Tumanyishayi ‘mêyi a mulayi’
1 Tudi mu tshikondo tshia dikumbana dia milayi mifunda mu mukanda wa Buakabuluibua. Bantu ba bungi badi bateta kujingulula diumvuija dia malu malubakaji adi apitakana lelu’eu. Bidi mua kuikala bua diakalenga diabu bu buobo mua ‘kuteleja mêyi’ a mulayi wa mu Buakabuluibua. (Buak. 1:3) Mu Kabitende, netuikale mua kubambuluisha mu dibaleja mukanda wa Révélation: dénouement. Patuawuleja, tulamayi mu lungenyi se: mukanda wa Buakabuluibua uvua mumanyishe ntatu idi bukua-bantu bupetangana nayi lelu. Ntshinyi tshitudi mua kuamba?
2 Mbuelelu eu neikale imue misangu mukumbanyine:
◼ “Mvita, nzala ne kusama bidi binemene bantu mu siekele eu wa 20. Bua kueba kumona, bua tshinyi bidi nanku eku petu benze malubuluka mavule mu malu a dienza ne ditumika ne biamu? [Lekela muntu andamune.] Ba bungi badi bakema pa kumvua se: ntatu yonso eyi ivua mimanyisha mu Bible. Bumue ukadiku mumvue bakula bua ‘babandi ba pa tubalu banayi ba mu Buakabuluibua.’ Tshidi Bible wamba pa bidi bitangile babandi ba pa tubalu abu mmulayi utudi tumona dikumbana diawu lelu ku diambuluisha dia mianda idi yenzeka pa buloba. [Bulula mukanda wa Révélation: dénouement mu nshapita wa 16 ne uleje bimfuanyi bia mu dibeji dia 91 too ne dia 97.] Mulayi eu udi umanyisha tshikondo tshia dikenga dinene, kadi udi ufila kabidi ditekemena. [Bala Buakabuluibua 6:2 mu tshikoso 3.] Mubandi wa kabalu katoke n’Yezu Kristo. Mmulaye bua kutshimuna bubi ne kuasulula bulongolodi bua diakalenga ne ditalala ku diambuluisha dia Bukalenge budiye mutulongeshe bua kusambila bualu buabu.” Leja mukanda.
3 Lukonko ludi lulonda elu nelusonsole pamu’apa diyukidilangana dilenga:
◼ “Bua kueba kumona, ntshinyi tshitudi tukengela bua kujikija nsombelu mukuate luse udi bulongolodi ebu busanganyibua? [Lekela muntu andamune.] Bantu ba bungi badi ne mmuenenu wa se: bua kupanduka, bulongolodi ebu budi bukengela dishintuluka dijima. Bible udi uleje se: Nzambi mmumanye tshidi tshikengela bua kujikija ntatu yetu ne mmulaye bua kutuambuluisha.” Bulula mukanda wa Révélation: dénouement mu dibeji dia 171 ne ubale Buakabuluibua 11:15 mu tshikoso tshia 1. Leja bimfuanyi bia mu dibeji dia 302 ne dia 308, ne ukoke ntema ya muntu pa masanka apongolojabu kudi Bukalenge bulombola kudi Kristo. Mumvuije pashishe mushindu wikalaye pende mua kualabula.
4 Pamu’apa mbuelelu udi ulonda eu neakanyine:
◼ “Bantu ba bungi badi babale mukanda wa mu Bible wa Buakabuluibua batu baumone mukole bua kuumvua. Muine eu udi uleja malu a bungi a mponono ne a bualabale bunene. Mukanda eu, La Révélation: le grand dénouement est proche!, ndikonkonona dia mvese ku mvese dia Buakabuluibua. Udi umvuija ne: dikumbana dia milayi didi dilenga yonso wa kutudi.” Bulula mukanda mu dibeji dia 15, tshikoso 2, ne uleje Buakabuluibua 1:1 udi mufunda mu maleta madiundisha. Ambila muntu ne: mvese yonso wa mu mukanda wa Buakabuluibua mmumvuija mushindu’eu ne mamanyisha adi mafila neamuambuluishe bua kumvuaye milayi eyi ya kukatshila. Uleje mukanda bikala diandamuna dia muntu didi dilengele.
5 Bikala muntu ne mudimu anyi biwikala kuyi mujadike ne: dijinga diende dia kumanya bia bungi ndikumbane, udi mua kumushila tshibejibeji anyi trakte. Yeye muleje dijinga dia kumanya bia bungi mu dikumbula dialonda, neumuambile bua kuanyisha mukanda.
6 Mukenji wa mu Buakabuluibua udi utangila bantu buonso. Nenku bidi bikengela bua: muntu yonso ateleje mêyi a mulayi. Tudiku mua kuenza muetu muonso bua kumanyisha mukenji eu wa mushinga mukole!