Netuwenze kabidi anyi?—Dibikila dikuabu bua bampanda-njila bambuluishi—Tshitupa 2
Dimanyisha: Tuvua bakonkonone tshitupa tshia kumpala mu nimero wa Tshisanga 1998. Dilonda ndiodi edi:
12 Mutangidi wa mudimu neikale ne bua kuyukila ne muanetu udi wabanya teritware bua kuangata mapangadika bua ditumika mu teritware itubu kabayi bajikija pa tshibidilu. Nebatambe kutuma ntema ku badi kabayi kumbelu ne ku bumanyishi bua mu misesu ne ku magazen ne magazen. Badi mua kuela kashonyi pa bumanyishi bua ku dilolo. Badi ne bua kulombesha bibejibeji bungi bukumbane bua Lumungulu ne Kabalashipu bua kudianjila kuela meji ku mudimu muvule.
13 Bamanyishi bavule badi mua kuwenza: Tshiambilu tshia kumpala mu dibeji dia dilomba bumpanda-njila buambuluishi tshidi tshiamba ne: “Bua dinanga dianyi bua Yehowa ne dijinga dianyi dia kuambuluisha bakuabu bua balonge pa bidi bimutangila ne malongolola ende a dinanga, ndi musue kuvudija didifila dianyi mu mudimu wa budimi pa kutumika bu mpanda-njila muambuluishi.” Kunanga Yehowa ne kusua bua kuambuluisha bakuabu mu nyuma ke nshindamenu wa diditshipa dietu. (1 Tim. 4:8, 10) Bua muntu kuikalaye mpanda-njila muambuluishi, udi ne bua kuikala mutambule, kuikala ne bikadilu bimpe, ne kuikala ne mushindu wa kupitshisha mêba 60 mu buambi munkatshi mua ngondo. Patudi buonso buetu tukonkonona nsombelu wetu bamue ba kutudi batu kabayi banji kuenza bumpanda-njila badiku mua kubuenza tshidimu etshi mu Lumungulu peshi Kabalashipu anyi?
14 Bavule mu bisumbu badi mua kufika ku dimona se: badi pabu mua kuenza bumpanda-njila padibu bamona bakuabu badi ne nsombelu mufuane wabu baditua mu mudimu eu. Balongi ba tulasa, bakulakaje, bena mudimu wa ku mubidi wa ku dîba ne ku dîba, pamue ne bakulu ne basadidi ba mudimu, ne bakuabu mbapatule bipeta bimpe mu bumpanda-njila buambuluishi. Mamu kampanda wa nzubu uvua ne bana babidi ne muikale ne mudimu wa ku mubidi wa ku dîba ne ku dîba wakakumbaja mêba 60, kushiya bibejibeji 108, ne kutuadija malonga a Bible 3 mu ngondo umuepele wakenzaye bumpanda-njila buambuluishi. Mmunyi muakenzaye nanku? Uvua upatuka mu dîba dia diikisha ku mudimu ne uyisha mu teritware wa pabuipi, wakafila bumanyishi ku mikanda mifunda, mu bimanyikidi bia mashinyi ne mu misesu. Uvua kabidi utumika bimpe ne dituku diende dia diikisha lumingu luonso pa kuenza mudimu pamue ne tshisumbu mu budimi. Nansha muvuaye wela meji kumpala ne: bumpanda-njila buambuluishi ntshipatshila tshikole bua kufikaku, ne makankamija a kudi bakuabu ne ndongamu muakanyine, wakatshimuna bipumbishi.
15 Yezu wakajadikila bayidi bende ne: “Tshikokedi tshianyi ntshinefuke ne bujitu buanyi mbupepele.” (Mat. 11:30, NW) Etshi tshivua tshiena-bualu tshikankamiji tshia mu Tshibumba tshia Nsentedi tshia dia 15 Tshimungu 1995. Tshidi tshilonda bualu bua muanetu wa bakaji uvua mufimpakaja bikole kudi mudimu wende wa ku mubidi wa ku dîba ne ku dîba. Wakela meji ne: bumpanda-njila buambuluishi kabuvua bumutangila yeye anyi? Tòo. Kadi, wakadiakaja bua kuenza mudimu eu ngondo yonso. Bua tshinyi? Bualu wakamona se: dienza bumpanda-njila divua dimuambuluisha bua kulama nkatshinkatshi wende. Diambuluisha bantu padibu balonga bulelela bua mu Bible ne dibamona bashintulula nsombelu wabu bua kuanyishibua kudi Nzambi bivua mpokolo mutambe bunene wa disanka mu nsombelu wende mûle tente ne midimu.—Nsu. 10:22.
16 Didipangisha amue masanka ne didiakaja bidi muntu ne bua kuenza bua kuikala mpanda-njila mbifuta bikole kudi mabenesha adiye upeta. Muanetu wa bakaji kampanda wakafunda bua bualu buende bumona mu bumpanda-njila buambuluishi ne: “Biakangambuluisha bua kubenga kutuma lungenyi anu ku masanka anyi ne kutamba kutabalela diambuluisha bakuabu. . . . Ndi ndomba badi mua kuwenza bua bawenze.”
17 Bidi bikengela ndongamu muimpe: Mu dibeji 7 dia Mudimu wetu wa Bukalenge wa Tshisanga 1998, tudi balejemu ndongamu ya tshilejilu yakapatuka mu Mudimu wetu wa Bukalenge wa Luabanya 1997. Pamu’apa umue wa ku yoyi eyi udi wakanangana ne nsombelu webe. Mu diyikonkonona, ela meji ku midimu yebe ya buatshiabuatshia ya mu ngondo. Mmidimu kayi ya mu nzubu iudi mua kudianjila kukumbaja bangabanga ne kutuadija bumpanda-njila anyi iudi mua kuanji kuteka ku luseke too kunyima kua mudimu webe? Udiku mua kuangata amue mêba ku autu upitshisha mu dijikija lutetuku, mu manaya, peshi mu mishindu mikuabu ya didiolola anyi? Pamutu pa kutangila anu ku mêba masangisha 60 adi malombibue, akaja ndongamu webe bua ditumika dia ku dituku anyi dia ku lumingu. Mêba anu 2 ku dituku anyi 15 ku lumingu ke adi malombibue bua mpanda-njila muambuluishi. Tangila ndongamu wa tshilejilu, ne katshi kebe ku tshianza, udi mua kulonga mushindu uudi mua kukumbaja mêba bilondeshile ndongamu webe nkayebe wa mudimu udi mukuakanyine bimpe wewe ne dîku diebe.
18 Ngandamuinu mulenga ne dikuatshisha dia pa buadi diakaleja tshisumbu mu mudimu mu Tshisanga tshidimu tshishale biakakolesha musangelu wa mpanda-njila wa pa tshibidilu kampanda wakafunda ne: “Tuasakidilayi wa bungi bua dikankamija dienu dia dinanga dia kuenza madikolela a pa mutu bua kukuatshisha bumpanda-njila buambuluishi. . . . Ndongamu yenu mifila yakambuluisha ba bungi bavua kabayi banji kuenza bumpanda-njila bua kumona se: bavua mua kubuenza. . . . Ndi ne disanka dia bungi dia kuikala mu bulongolodi bua Yehowa ne kulonda bulombodi bua dinanga bua mupika wa lulamatu ne wa budimu.”
19 Nsumuinu 21:5 (Mukanda wa Mvidi Mukulu), udi utujadikila ne: “Malu adi muntu wa tshisumi ujinga kuenza adi akumbana.” Nsumuinu 16:3 udi utukankamija ne: ‘Teka mudimu webe mu bianza bia Yehowa, ne malu awapangadija nealubuluke.’ Eyowa, pa kushila Yehowa muaba mu dipangadika dietu ne kueyemena bikole kudiye bua atuambuluishe bua tukumbaje mudimu, tudi mua kupeta mmuenenu muimpe pa bidi bitangila mapangadika etu bua kuenza bumpanda-njila buambuluishi. Bidi mua kuenzeka ne: panyima pa dimona bipeta bimpe bipatula ku diambuluisha dia ndongamu wetu wa mudimu bua ngondo umue anyi ibidi ya bumpanda-njila buambuluishi, tuikale mua kufunda mu kazubu kadi pa dilomba dia bampanda-njila kadi kamba ne: “Funda kamanyinu muaba eu biwikala ujinga kusadila mu mushindu mutungunuke bu mpanda-njila muambuluishi too ne ku tshikondo tshikena tshijadika.” Mu mishindu yonso, tudi mua kutangila kumpala bua kuenza kabidi bumpanda-njila buambuluishi mu Tshimungu, muikala matuku a ndekelu wa lumingu misangu itanu. Bu mutudi tujikija tshidimu tshia mudimu mu Tshimungu, bonso netuenze madikolela mu buobumue bua muntu yonso adifile tshishiki mu mudimu.
20 Yezu wakadianjila kumanyisha ne: “Muntu udi ungitaba, neenze pende malu andi meme ngenza aa. Neenze too ne mapite bunene.” (Yone 14:12, MMM) Mmuabi wetu wa disanka bua kusadila bu benzejanganyi ba mudimu ne Nzambi padi mulayi eu wenda upeta dikumbana diawu dinene. Mpindieu ntshikondo tshia kumanyisha lumu luimpe ne bukole buonso bua katshia ne katshia, mu didisumbila tshikondo tshiakanyine bua kuenza mudimu eu. (1 Kol. 3:9; Kolos. 4:5) Dienza mudimu wa bumpanda-njila buambuluishi misangu mivule itudi mua kukokesha mmushindu mutambe buimpe wa kuenza tshietu tshitupa bu bamanyishi ba Bukalenge. Tudi tuindila ne muoyo kulukulu bua kumona mushindu wikala musambu wa disamuna nawu mu tshikondo etshi ufumina kudi bampanda-njila bambuluishi. (Mus. 27:6) Mu diela meji ku bipeta bia mu Tshisanga tshidimu tshishale, tudi tudiebeja ne: ‘Netuwenze kabidi anyi?’ Tudi ne dieyemena dia se: netuwenze!
[Kazubu mu dibeji 3]
Udi mua kuenza bumpanda-njila buambuluishi anyi?
“Nansha biwikala mu nsombelu wa mushindu kayi, biwikala mutambule, ne muikale ne ngikadilu muimpe, ne mudilongolole bua kuenza mêba 60 ku ngondo mu mudimu wa buambi ne mudilongolole bua kuenza mudimu wa bumpanda-njila munkatshi mua ngondo umue nansha ya bungi, bakulu ba tshisumbu tshienu nebasanke bua kuanyisha dilomba diebe bua wewe kuenza mudimu eu.”—Badilongolole bua kuenza mudimu wetu bimpe, dibeji 114.