‘Tuibake Dîku Dietu’

¹ Kakuena mpata bua ne: pa buloba bujima, nsombelu wa mu dîku udi wenda unyanguka. Bulongolodi bukokesha kudi Satana mbunangidile mu dishima ne buendenda. (1 Yone 5:19) Ebi bidi bishindika se: mbia mushinga mukole buetu tuetu bua ‘kuibaka dîku dietu’ ne bua kulongesha bantu bakuabu mushindu udibu mua kuibaka abu mêku.​—⁠Nsu. 24:3, 27, NW.

² Mêyi-maludiki a mu Bible adi bukubi: Ditumikila mêyi-maludiki a mu Bible ke nsapi wa disanka dilelela mu dîku. Malelela àdì ne bukole a mu Bible adi ne diambuluisha bua muena mu dîku yonso mu bitupa bionso bia nsombelu. Pa kuatumikila mu nsombelu, dîku didi dipeta disanka ne ditalala dia Nzambi.​—⁠Tangila Yeshaya 32:17, 18.

³ Mêyi-maludiki adi atuambuluisha bua kuibaka dîku dietu mmaleja patoke mu mukanda mupiamupia wa Nsapi wa disanka mu dîku. Ku ndekelu kua nshapita yonso kudi kazubu kadi kazangika mêyi-maludiki adi bena mu dîku ne bua kuvuluka. Tuvule tua ku tuzubu etu tudi tutuadija ne lukonko: “Mmunyi mudi mêyi-maludiki a mu Bible aa mua kuambuluisha. . . ?” Ebi bidi bikoka ntema yetu pa meji a Nzambi, bitubueja mu lungenyi mmuenenu wende pa tshiena-bualu tshikonkonona.​—⁠Yesh. 48:17.

⁴ Tuibidilangane ne mukanda. Tumanye mua kupeta mêyi-maludiki adi mua kutuambuluisha padi ntatu ijuka. Mukanda udi wakula pa malu bu mudi: tshidi tshikengela kutangila kudi muntu unuaselangana nende (nshapita 2), nshindamenu wa dibaka didi dinenga ne dia disanka (nshapita 3), tshidi baledi mua kuenza bua bana babu bapiankunde bua balue bantu bakulumpe bakumbane kuambula majitu ne badi batshina Nzambi (nshapita 6), mushindu wa kukuba dîku ku buenzeji bua tshinyangu (nshapita 8), mêyi-maludiki adi ambuluisha mêku adi ne muledi umuepele mushindu wa kulubulukawu (nshapita 9), diambuluisha dia mu nyuma kudi mêku adi mu tshilumbu tshia bunu bua maluvu ne tshinyangu (nshapita 12), tshia kuenza padi malanda a dibaka asua kukoseka (nshapita 13), tshidi muntu mua kuenza bua kunemeka baledi bende bakulakaje (nshapita 15) ne mushindu wa kupetesha dîku diebe nsombelu wa kashidi mu matuku atshilualua (nshapita 16).

⁵ Tutumike tshishiki ne mukanda mupiamupia eu: Bua tshinyi kubenga kulonga mu dîku mukanda wa Disanka mu dîku binuikala kanuyi banji kuulonga? Bia muomumue, bikala dîku dietu dituilangana ne ntatu mipiamipia peshi dikale mu nsombelu wa lunsuya, tutangilule nshapita ya mukanda idi yakula pa bualu ebu ne tuelangane meji mu disambila pa mushindu wa kutumikila mibelu. Kabidi, tuikale bena kalolo pa kulama dîba dia kuyisha ne kudienzeja bua kufila mukanda wa Nsapi wa disanka mu dîku mu bianza bia bantu bapite bungi mu ngondo wa Tshisanga.

⁶ Mêku adi aleja bulamate kudi Nzambi neakoleshibue mu nyuma ne neikale mu buobumue, madiakaje bua kukandamena dibunda dia Satana. (1 Tim. 4:7, 8; 1 Pet. 5:8, 9) Mmunyipu mutudi ne dianyisha kudi Mufuki wa dîku udi utupesha dilongesha diende!