Tubikile muntu yonso udi ne nyota
1 Anu bu muakadianjila kumanyisha muprofete Amosa, dîku dia bantu didi lelu’eu ne ‘nyota idi kayiyi bu nyota ya mâyi, kadi ya kumvua mêyi a Yehowa.’ (Amo. 8:11) Bua kuambuluisha badi bakenga bua tshiyole etshi tshia mu nyuma, tudi tumanyisha ndongoluelu mienza kudi Nzambi bua kupikula bantu bena butumike ku mpekatu ne lufu, ndongoluelu mileja mu nshapita wa ndekelu wa Buakabuluibua bu ‘musulu wa mâyi a muoyo.’ Tudi ne disanka dia kubikila muntu yonso udi ne nyota ya buakane bua ‘kuangata mâyi a muoyo tshianana.’ (Buak. 22:1, 17) Mmunyi mutuenza nunku mu Luabanya? Mu dileja aba badi ne dijinga dilelela dia kumanya bia bungi mukanda wa Buakabuluibua—Nkomenu wabu munene ukadi pabuipi! Pamu’apa newanyishe bua kuteta mbuelelu eyi.
2 Bantu bavule badi baditatshisha bua makanda a mubidi; pamu’apa netuikale mua kuanyisha mbuelelu eu:
▪ “Bantu ba bungi badi banyingalala bua mishinga mitambe kukola ya luondapu lua nsongo. Ukadiku muele meji pa bualu ebu anyi? [Lekela muntu andamune.] Udiku ne lungenyi pa mushindu wa kujikija tshilumbu etshi bua kashidi anyi? [Lekela muntu andamune.] Mona ditekemena dilenga.” Bala Buakabuluibua 22:1, 2. Pashishe ubulule mukanda wa Buakabuluibua—Nkomenu pa tshimfuanyi tshia mu mabeji 308-309 ne elapu nseka ku diambuluisha dia tshikoso 22 tshia mu dibeji 311. Ukomeshe pa kuamba ne: “Mukanda eu udi ukonkonona Buakabuluibua mvese ku mvese.” Bikala mukuyukidishi muleje dijinga dilelela dia kumanya bivule, mupeshe mukanda ku mushinga wawu. Ulongolole bua kualukila kumutangila.
3 Pawenza dikumbulula, newikale mua kumuvuluija diyuki dienu dia musangu mushale pa kuamba ne:
▪ “Mu dimonangana dietu dia musangu mushale, tuvua bakule bua mushindu wa kujikija bua kashidi ntatu ya makanda a mubidi. Udiku wela meji ne: dimue dituku muntu nansha umue kakusama anyi? [Lekela muntu andamune.] Tangila mêyi aa adi alenga ku mutshima.” Bala Yeshaya 33:24. Pashishe ubulule broshire wa Utulomba mu dilongesha 5, nukonkonone tshikoso 5 ne 6 mu diela nkonko ya bikoso ebi idi ku ntuadijilu kua dilongesha ne mu dibala imue ya ku mvese ya mu Bible mifilamu. Umvuija ne: dijikija dia masama ne lufu didi tshitupa tshia dikumbana dia dijinga dia Nzambi dia ku tshifukilu bua buloba. Pungayi dîyi bua kulua kuyukidilangana pa bikoso 1-4 ne 7 bia dilongesha dimue-dimue edi.
4 Bikala matuku mashale aa ngumu mimanyishe bua lufu lua muntu kampanda wa bidimu bikese, newikale mua kuteta mbuelelu eu:
▪ “Udi bushuwa mumvue bualu bua [tela lumu]. Padi bantu bafua lufu lua tshikisu ku diakabi, ba bungi badi badiebeja bua busambi budibu mua kutuadila mêku adi mafuishe. Udi wela meji kayi?” Lekela muntu andamune. Pashishe ubulule mukanda wa Buakabuluibua—Nkomenu mu dibeji dia 299 ne uleje tshimfuanyi tshia dibiishibua. Tungunuka wambe ne: “Ba bungi badi bakema padibu bumvua ne: bantu bakane ne badi kabayi bakane nebapingajibue ku muoyo mu Mparadizu pa buloba. [Bala Bienzedi 24:15 mutela mu tshikoso 9, dibeji 297, ne ufile diumvuija dileja mu tshikoso 10.] Mukanda eu udi kabidi ne malu mavule makuabu adi akoka ntema pa bidi bitangila dilongolola dia Nzambi bua matuku atshilualua. Biwajinga kumanya bia bungi pa bualu ebu, ndi mua kukushila mukanda eu.” Ulaye bua kualukila ne ufunde pa dibeji malu adi mukuyukidishi utamba kusankidila ne adi amusumpakaja.
5 Mu dikumbulula, wakaje dileja diebe bilondeshile lungenyi lua muntu eu. Pamu’apa udi mua kuamba nunku:
▪ “Patuvua bayukile musangu mushale, uvua muambe bualu bukuabu buvua bunsankishe pa bidi bitangila dilongolola dia Nzambi bua buloba. [Vuluija tshivua muntu muambe.] Ndi mupete ngenyi indi mumone se: neyikusankishe.” Bulula broshire wa Utulomba mu dilongesha 5. Bala bikoso bionso bidi bimueneka bikoka ntema ya muntu eu ne nuyukidilanganapu. Panyima pa bamane kupunga dîyi bua kulua kutungunuka ne dikonkonona dia dilongesha, shiya kabeji ka dibikila (bikalatu kuoku) kadi kamanyisha mêba a bisangilu bia tshisumbu. Umvuija tshidi muyuki wa patoke ne bikila muntu bua kubuelamu.
6 Biwikala musue dileja dipepele ku diambuluisha dia trakte, udi mua kuteta nunku:
▪ “Ndi njinga kukushila trakte eu udi ne tshiena-bualu: Nditekemena kayi ditudi nadi bua bananga betu bakadi bafue?” Mufile kudi muntu ne umulombe bua alonde dibala dia tshikoso tshia kumpala. Mulekele andamune lukonko lujula mu tshiambilu tshia ndekelu. Bala tshikoso tshibidi, pashishe uleje tshimfuanyi tshia mu dibeji dia 299 mu mukanda wa Buakabuluibua—Nkomenu. Tungunuka wambe ne: “Mukanda eu udi umvuija bimpe dibiishibua ne malaya makuabu malenga a mu Bible bua matuku atshilualua. Biwasua kuubala, ng’webe.” Manyisha mushinga, bilondeshile mishinga ya matuku aa, ne udilongolole bua kuenza dikumbulula.
7 Lubila elu lutudi tuela ludi lusonsola mutshima ludi mua kukoka bantu ku mâyi a muoyo adi Yehowa upongolola matuku aa. Nunku, tudi tuambila yonso udi ne nyota ne: “Lua!”—Buak. 22:17.