Ipatshilayi ditalala dia Nzambi mu nsombelu wa mu dîku
‘Nuenu ba mu [“mêku,” NW] a bantu, nuambike Yehowa malu ende, nuambike Yehowa butumbi ne bukole.’—MUSAMBU 96:7.
1. Yehowa wakapesha nsombelu wa dîku ntuadijilu wa mushindu kayi?
YEHOWA wakapesha nsombelu wa dîku ntuadijilu wa ditalala ne wa disanka pakasangishaye mu dibaka mulume ne mukaji ba kumpala. Bushuwa, Adama wakatshionkomoka bikole ke kujikulaye disanka diende mu kasala ka kumpalampala kafunda ne: “Eu ke mufuba wa ku mifuba yanyi ne mubidi wa ku mubidi wanyi. Nebamubikile ne: ‘mukaji’; bualu mmupatukile kudi mulume.”—Tshibangidilu 2:23, MMM.
2. Ntshinyi tshivua Nzambi muikale natshi mu lungenyi bua dibaka ne kabidi bua dituadila bana bende ba pa buloba disanka?
2 Pakajadika Nzambi dibaka ne ndongoluelu wa dîku, uvua ne bivule mu lungenyi kupita patupu dituadila bana bende ba pa buloba disanka. Uvua musue bua benze disua diende. Nzambi wakambila bantu aba babidi ba kumpala ne: ‘Nulelangane, nukumbane ba bungi, nuuje buloba tente; nubukokeshe; nuikale ne bukokeshi ku mutu kua minyinyi ya mu mâyi, ne nyunyu ya muulu, ne tshintu tshionso tshidi ne muoyo tshidi tshiendakana pa buloba.’ (Genese 1:28) Bushuwa, uvua mudimu mupeteshi wa difutu. Ndisankapu kayi divuabu mua kuikala nadi kudi Adama, Eva, ne bana babu bavuabu ne bua kulela bu bena dibaka ba kumpala aba benze disua dia Yehowa ne butumike buonso!
3. Ntshinyi tshidi tshilombibue bua mêku kuikalawu ne nsombelu wa bulamate kudi Nzambi?
3 Kadi, nansha lelu’eu, mêku adi ne disanka dinene padiwu makuatakane pamue bua kuenza disua dia Nzambi. Ne mmatekemena kayipu malenga adi nawu mêku bu aa a butumike! Mupostolo Paulo wakafunda ne: “Dilamata kudi [“Nzambi,” NW], didi dikuatshisha mu malu onso, bualu bua diodi didi ditulaya muoyo mpindiewu ne bua matuku alualua.” (1 Timote 4:8, MML) Mêku adi ne nsombelu wa bulamate bulelela kudi Nzambi adi alonda mêyi-maludiki a mu Dîyi dia Yehowa ne enza disua diende. Adi ipatshila ditalala dia Nzambi ne nenku apeta disanka mu “muoyo mpindiewu.”
Nsombelu wa dîku udi mu njiwu
4, 5. Bua tshinyi tudi mua kuamba ne: nsombelu wa dîku udi mpindieu mu njiwu pa buloba bujima?
4 Mu bulelela buonso, katuena tusangana ditalala ne disanka mu dîku dionso nansha. Mu ditela mukanda kampanda mufunda kudi kasumbu kadi kalonga bungi bua bantu pa buloba kadibu babikila ne: Tshipangu tshia Bantu, tshikandakanda tshia The New York Times tshidi tshiamba ne: “Mu matunga mapele pamue ne mabanji, nsombelu wa dîku udi wenda ushintuluka bikole.” Bakatela mêyi a mufundi mukuabu wa tshiena-bualu etshi wamba ne: “Lungenyi lua se: dîku nsangilu mushindame ne mukuatakane, mudi tatu wambuluisha bu mutabaledi mu malu a mpetu ne mamu wambuluisha bu mutabaledi wa dinanga mmuanu. Bulelela budi se: malu matangalake bu mudi bamamu bakena basedibue, dibanda dia bungi bua mabaka adi afua, [ne] mêku matambe bukese . . . adi amueneka pa buloba bujima.” Bua malu a nunku, mêku miliyo mivule mmapangile dishindama, ditalala, ne disanka, ne mavule adi enda akosoloka. Mu ditunga dia Espagne bungi bua mabaka adi afua buakabanda kumbukila ku dibaka 1 pa mabaka 8 ku ntuadijilu wa bidimu dikumi bishale ebi bia mu siekele wa 20—ditumpika dinene kumbukila ku dibaka 1 pa mabaka 100 anu mu bidimu 25 kumpala. Badi bamba mudi ditunga dia Angleterre dikale ne bungi bupite kubandila bua mabaka adi afua ku Mputu—mabaka 4 pa mabaka 10 adi afua. Dine ditunga edi ndipete kabidi divula dia mêku a muledi umue.
5 Bidi bimueneka se: bamue bantu kabenaku bajingakana bua kushipa dibaka. Bavule badi banyemena mu “Sanktiwere wa dishipa bisuikidi” pabuipi ne tshimenga tshia Tokyo, mu Japon. Ntempelo eu wa bena Shinto udi wanyisha malomba menza bua kushipa mabaka ne kukosa makuabu malanda akena manyishibue. Mutendeledi yonso udi ufunda dilomba diende pa kabaya ka mutshi, ukakudika munda mua ntempelo, ne usambila bua kupeta diandamuna. Tshikandakanda kampanda tshia mu Tokyo tshidi tshiamba ne: pakajadikibua ntempelo au kukadi kupite bu siekele mujima, “bakaji ba bangenda-mushinga babanji ba muaba au bakafunda masambila balomba ne: babayabu balekele bakaji babu ba ndumba ne bapingane kudibu.” Kadi lelu’eu, malomba mavule mmenza bua kushipa dibaka, ki mbua kupingajangana nansha. Kakuyi mpata, nsombelu wa dîku udi mu njiwu pa buloba. Ebi bidi ne bua kukemesha bena nkristo anyi? Tòo, bualu Bible udi utupesha busunguluji mu dinyanguka didiku lelu’eu mu dîku.
Bua tshinyi dinyanguka dia dîku?
6. Mbuenzeji kayi budi nabu 1 Yone 5:19 pa dinyanguka dia dîku lelu’eu?
6 Kamue kabingila bua dinyanguka dia dîku lelu’eu ng’aka: “Buloba bujima budi bulala mu bukokeshi bua mubi.” (1 Yone 5:19, NW) Ntshinyi tshitudi mua kutekemena bua mubi, Satana Diabolo? Mmushimianganyi mubi, muena buenzavi. (Yone 8:44) Ki mbualu bua dikema mudi bulongolodi buende budiela ne kasuki mu mashimi ne buenzavi, bintu bidi bibutula nsombelu wa dîku! Pambelu pa bulongolodi bua Nzambi, buenzeji bua Satana budi bufuna bua kubutula ndongoluelu wa Yehowa wa dibaka ne kutuisha ku ndekelu nsombelu wa dîku wa ditalala.
7. Mmunyi mudi bimanyinu bidi bantu bavule baleja mu matuku aa a ku nshikidilu mua kuambulukila mêku?
7 Kabingila kakuabu bua ntatu ya dîku idi mikuate mpindieu bukua-bantu nkaleja mu 2 Timote 3:1-5. Mêyi a tshiprofete a Paulo mafundamu adi aleja ne: tudi mu ‘matuku a ku nshikidilu.’ Mêku kaena mua kuikala ne ditalala ne disanka pikala benamu ‘badisui, banangi ba biuma, baditumbishi, badileji, bapendi ba Nzambi, kabayi batumikila mêyi a baledi babu, kabayi ne kusakidila, kabayi ne tshijila, kabayi banangi ba bana babu, bashipi ba bipungidi, bena bunsonge, kabayi mua kudikanda, bena luonji, kabayi basue malu mimpe, bikale batungidianganyi, bena lukuluku, buujibue ne diambu, banangi ba masanka, kabayi banangi ba Nzambi, bikale ne tshimuenekelu tshia [“bulamate kudi,” NW] Nzambi, kadi bamane kudiula bukole buabu.’ Dîku kadiena mua kuikala ne disanka nansha dikese pikala nansha umue wa ku benamu mupangile dinanga dia ku tshileledi anyi kayi ne bulamatshi. Mmunyi mudi nsombelu wa dîku mua kuikala wa ditalala padi muntu kampanda mu nzubu amu muikale ne luonji ne kayi dipunga nende? Bipite mene bubi, mmunyi mudi ditalala ne disanka mua kuikalamu padi bena mu dîku bikale banangi ba masanka pamutu pa kuikala banangi ba Nzambi? Ebi mbimanyinu bidi kudi bantu mu bulongolodi ebu bukokesha kudi Satana. Ki mbualu bua kukema mudi disanka dia dîku dijimine mu matuku aa a ku nshikidilu!
8, 9. Ngikadilu wa bana udi mua kuikala ne tshipeta kayi pa disanka dia dîku?
8 Ne kakuabu kabingila kadi kaleja bua tshinyi mêku mavule mmapangile ditalala ne disanka nngikadilu mubi wa bana. Pakadianjila Paulo kuakula bua nsombelu ya matuku a ku nshikidilu, wakafila mulayi wa se: bana ba bungi bavua mua kuikala bena bupidia kudi baledi. Biwikala muana, ngikadilu webe udi wambuluisha bua kuvuija dîku dienu dia ditalala ne disanka anyi?
9 Bamue bana kabena ne tshilejilu tshimpe mu ngikadilu nansha. Tshilejilu, muana mutekete mukuabu wa balume wakafundila tatuende mukanda eu wa dibungama: “Wewe kuyi muye nanyi ku Alexandrie tshiakukufundila mukanda to, anyi tshiakukuela dîyi, peshi tshiakulayangana nebe nansha, ne wewe muye ku Alexandrie munshiye tshiakukukuata ku tshianza anyi kukuela muoyo kabidi nansha. Etshi ke tshienzeka biwabenga kuya nanyi . . . Kadi ndi nkulomba untumine [lunzenze]. Wewe kuyi mutume, tshiakudia ne tshiakunua kantu nansha kamue. Kayanda kebe!” Abi bidi biumvuika mumue ne nsombelu udiku lelu anyi? Ee, mukanda au wa kudi muana wa balume mutumina tatuende uvua mufundibue mu Ejipitu wa kale kukadi bidimu bipite pa 2 000.
10. Mmunyi mudi bana batekete mua kuambuluisha mêku abu bua kuipatshila ditalala dia Nzambi?
10 Mmuenenu au wa muana mutekete wa mu Ejipitu kakalubuluja ditalala dia dîku nansha. Bushuwa, malu matambe kunyanguka adi enzeka mu mêku mavule mu matuku aa a ku nshikidilu. Pabi, nuenu bana batekete nudi mua kuambuluisha dîku dienu bua kuipatshila ditalala dia Nzambi. Mmushindu kayi? Pa kutumikila mubelu eu wa mu Bible: “Nuenu bana, nutumikile baledi benu mu malu onso, bua bualu ebu budi buanyishibua mu Muk[a]lenge.”—Kolosai 3:20.
11. Mmunyi mudi baledi mua kuambuluisha bana babu bua balue basadidi ba lulamatu ba Yehowa?
11 Mmunyi buenu nuenu baledi? Ne dinanga dionso ambuluishayi bana benu bua balue basadidi ba lulamatu ba Yehowa. Nsumuinu 22:6 udi wamba ne: ‘Yisha muana mu njila udiye ne bua kuendela; nunku pakolaye, kêna umukamu.’ Ne dilongesha dilenga dia mu Mifundu ne bilejilu bimpe bia buledi, bansongalume ne bansongakaji bavule kabena bapambuka mu njila muimpe padibu bakola. Kadi bidi bitamba kulondeshila bulenga ne bualabale bia dilongesha dia mu Bible ne mutshima muine wa muana.
12. Bua tshinyi nzubu wa bena nkristo udi ne bua kuikala wa ditalala?
12 Bikala bena mu dîku dietu bonso bateta bua kuenza disua dia Yehowa, tudi mua kupeta ditalala dia Nzambi. Nzubu wa muena nkristo udi ne bua kuikala mûle ne ‘balunda ba ditalala.’ Luka 10:1-6 (NW) udi uleja ne: Yezu uvua ne bantu ba nunku mu lungenyi pakatumaye bayidi 70 bu ba-ministre ne kubambilaye ne: “Muaba wonso unudi nubuela mu nzubu nuambe kumpala ne: ‘Nzubu eu ikale ne ditalala.’ Ne bikalamu mulunda wa ditalala, ditalala dienu nedikale padiye.” Ne ditalala dionso, padi basadidi ba Yehowa baya ku nzubu ne ku nzubu ne “lumu luimpe lua ditalala,” badi bakeba balunda ba ditalala. (Bienzedi 10:34-36; Efeso 2:13-18) Bushuwa, nzubu wa muena nkristo muenza ne balunda ba ditalala udi ne bua kuikala wa ditalala.
13, 14. (a) Ntshinyi tshiakajinga Naomi bua Luta ne Ôpa? (b) Nzubu wa bena nkristo udi ne bua kuikala tshikishilu tshia mushindu kayi?
13 Nzubu udi ne bua kuikala muaba wa ditalala ne dikisha. Naomi, mukamba mukulakaje, wakatekemena se: Nzambi uvua mua kupesha bakaji bakamba ba bana bende batshivua bansonga, Luta ne Ôpa, dikisha ne busambi bidi bifumina ku dikala ne mulume muimpe ne nzubu. Naomi wakamba ne: ‘Yehowa anuvuije bubidi buenu ditalala mu nzubu ya babayenu.’ (Luta 1:9) Pa bidi bitangila dijinga dia Naomi, mushikuluji mukuabu wakafunda ne: mu nzubu ya nunku Luta ne Ôpa “bavua mua kupeta disulakana ku disumpakana ne ku tunyinganyinga. Bavua mua kupeta ditalala dia mu lungenyi. Uvua mua kuikala muaba uvuabu mua kutudila, muaba uvua nyanji yabu ya kutamba kuengeleka ne majinga matambe kuikala a bunême mua kupetelamu disankishibua ne ditukija. Ngandamuinu mutapuluke wa muaku wa tshiena-Ebelu . . . mmulejibue bilenga kudi muji wa biambilu bisangisha pamue mu [Yeshaya 32:17, 18].”
14 Suaku utangila Yeshaya 32:17, 18. Tudi tubalamu ne: ‘Dimuma didi buakane bukuama nedikale ditalala, malu adi alonda buakane neikale ditalala ne ditekemena tshiendelele. Bantu banyi nebashikame mu miaba ya ditalala, ne mu nzubu idi kayiyi ne njiwu pepi, ne mu bikishilu bia ditalala.’ Nzubu wa bena nkristo udi ne bua kuikala tshikishilu tshia buakane, bupole, bukubi, ne ditalala dia Nzambi. Kadi netuambe tshinyi padi mateta, makokangana, anyi bilumbu bikuabu bijuka? Apu tudi nangananga tukengela bua kumanya nsapi wa disanka mu dîku.
Mêyi-maludiki anayi a mushinga mukole
15. Mmunyi muudi mua kumvuija nsapi wa disanka mu dîku?
15 Dîku dionso pa buloba didi dipetela dîna diadi kudi Yehowa Nzambi, Mufuki wa mêku. (Efeso 3:14, 15) Nenku aba badi bajinga diakalenga dia dîku badi ne bua kukeba bulombodi buende ne kumusamuna, anu bu muakenza mufundi wa misambu: ‘Nuenu ba mu [“mêku,” NW] a bantu, nuambike Yehowa malu ende, nuambike Yehowa butumbi ne bukole.’ (Musambu 96:7) Nsapi wa disanka mu dîku udi mu Dîyi dia Nzambi, Bible, ne mu ditumikila mêyi-maludiki ende. Dîku didi ditumikila mêyi-maludiki aa nedikale ne disanka ne nedipete ditalala dia Nzambi. Pa nanku, tuanjibi kutangila anayi a ku mêyi-maludiki aa a mushinga.
16. Mmudimu kayi udi didikanda ne bua kuikala nawu mu nsombelu wa dîku?
16 Dimue dia ku mêyi-maludiki aa ndishindamene pa bualu ebu: Didikanda didi ne mushinga wa bungi bua ditalala dia Nzambi mu nsombelu wa dîku. Mukalenge Solomo wakamba ne: “Muntu udi kayi mumanye mua kudikanda udi bu musoko wakashimbulabo, udi kauyi ne ngumbu.” (Nsumuinu 25:28) Dikuatshidila lungenyi luetu—dileja didikanda—didi ne mushinga wa bungi bituajinga bua kuikala ne dîku dia ditalala ne disanka. Nansha mutudi bapange bupuangane, bidi bitukengela kuleja didikanda, didi dimuma dia spiritu munsantu wa Nzambi. (Lomo 7:21, 22; Galatia 5:22, 23) Spiritu neapatule didikanda munda muetu bituasambila bua kupeta ngikadilu eu, bituatumikila mibelu ya mu Bible idi iditangila, ne bituadisangisha ne bakuabu badi baleja ngikadilu eu. Njila eu neatuambuluishe bua ‘kunyema masandi.’ (1 Kolinto 6:18) Didikanda nedituambuluishe kabidi bua kubenga tshinyangu, kuepuka anyi kutshimuna bunu bua maluvu, ne kupita ne nsombelu mikole ne bupole buonso.
17, 18. (a) Mmunyi mudi 1 Kolinto 11:3 utumika mu nsombelu wa mu dîku dia bena nkristo? (b) Mmunyi mudi dianyisha bukokeshi dilubuluja ditalala dia Nzambi mu dîku?
17 Tudi mua kuamba nenku bua dîyi-diludiki dikuabu dia mushinga: Dianyisha bumfumu nedituambuluishe bua kuipatshila ditalala dia Nzambi mu mêku etu. Paulo wakafunda ne: ‘Ndi musue nuenu numanye ne: Mutu wa mulume yonso udi Kristo, ne mutu wa mukaji udi mulume, ne mutu wa Kristo udi Nzambi.’ (1 Kolinto 11:3) Ebi bidi biumvuija ne: mulume udi ulombola dîku, kabidi ne: mukajende udi umukuatshisha ne bulamatshi buonso, ne se: bana mbena butumike. (Efeso 5:22-25, 28-33; 6:1-4) Ngikadilu wa nunku nealubuluje ditalala mu nsombelu wa mu dîku.
18 Mulume muena nkristo udi ne bua kuvuluka se: bumfumu buashila pa Mifundu ki mbua tshikokesha-nkaya nansha. Udi ne bua kuidikija Yezu, Mutu wende. Nansha muvuaye ne bua kuikala “mutu wa malu onso,” Yezu ‘kakaluila bua bantu bamukuatshile mudimu, wakaluila bua kubakuatshila mudimu.’ (Efeso 1:22; Matayo 20:28) Bia muomumue, mulume muena nkristo udi ukokesha mu mushindu wa dinanga udi umuambuluisha bua kutabalela bimpe majinga a dîku diende. Ne bushuwa mukaji muena nkristo udi ukengela bua kueleshangana diboko ne bayende. Bu mudiye “muambuluishi” ne “mukumbaji” wende, udi uleja ngikadilu idi bayende kayi nayi ne nenku udi umupesha dikuatshisha didi dikengedibua. (Genese 2:20, NW; Nsumuinu 31:10-31) Ditumika diakanyine ne bumfumu didi diambuluisha balume ne bakaji bua kuenzelangana malu ne kanemu ne didi disaka bana bua kutumikila. Eyowa, dianyisha bumfumu didi dilubuluja ditalala dia Nzambi mu nsombelu wa mu dîku.
19. Bua tshinyi diyukidilangana dimpe didi ne mushinga bua ditalala ne disanka bia dîku?
19 Tudi mua kumvuija dîyi-diludiki disatu dia mushinga mu mêyi aa: Diyukidilangana dimpe didi ne mushinga wa bungi bua ditalala ne disanka bia dîku. Yakobe 1:19 (MMM) udi utuambila ne: “Muntu yonso ikale ne lukasa ku diteleja, ne lujoko ku diakula ne ku difika munda.” Bena mu dîku badi ne bua kutelejangana ne kuakuishangana bualu diyukila mu dîku ndishintakaja dia mêyi. Kadi, nansha padi bitudi tuamba bikale bilelela, bidi pamu’apa mua kutapangana bikole pamutu pa kuenzelangana bimpe patuikala babiambe mu mushindu wa tshikisu, wa lutambishi, anyi udi kauyi wa meji. Ngakuilu wetu udi ne bua kuikala musheme, ‘mutue luepu.’ (Kolosai 4:6) Mêku adi alonda mêyi-maludiki a mu Mifundu ne ayukidishangana bimpe adi ipatshila ditalala dia Nzambi.
20. Bua tshinyi udi mua kuamba ne: dinanga didi ne mushinga bua ditalala dia mu dîku?
20 Dîyi-diludiki dinayi ng’edi: Dinanga didi ne mushinga bua ditalala ne disanka bia dîku. Dinanga dia mulume ne mukaji didi mua kuikala ne mushinga wa bungi mu dibaka, ne disuangana diondoke didi mua kudiunda munkatshi mua bena mu dîku. Kadi, didi ditambe kuikala mene ne mushinga wa bungi, ndinanga dileja mu muaku wa tshiena-Greke a·gaʹpe. Ndinanga ditudi tudima bua Yehowa, bua Yezu, ne bua binetu. (Matayo 22:37-39) Nzambi wakaleja dinanga edi bua bukua-bantu pa kufila “Muanende umuepele mulela bua eu yonso udi uleja ditabuja kudiye kabutudibu kadi apete muoyo wa kashidi.” (Yone 3:16, NW) Mmunyipu mudibi bia dikema bua mutudi mua kuleja dinanga dia muomumue bua bena mu dîku dietu! Dinanga edi ditumbuke didi “tshisuikidi tshipuangane tshia buobumue.” (Kolosai 3:14, NW) Didi disuika bena dibaka pamue ne dibasaka ku dienza tshidi tshitambe buimpe umue bua mukuabu ne bua bana babu. Padi bilumbu bijuka, dinanga didi dibambuluisha bua kujikija bilumbu mu buobumue. Tudi mua kushindika muanda eu bualu “dinanga . . . kadiena dikeba diakalenga diadio . . . didi dilekelangana bionso, ditaba bionso, ditekemena bionso, diumvua bionso ne lutulu. Dinanga kadiena difua.” (1 Bena Korente 13:4-8, MMM) Bushuwa disanka didi kudi mêku adi ne dinanga umue bua mukuabu ne diodi edi ndikolesha kudi dinanga bua Yehowa!
Tungunukayi ne kuipatshila ditalala dia Nzambi
21. Ntshinyi tshidi pamu’apa mua kuvudija ditalala ne disanka bia dîku dienu?
21 Mêyi-maludiki mamana kutela ne makuabu mangatshila mu Bible mmalejibue mu mikanda idi Yehowa mupeteshe mu bulenga buonso ku butuangaji bua “mupika wa lulamatu ne wa budimu.” (Matayo 24:45, NW) Tshilejilu, mamanyisha bu aa adi mu mukanda wa mabeji 192 wa Nsapi wa disanka mu dîku, mupatula mu Mpuilu ya Distrike ya Bantemu ba Yehowa ya “Batuadi ba mukenji wa ditalala dia Nzambi” mienza buloba bujima mu 1996/97. Dilonga dia Mifundu dia pa nkaya ne dia mu dîku ne diambuluisha dia mukanda bu eu didi mua kufila bipeta bimpe bivule. (Yeshaya 48:17, 18) Eyowa, ditumikila mibelu ya mu Mifundu didi pamu’apa mua kuvudija ditalala ne disanka bia dîku dienu.
22. Mmu tshinyi mutudi ne bua kujalamija nsombelu wa dîku dietu?
22 Yehowa udi ne malu a dikema malamina mêku adi enza disua diende, ne mmuakanyine dimusamuna ne dimusadila bietu. (Buakabuluibua 21:1-4) Pa nanku, dîku dienu dijalamije nsombelu wadi mu ntendelelu wa Nzambi umuepele mulelela. Ne Tatu wetu wa dinanga udi mu diulu, Yehowa, anubeneshe ne disanka bu munudi nuipatshila ditalala dia Nzambi mu nsombelu wenu wa mu dîku!
Newandamune munyi?
◻ Ntshinyi tshidi tshilombibue bua mêku kuikalawu ne nsombelu wa bulamate kudi Nzambi?
◻ Bua tshinyi kudi dinyanguka mu dîku lelu’eu?
◻ Ntshinyi tshidi nsapi wa disanka mu dîku?
◻ Ng’amue mêyi-maludiki kayi atuambuluisha bua kulubuluja ditalala ne disanka mu nsombelu wa mu dîku?
[Tshimfuanyi mu dibeji 24]
Diyukidilangana dimpe didi dituambuluisha bua kuipatshila ditalala dia Nzambi mu nsombelu wa mu dîku