Tuambuluishayi Mêku Bua Kudijadikilawu Nsombelu Udi Unenga Mu Matuku Atshilualua
1 “Lukuka lutu lupetesha lupandu,” ke muakambilabu balongi bavua bapete mapolome ku Université kampanda wa mu Amerike kudi mushikuluji kansanga wa malu a bubanji. “Muntu udi mua kuikala ne lukuka kadi udiumvua amu bimpe.” Etshi ntshimanyinu tshia bulongolodi ebu, mudibu baleja budisui bu mushindu wa kujadika nsombelu wa matuku atshilualua. Bishilangane, Yezu wakalongesha ne: muena nkristo udi ne bua ‘kudibenga, bualu kupeta bintu bionso bia buloba bujima kudi kuenzela muntu bualu kayi padiye ujimija muoyo wende?’ (Mt. 16:24-26, MMM) Bua kudijadikila nsombelu udi unenga mu matuku atshilualua, bidi bikengela kutuma nsombelu mujima wa muntu ku dikumbana dia disua dia Nzambi, ke tshidi ne bua kuikala tshipatshila tshia kumpalampala tshia mêku lelu’eu. (Mus. 143:10; 1 Tim. 4:8) Etshi ndungenyi lufila mu nshapita wa ndekelu wa mukanda wa Nsapi wa disanka mu dîku. Mukanda eu mupiamupia udi wambuluisha bantu bua kumonabu tshidi ne mushinga mu nsombelu ne mua kuenza malu mu mushindu muibaki pa bidi bitangila mêku abu. Mu ditungunuka ne kuyisha lumu luimpe miaba yonso, ntshinyi tshitudi mua kuamba bua kukankamija aba batudi tupetangana nabu bua kubalabu mukanda wa Disanka mu dîku? Mona imue mibelu:
2 Ku biibi peshi mu misesu, udi mua kuteta kutuadija diyukidilangana ku diambuluisha dia trakte wa “Nsombelu wa disanka mu dîku.” Udi mua kuebeja nunku:
◼ “Nsombelu wa buena-lelu udi mpokolo wa tunyinganyinga tuvule, kadi udiku wela meji ne: kudi mushindu wa kuikala ne nsombelu wa disanka mu dîku nansha mudiku bionso ebi anyi? [Lekela muntu andamune.] Trakte eu udi utujadikila ne: bidi nanku. Udiku wanyisha bua kumubala anyi?” Bitaba muntu, udi mua kutungunuka nunku: “Bu mudi tshiena-bualu etshi tshikusankisha, pamu’apa newanyishe kabidi mukanda eu mudiwu ufila mibelu mijalame pa mushindu wa kupeta disanka mu dîku.” Leja tshikebelu tshia mukanda wa Disanka mu dîku. Zangika imue nshapita idi ne biena-bualu bidi bikoka ntema. Bulula mukanda mu dibeji 10 ne bala tshiambilu tshia ndekelu tshia tshikoso 17 pamue ne tshikoso 18 mu ka-bujima kabi. Fila mukanda pa kumanyisha difila dia pa tshibidilu. Umvuija muntu se: newikale mua kuyukila nende bia bungi pa bualu ebu ne muebeje tshikondo tshiakanyine tshia kumonangana nende kabidi.
3 Udi mua kutungunuja diyukidilangana dia musangu mushale pa nsombelu wa disanka mu dîku pa kuamba bidi bilonda ebi:
◼ “Ndi njinga kukoka ntema yebe pa lungenyi kampanda ludi mu mukanda umvua mukushile; ndi ngela meji se: nelukusankishe. Nshapita wa ndekelu udi wakula bua nsapi wa disanka mu dîku. [Bala tshikoso 2 tshia mu dibeji 183.] Bambisha ne: nsapi wa disanka nditumika popamue ku dikumbana dia disua dia Nzambi. Tudi tulomba bantu bua balonge Bible mu dîku bua kumanya disua dia Nzambi ne kuditumikila mu dîku. Tutu tulomba bantu bua dilonga dia Bible kadiyi difidila mfranga dienza anu ngondo mikese. Wewe mua kuanyisha, nenkuleje mutubi bienzeka.” Walukile ne broshire wa Ntshinyi tshidi Nzambi utulomba? peshi mukanda wa Dimanya, pa kusungula tshidi tshitambe kuakanyina.
4 Binuayukidilangana ne balongi nebe mu kalasa peshi ne bansonga mu teritware, newikale mua kujula lukonko elu:
◼ “Dilama diyukidilangana pankatshi pa baledi ne bana babu didi ne mushinga kayi? [Lekela muntu andamune.] Mona tshidi mukanda eu wamba pa ‘diyukidilangana diunzuluke ne dia muoyo umue.’ [Bala tshikoso 4 mu ka-bujima katshi ne tshiambilu tshia kumpala tshia tshikoso 5 mu dibeji 65 dia mukanda wa Disanka mu dîku.] Bikoso bidi bilonda ebi bidi bifila mibelu mikuatshishi pa mushindu wa kuakaja diyukidilangana mu dîku. Mukanda eu udi ne tshiena-bualu: Nsapi wa disanka mu dîku. Biwajinga kupeta mukanda eu ne kuubala bushuwa, ndi mua kukushilawu, ku dipa dikese dia . . . .” Umvuija mukuyukidishi se: newanyishe kumonangana nende bua kumanya mmuenenu wende pa bikalaye mubale.
5 Newikale mua kuibaka pa tshishimikidi tshia diyuki dienu dia kumpala ne nsonga kampanda pa diyukidilangana pankatshi pa baledi ne bana pa kuamba nunku:
◼ “Ndi muanyishe muudi muangate ne mushinga diyukidilangana mu dîku. Buebe wewe, ntshiena-bualu kayi tshia mushinga mukole tshidi baledi ne bana mua kuyukidilanganapu?” Lekela muntu andamune. Pashishe bulula mukanda wa Disanka mu dîku mu dibeji 68 ne bala diandamuna difila mu tshitupa tshia kumpala tshia tshikoso 11. “Mushindu mutambe buimpe wa kupeta dimanya dia Nzambi ng’wa kulonga Bible lumingu luonso.” Fila broshire wa Ntshinyi tshidi Nzambi utulomba? Umvuija ne: malongesha 16 adimu adi aleja malu manene a bidi mu Bible. Bala mêyi a mbangilu adi mu dibeji 2 ne konkononayi ne muntu dilongesha dia kumpala.
6 Ku tshiibi ne ku tshiibi, pamu’apa mu tulasa anyi mu tshisalu, biwapetangana ne tatu wa dîku kampanda anyi mamu, newikale mua kusonsola dijinga diende dia kumanya bia bungi pa kuamba ne:
◼ “Ndi mushindike se: udi witaba pamue nanyi bua kuamba ne: bidi lutatu lua bungi lelu’eu bua kukolesha bana. Buebe wewe, ntshinyi tshidi mua kukuba dîku diebe ku buenzeji bubi? [Lekela muntu andamune.] Mona mibelu ya meji indi meme muine muanyishe.” Koka ntema pa tshilejilu tshifila mu dibeji 90 dia mukanda wa Disanka mu dîku, mu tshikoso 1, ne bala tshikoso 2. Leja mudi mibelu ya nkatshinkatshi mifila mu mukanda eu mikale ikuatshisha bua kukuba mêku ku buenzeji bubi. Ulombe muntu bua kumushila mukanda eu ne bua kumonangana nende kabidi bua kuandamuna ku nkonko ikalaye mua kujula.
7 Paudi walukila bua kutangila tatu peshi mamu wa dîku uvua muangate mukanda wa “Disanka mu dîku,” udi mua kutungunuja diyukidilangana mushindu eu:
◼ “Musangu mushale utuvua bamonangane, ngakabambisha ne: udi bushuwa uditatshisha bua bana bebe ne udi musue kuenza muebe muonso bua kubakuba ku buenzeji bubi. Pamu’apa kuena muanji kubala mukanda umvua mukushile, kadi udi ne bualu budi butamba kusankisha bundi njinga kukumanyisha. [Bala tshikoso 19 tshia mu dibeji 59.] Bua kushemeja malanda ne Nzambi, bidi bitukengela kulonga mua kumumanya ku diambuluisha dia Dîyi diende difunda, Bible. Newanyishe bua nkuleje mututu tulonga Bible mu dîku anyi?”
8 Mu bulongolodi ebu, bafidi ba mibelu kabena mua kuleja mêku njila wa disanka; mbafuane kuelangana mâyi ku makasa. Tumuangalajayi mu mushindu mualabale mukanda wa Disanka mu dîku, bua Dîyi dia Nzambi diambuluishe bantu ba mishindu yonso bua kudijadikila nsombelu udi unenga mu matuku atshilualua.—1 Tim. 6:19.