miaba ya ntendelelu mulelela, bavua bapetelamu dishidimuna dia kudi Nzambi ne badisangishilamu ne disanka. Bia muomumue, bena nkristo ba kumpala kabakalekela didisangisha pamue. Bu mudi bifimpakaji ne mateta bienda bivula mu matuku makole aa a ku nshikidilu, tudi petu tukengela dikankamijangana dia mu nyuma didi bisangilu bietu bia mu tshisumbu bitupetesha—ne tudi tukengela ‘kutamba kuenza nunku.’ (Eb. 10:25) Bambisha tubingila tusatu tutudi tubuelela mu bisangilu.
2 Bua didisangisha: Mifundu idi itubela bua ‘kusambangana ne kudiundishangana muntu ne muntu.’ (1 Tes. 5:11) Didisangisha dia buena Nzambi didi diuuja tshieledi tshietu tshia lungenyi ne ngenyi milenga ne ditusaka ku dienza midimu mimpe. Kadi bituadilamuna kudi bakuabu, tudi mua kupeta ngenyi ya butshimbakane, ya budisui, anyi mene idi kayiyi ya tshitembu.—Nsu. 18:1.
3 Bua dishidimuna: Bisangilu bia bena nkristo bidi bifila ndongamu mutungunuke wa dishidimuna dia mu Bible dilongolola bua kulama dinanga dia Nzambi ne luya mu mitshima yetu. Bidi bifila bulombodi bukuatshishi mu ditumikila “malu onso adi Nzambi musue.” (Bien. 20:27) Bisangilu bidi bitushidimuna mu mushindu wa kuyisha ne kulongesha lumu luimpe, bitupa mbabi idi ikengedibua nangananga mpindieu bua kuikala ne disanka dikena kufuanyikija dia kupeta ne kuambuluisha bantu badi bitaba bulelela bua mu Bible.
4 Bua dikubibua: Mu bulongolodi ebu bubi, tshisumbu ntshinyemenu tshilelela tshia mu nyuma—tshisokomenu tshia ditalala ne dinanga. Patudi munkatshi mua bateleji mu bisangilu bia tshisumbu, spiritu munsantu wa Nzambi udi ne buenzeji bukole kutudi, upatula mamuma bu mudi “dinanga, disanka, ditalala, muoyo-mule, bulenga, buimpe, ditabuja, bupole-malu, didikanda.” (Gal. 5:22, 23, NW) Bisangilu bidi bitukolesha bua kushala bashindame ne bakole mu ditabuja. Bidi bituibaka bua kuikala badiakaje bua mateta adi matuindile.
5 Mu dibuela pa tshibidilu mu bisangilu, tudi tumvua tshiakamba mufundi wa misambu, bu mudibi bifunda mu Musambu 133:1, 3 (NW) ne: “Monayi! Mbulenga kayipu ne ndisanka kayipu bua bena muntu kusomba pamue mu buobumue!” Muaba kayi wonso udi bantu ba Yehowa basadila ne basangila pamue lelu’eu, “muaba au Yehowa wakatuma dîyi bua dibenesha dikaleku, muoyo bua bikondo bikena bijadika mene.”