Tuenzayi mudimu wa tshijila butuku ne munya

¹ Tudi ne disanka dikena kutua mushinga: ndia kuikala Bantemu ba Yehowa. Tudi mu bulongolodi bua pa buloba bujima bua bamanyishi badi Yehowa utumika nabu bua kukumbaja mudimu wa bumanyishi bua Bukalenge mutambe bunene kupita wa mu bikondo bionso. (Mâko 13:10) Bu mutudi mu tshikondo tshia njiwu, tudiku tudifila mu mudimu eu muetu muonso anyi?

² Katuena bamanye bungi bua bantu balengibua ku mutshima kudi mudimu wetu wa buambi nansha. Yehowa udi utujadikila se: nekuikale “musumba munene” wa bantu badi badisunguluje ku ‘mudimu wa tshijila udibu benza butuku ne munya.’ (Buak. 7:9, 15, NW) Bantemu bapite pa miliyo itanu badi mpindieu baditue mu mudimu wa Nzambi kabena anu bateleji patupu badi baleja dijinga kampanda dia kumanya bia bungi peshi bantu badi banyisha anu bua kubuela mu bisangilu patupu. Mbantu badi bakumbaja mudimu kampanda, badi bamanyisha lumu luimpe pa buloba bujima.

³ Tudi tupeta matuku onso bikondo bia kusamuna Yehowa, mu bumanyishi bulongolola peshi bua mu mpukapuka. Tuelayibi meji ku bualabale bua bumanyishi buikala mua kufidibua bu bikala yonso wa kutudi mua kuangata dipangadika dia kumanyisha bulelela kudi muntu nansha umue patupu dituku dionso. Dianyisha dietu bua Yehowa didi ne bua kutusaka ku diakula pa bidi bimutangila ne musangelu wonso.​—Mus. 92:1, 2.

⁴ Tuambuluishayi bakuabu bua kuenzabu mudimu wa tshijila: Yehowa mmutungunuke ne kutubenesha pa kutupetesha didiunda. (Hag. 2:7) Tshilejilu, mu Congo-Kinshasa mu tshidimu tshia mudimu tshishale, muayene wa malonga a Bible malombola ngondo yonso uvua wa 217 480. Patudi tulonga ne bantu, tshipatshila tshietu ntshia kubambuluisha bua kuluabu bayidi ba Yezu Kristo. (Mat. 28:19, 20) Bavule ba kudibu mbamane kulubuluka bikole ne badi babuela pa tshibidilu mu bisangilu. Mbatuadije kulondela bantu bamanyangana nabu ‘malu a dikema a [Nzambi]’ adibu balonge. (Malu Menza 2:11, Mukanda wa Mvidi Mukulu) Tudiku mua kubabikila mpindieu bua kuenzabu mudimu wa patoke anyi?

⁵ Mu ngondo wa Tshisanga, netuenze madikolela a pa buawu bua kubikila balongi badi bakumbaje ngikadilu milomba bua kudisangabu kutudi mu buambi. Muntu ûdi ulonga nende mmuleje dijinga edi anyi? Pikalabi nanku, mmukumbaje ngikadilu milomba mu Mifundu anyi? (Tangila mukanda wa Mudimu wetu, mabeji 97-99.) Padi mulongi ujinga kupatuka mu buambi, uyukile ne mutangidi-muludiki bua dijinga diende, yeye neenze malongolola bua bakulu babidi kukonkononabu bualu ebu. Bikalaye ukumbaja ngikadilu milomba bua kulua mumanyishi ukena mutambule, umubikile bua kukufilaye mu buambi. Mutangidi wa mudimu ne balombodi ba dilonga dia mukanda nebikale mua kuambuluisha mu mushindu wa pa buawu aba badi mua kukumbaja ngikadilu milomba bua kutuadijabu mudimu wa buambi mu Tshisanga.

⁶ Nebikale bimpe bua baledi kukonkononabu bikala bana babu bakumbane bua kuluabu bamanyishi bakena batambule. (Mus. 148:12, 13) Bikala muanebe ujinga kuakula mu mudimu wa Bukalenge ne bikalaye ne bikadilu bimpe, udi mua kuyukila ne umue wa ku bakulu bena mu komité wa mudimu. Panyima pa bamane kudisangisha pamue nebe ne muanebe, bakulu babidi nebashindike bikalaye mua kubadibua bu mumanyishi. Bidi disanka dia pa buadi bua bana kusamunabu Yehowa ku luseke luetu.

⁷ Yehowa nkayende ke udi muakanyine bua tuetu kumulambula mudimu wa tshijila. (Luka 4:8) Tuanyishayi bonso bua kubabidila disanka dia dikema ditudi nadi dia kumusamuna “bikole.”​—Mus. 109:30; 113:3.