Tuambuluishayi bakuabu bua ‘kutumikila malu mafunda’
1 Kabiena bikumbane amu ‘kuteleja’ mêyi a milayi ya mu mukanda wa Buakabuluibua. Tudi tupetelamu masanka mu mushindu mujima bituikala ‘tutumikila’ tshidi tshifundamu. (Buak. 1:3) Bua eu udi musue kuenza bayidi, dishila bantu mikanda didi amu tshiidia tshia kumpala. Kunyima kua dipetangana dietu ne muntu muanyishi, muena dijinga dia kuteleja, tudi ne bua kualukila pa lukasa bua kumuambuluisha amanye bivule. Tudi mua kuyukila pa tshinyi mu dikumbula dialonda?
2 Binuikala bayukile musangu mushale pa babandi ba pa tubalu banayi ba mu tshimfuanyi, udi mua kutuadija diyukidilangana nunku:
◼ “Musangu mushale tuvua bakule pa mukanda wa Buakabuluibua ne bamone se: malu adi apitakana pa buloba adi mpindieu akumbaja milayi yawu. Buakabuluibua nshapita 6 mmumanyishe bua lubilu lua babandi ba pa tubalu ba mu tshimfuanyi banayi bavua ne tshia kutuala tshikisu ne makenga pa buloba. Tudi tumona malu aa enzeka ku mêsu kuetu. Ba bungi badi badiebeja ne: ntshikondo kayi tshialua nshikidilu wa makenga aa ne nsombelu wa disanka mu bulongolodi bua ditalala. Kadi wewe, udi wela meji kayi pa bualu ebu? [Lekela muntu andamune.] Bayidi ba Yezu bakakeba mua kumanya diandamuna ku lukonko elu.” Bala Matayo 24:3, mudi lukonko luela, pashishe ubale mvese wa 34 mudi Yezu ufila diandamuna. Bikalaku disankidila dilenga, ufile majadika makuabu pa matuku a nshikidilu.
3 Binuikala nuvua bakule pa Bukalenge bua Nzambi mu lusombi lua kumpala, udi mua kupangadija bua kulutungunuja pa kuela lukonko elu:
◼ “Bua kueba kumona, mmbulamatadi wa mushindu kayi udi ukengedibue bua kukumbaja majinga wonso a bukua-bantu? [Lekela muntu andamune. Bala Yelemiya 10:23.] Bu muudi mua kudijinguluila, kabitu bianji kuvuila Nzambi mu lungenyi bua se: muntu alombole nkayende nsombelu wende nansha. Ntatu mivule idi ituluila bualu bantu mbasue kudilombola nkayabu kakuyi diambuluisha dia Nzambi. Bukalenge bua Nzambi ke mbulamatadi umu’epele udi mukumbanyine bua kutukumbajila majinga etu.” Uye mu dibeji dia 339 dia mukanda wa Comment raisonner, ne nuyukidilangane pa mvese idi mu ka-tshina-bualu kibidi. Tungunuja diyukidilangana pa kumvuija bua tshinyi tudi mua kuikala ne dieyemena dijima kudi Nzambi.
4 Imue misangu udi mua kusanka kuidikija lungenyi elu bua kutuadija diyukidilangana dia Bible:
◼ Leja tshimfuanyi tshia mu dibeji dia 302 dia mukanda wa Révélation: dénouement, usakidile ne: “Bukua-bantu nebupete nsombelu eu penzeka disua dia Nzambi pa buloba bu mudidi dienzeka mu diulu. Pabi, bamue badi batshina se: bubi kabuvu kualukila. Kabiakuenzeka nansha, bualu bantu babi buonso nebajimijibue.” Bala Musambu wa 37:10, 11. Lomba muteleji webe bua kubabidila dilonga dia Bible diboluela mu tshianza kudi Bantemu ba Yehowa bua kumanya bivule.
5 Biwikala mushiye trakte wa “Nsombelu wa ditalala mu bulongolodi bupiabupia,” udi mua kuleja tshimfuanyi ne pashishe kubala tshikoso tshia kumpala muinshi mua ka-tshiena-bualu aka: “Nsombelu mu bulongolodi bupiabupia bua Nzambi,” pashishe usakidile ne:
◼ “Bituikala basue kuikala ne muoyo mu bulongolodi bu ebu, kudi bualu bua mushinga bua kuenza.” Bala tshikoso tshia ndekelu tshia trakte ne leja mukanda wa Révélation: dénouement.
6 Bu mudi tshipatshila tshietu tshikale tshia kutuadija malonga a Bible, tudi ne bua kuenza makumbula mapiamapia malenga. Tualongamije mu ditumika dietu ne dîba, ne tudilongolole bimpe. Mu mushindu’eu, netuikale bushuwa mua kuambuluisha bantu bena kuteleja.—Buak. 22:6, 7.