Tumanyishayi Lumu Luimpe, Bamanye Se: Tshikondo Ntshifimpakane
1 Tudi tuleja dianyisha dietu diondoke bua ditekemena dia Bukalenge bua Nzambi pa kuditua ne muoyo mujima mu mudimu wa Buena-nkristo. Bidi bitukengela kuwenza bamanye se: tshikondo ntshifimpakane. Bua tshinyi? Bena mudimu mbakese, nshikidilu wa ndongoluelu mubi eu wa malu ukadi pabuipi ne muoyo wa bantu ba mu teritware wetu udi mu njiwu. (Yeh. 3:19; Mat. 9:37, 38) Bujitu bunene bua nunku budi butulomba bua kudienzeja muetu muonso mu mudimu. Mmunyi mutudi mua kuleja mu buambi ne: tudi bamanye difinakana dia bikondo? Pa kulongolola mbuelelu mimpe, pa kukeba bantu ne tshisumi miaba yonso idibu, pa kufunda bisunguluke pa dibeji disankidila kayi dionso dileja, pa kuenza ne lukasa luonso makumbulula bua kukolesha disankidila edi ne pa kuvuluka ne: bu mudi mioyo ya bantu mu njiwu, tudi ne bua kuangata mudimu wetu ne mushinga. Mibelu idi ilonda eyi neyikale mua kutuambuluisha patudi tudilongolola bua kumanyisha lumu luimpe mu Luabanya, bamanye se: tshikondo ntshifimpakane. Netufile mukanda wa Buakabuluibua—Nkomenu wabu munene ukadi pabuipi!
2 Pamu’apa newikale mua kutuadija diyuki pa kutela mu tshikoso ntatu idi ikuata bantu miaba itudi tusanganyibua, pa kuamba ne:
◼ “Bantu bavule badi bitabuja Nzambi, kadi batu badiebeja nsombelu udiye mutulongoluele bua matuku atshilualua. Udi wela meji kayi? [Lekela muntu andamune.] Utuku mumanye se: Bible udi utupesha mamanyisha matokesha pa disua dia Nzambi bua bukua-bantu ne pa tshidiye wenza bua kudikumbaja anyi?” Bulula mukanda wa Buakabuluibua—Nkomenu mu dibeji 301. Bala mu tshikoso tshia kumpala Buakabuluibua 21:1, pamue ne diumvuija diende mu tshitupa tshibidi tshia tshikoso 2. Leja tshimfuanyi tshia mu dibeji 302 tshidi tshifila diumvuija dia bionso ebi bua nsombelu wetu wa matuku atshilualua. Mu tshikoso 6, bala Buakabuluibua 21:4. Bikala muntu mua kusankishibua, muleje mukanda ku dipa diakanyine. Umvuanganayi bua dîba dikumbanyine dinudi mua kutungunuja diyuki pashishe.
3 Udi mua kutungunuka ne diyukidilangana pa Buakabuluibua 21:1, 4 nunku:
◼ “Musangu mushale pamvua mulue, tuvua bakule bua dilaya dia Nzambi dia kulongolola nsangilu mupiamupia wa bantu pa buloba. [Koka tshiakabidi ntema pa dibeji 302 dia mukanda wa Buakabuluibua—Nkomenu.] Newanyishe bua dîku diebe kubabidiladi nsombelu wa mushindu’eu anyi? [Lekela muntu andamune.] Lukonko ludi ne: malaya a Nzambi mmakumbanyine kuitabuja anyi? Tangila tshidiye wamba yeye muine.” Bala Buakabuluibua 21:5, 6a mu tshikoso 8 tshia mu dibeji 303. Ela lukonko lua tshikoso 9, mu dibeji 303, ne bala diandamuna, pamue ne tshiambilu tshia ndekelu tshia tshikoso. Ebeja muntu bua dilonga dia Bible kakuyi difuta mfranga. Enza malongolola bua kuleja pashishe mushindu utudi dienjibua.
4 Bantu ba bungi badi basumpakana bua divulangana dia ntatu idi bukua-bantu butuilangana nayi; nunku newikale mua kuamba, mu dikumbula diebe dia kumpala, mêyi bu mudi:
◼ “Bantu bavule badi basumpakana bua ntatu idi itumuenekela. [Tela imue ya ku ntatu.] Kukadi makumi a bidimu, bena tshididi badi balaya bua kuyijikija bua kashidi, ne bamue mbatete bua kuenza nanku. Ku diebe dimona, bua tshinyi nsombelu udi amu wenda unyanguka? [Lekela muntu andamune.] Bible udi ufila diumvuija ditu bantu bavule kabayi banji kukonkonona. Mukanda wa Buakabuluibua udi wakula bua mvita ivua mienzeke mu diulu. Mona muakajikayi, bilondeshile Buakabuluibua 12:9.” Bala mufundu ne bulula mukanda wa Buakabuluibua—Nkomenu mu dibeji 182. Tumika ne tshimfuanyi bua kuleja mushindu udi Satana ubuelakana mu malu a bantu. Wenze bua kumuleja mukanda. Pungayi dîyi bua kualukila bua kumuleja muikala Nzambi mua kujikija ntatu ya bukua-bantu.
5 Biwikala mulaye bua kualukila kumanyisha dijandula diatuala Nzambi ku ntatu ya lelu, udi mua kuteta kuamba ne:
◼ “Ndi mualukile anu bua kukutangila bua tutungunuke ne diyuki dietu pa dijikija dilelela dia ntatu ya bukua-bantu. Musangu mushale, tuvua bamone mu Bible ne: Satana udi upambuisha buloba bujima budi bantu bâse. Bu mudiye tshifukibua tshia mu nyuma tshipite bantu ku makanda, udiku wela meji ne: kudi mushindu wa kujikija buenzeji buende bubi anyi? [Lekela muntu andamune.] Tangila tshidi Bible wamba.” Bala ne umvuija Buakabuluibua 20:1-3. Ku diambuluisha dia tshimfuanyi tshia mu dibeji 4 ne 5 a mukanda wa Dimanya, leja mualua nsombelu wa bantu tshikondo tshiajika buenzeji bua Satana. Lomba bua dilonga dia Bible ne teta mua kudituadija amu dîba adi.
6 Bantu bavule badi batabalela miaba idi mitunyungulule. Newikale mua kuteta kutuadija diyukidilangana mushindu’eu:
◼ “Tudi bamone se: bantu pabuipi ne bonso badi basumpakana bua dinyanguka dia kapepe, mâyi ne biakudia. Mu amue matunga, ngikadilu wa miaba idi minyungulule bantu udi uteka mioyo yabu mu njiwu. Bu mudi Nzambi muikale Mufuki wa buloba, tshienzaye ntshinyi ku diebe dimona? [Lekela muntu andamune.] Bible udi wamba ne: nealumbuluishe bantu bua mushindu udibu batumika ne buloba. [Bala Buakabuluibua 11:18b.] Elabi meji ne: udi musombe pa buloba busukula ku dinyanguka dionso!” Zangika dilaya didi Nzambi wenza pa bidi bitangila mparadizu mu Buakabuluibua 21:3, 4. Leja tshimfuanyi tshia mu dibeji 302 dia mukanda wa Buakabuluibua—Nkomenu. Bikala disankidila dileja kudi muntu dikutuisha, muleje mukanda ne angata mapangadika bua kualukila kumutangila.
7 Mu dialukila kutangila muntu uvua muleje disankidila bua mparadizu wa pa buloba, udi mua kuamba ne:
◼ “Musangu mushale, tuvua bitabuje bonso ne: bidi bikengela bua Nzambi ele tshianza mu malu a bantu bua kujikija tshilumbu tshia dinyanguka dia buloba. Kadi lukonko ludi ne: tshitudi ne bua kuenza ntshinyi bua kusomba mu bulongolodi bupiabupia ne buakane bua Nzambi?” Bala Yone 17:3. Lomba mukuyukidishi bua kubabidilaye dilonga dia Bible kabiyi kufuta mfranga diamuambuluisha bua kupetaye dimanya edi dia pa buadi.
8 Ndisankapu kayi ditudi nadi dia kutumika bu bena mudimu mu dinowa didiku lelu’eu, ne dia kuditua mu mudimu wa buambi udi upandisha mioyo! Tuikalayi bonso ne bia bungi bia kuenza mu dimanyisha lumu luimpe, bamanye se: tshikondo ntshifimpakane ne ‘bamanye se: mudimu utudi tuenza kawena patupu.’—1 Kol. 15:58.