Kudi dijinga dia malonga a Bible mavule

¹ Yehowa Nzambi udi ubenesha bulongolodi buende budi pa buloba ne didiunda ditungunuke. Tshidimu tshia mudimu tshishale, bua buloba bujima, bantu 375 923 bavua batambule​—muayene wa bayidi bapiabapia bapite pa 1 000 ku dituku, anyi 43 ku dîba dionso! Nansha muvua bana betu mua kuikala bapete ntatu mu makumi mavule a bidimu bipite ebi, mu bitupa bishilashilangane bia buloba, mudimu wa Bukalenge udi ulubuluka ne didiunda dinene ndimueneke. Bidi bisankisha bushuwa bua kubala malu adi atangila diya kumpala didi dimueneka mu dimuangalaja dia lumu luimpe!

² Tshidimu tshia mudimu tshishale mu Burundi, Congo-Brazzaville ne Congo-Kinshasa, tuvua petu bapete didiunda mu muayene wa bampanda-njila bambuluishi, wa mikanda, broshire ne bibejibeji bifila. Kuvua bungi bubandile bua katshia ne katshia bua babuedi mu Tshivulukilu. Netuambe tshinyi bua mudimu wa makumbulula ne malonga a Bible? Kuvua dipueka mu bungi busangisha bua malonga a Bible dia bia pa lukama 4 mu Burundi ne 10 mu Congo-Brazzaville, kadi kuvua didiunda dia bia pa lukama 14 mu Congo-Kinshasa. Malonga a Bible adi ne mushinga mukole bua kuenza bayidi. Apo, ntshinyi tshidi yonso wa kutudi mua kuenza bua kujula ne kutshimuna dipueka edi mu malonga a Bible?

³ Kolesha dijinga dia kulombola dilonga: Tudi tukengela kushindamena tuetu bine pa dikala ne bukole bua mu nyuma ne bazanzamuke. Balondi balelela ba Yezu badi ne “lukunukunu lua kuenza midimu mimpe.” (Tito 2:14) Patudi tukonkonona mudimu wetu, tudi mua kuamba ne: tudi ne dijinga dikole dia kulondakaja mikanda yonso mishila bantu mu budimi anyi? Tudi ne musangelu wa kulomba bonso badi baleja dijinga dia kumanya bivule bua dilonga dia Bible anyi? (Lomo 12:11) Peshi tudi tukengela kudima dijinga dikole dia kuenza makumbulula ne kutuadija malonga a Bible?

⁴ Dibala dia Bible dia muntu nkayende, dibuela pa tshibidilu mu bisangilu, ne dilonga dia mikanda nebitulame ne makanda a mu nyuma ne bikale kabidi ne bukole bua spiritu wa Nzambi. (Ef. 3:16-19) Ebi nebikoleshe ditabuja dietu ne dieyemena kudi Yehowa ne dinanga dietu bua bantu netu. Nebitusake bua kulongesha bakuabu bulelela, ne kuvuija nunku mudimu wetu muikale usankisha, ulubuluka, ne usonsola. Eyowa, tudi ne bua kuikala ne dijinga dia malonga a Bible mavule!

⁵ Longa kumpala ne dîku: Baledi bena nkristo badi ne bana kumbelu badi ne bua kutabalela ndongamu wabu wa dilonga dia Bible dia mu dîku pa tshibidilu. (Dut. 31:12; Mus. 148:12, 13; Nsu. 22:6) Nebikale ne diambuluisha dinene bua baledi kulonga ne bana babu broshire wa Utulomba ne pashishe mukanda wa Dimanya bua kubakaja ku dikala bakumbane bu bamanyishi bakena batambule ne bua didilambula ne batismo. Bushuwa, kudi malu makuabu a pa mutu a kutabalela, bilondeshile bidi muana ukengela ne bidimu biende. Muledi udi ulonga ne bana bende badi kabayi banji kutambula udi mua kubala dilonga dimue, dîba dimue, ne dikumbulula dimue lumingu luonso, bu mudibi bileja mu Mudimu wetu wa Bukalenge wa Kasuamansense 1987 mu “Mandamuna ku nkonko yenu.”

⁶ Akaja ngenzelu webe wa mudimu: Pa kutangila bungi bua bibejibeji bifila, broshire, ne mikanda, kakuena mpata bua ne: mamiinu mapite bungi mmamiamina. Mamiinu aa a bulelela makuna adi ne bukole bua dikema bua kupatula bayidi bapiabapia. Kadi tshidime udi mua kusanka bushuwa anu bua dikuna ditungunuke ne, panyima pa madikolela ende onso, kayi wangataku dîba dia kunowa anyi? Nansha kakese. Bia muomumue, mudimu wa dilondakaja udi ne mushinga.

⁷ Utuku udilongoluela pa tshibidilu dîba bua kuenza makumbulula anyi? Alukila lukasa bua kukumbula muntu yonso udi muleje dijinga dia kumanya bivule. Enza makumbulula ne tshipatshila tshia kutuadija dilonga dia Bible. Utu ulama note yebe ya makumbulula kayiyi mibuelakane, miakanyine tshikondo, ne miakaja bimpe anyi? Mumane kuangata dîna dia muntu ne adrese wende, uvuluke bua kufunda dituku dia dimonangana dia kumpala, tshia dibala kayi tshionso tshimushila, malu mayukila mu tshikoso, ne binuikala mua kuyukila mu dimonangana dialonda. Shiya muaba pa dibeji diebe difundila bua mamanyisha makuabu a disakidila panyima pa dikumbulula dionso.

⁸ Konkonona mushindu wa kuenza dikumbulula: Ng’amue malu kayi a kulama mu lungenyi paudi uya kakumbulula muntu udi muleje dijinga dia kumanya bivule? (1) Ikala ne luya, ne bulunda, ne musangelu, ne ngakuilu mupepele. (2) Yukilayi pa biena-bualu anyi nkonko idi ikoka ntema yende. (3) Lama diyuki dipepele ne dishindamene pa Mifundu. (4) Mu dikumbula dionso, udienzeje bua kulongesha muntu bualu buamonaye se: budi ne mushinga buende yeye muine. (5) Dianjila kujula dijinga bua tshiena-bualu tshia dikonkonona mu dikumbula dialonda. (6) Kuangatshi dîba dia bungi. (7) Kuedi nkonko idi itondesha muntu anyi imutatshisha. (8) Tumika ne busunguluji bua kubenga kupisha mmuenenu mibi anyi bibidilu bibi bia muena nzubu bangabanga ne kudimaye dianyisha bua malu a mu nyuma.​—Tangila tshisakidila tshia Mudimu wetu wa Bukalenge wa Tshisanga 1997 bua diambuluisha dia pa mutu pa mushindu wa kupatula bipeta mu dienza makumbulula ne dituadija malonga a Bible.

⁹ Kebulula mpunga yonso: Mu tshisumbu kampanda, kuvua mushindu wa kupeta mêna ne nimero ya bafutshidi ba nzubu munene uvua ne bukubi bukole. Muntu ne muntu ku nzubu au wakapeta mukanda mumufundila ne trakte ibidi mimuelelamu. Ku ndekelu kua mukanda bavua balombe muntu bua kulonga Bible ne bamufundile nimero wa telefone wa muaba au bua kumonaye mua kuela nshinga ne kuandamuna. Kunyima kua matuku makese, nsongalume kampanda wakela nshinga ulomba dilonga. Dikumbulula diakenjibua dituku divua dilonda, ne bakatuadija dilonga nende mu mukanda wa Dimanya. Dine dilolo adi wakabuela mu Dilonga dia Mukanda dia Tshisumbu, ne wakatungunuka ne dibuela mu bisangilu bionso. Diakamue apu, wakatuadija dibala dia Bible ku dituku dionso ne wakenza dilubuluka disumisha mutangile ku batismo.

¹⁰ Bamanyishi bavua tshisumbu mu mashinyi kampanda bakumvuangana bua kuenza pamue amue makumbulula. Pavua muanetu wa bakaji mukuabu muye mu dimue dia ku makumbulula ende, kakasangana muntu uvuaye muyile, kadi mukaji mukuabu wakandamuna ku tshiibi, wamba ne: “Mvua mukuindile.” Mukaji eu uvua mupete mukanda wa Dimanya kukavua matuku kudi muntu mumanyangana nende. Pakalua bana betu aba kukokola ku tshiibi tshiende, ukavua mubale mukanda mujima misangu ibidi ne uvua ne disanka dia bungi bua mamanyisha avuaye mupetemu. Wakamba ne: kabivua bimukemesha bua kumona Bantemu balua kumukumbula dituku adi bualu uvua muikale usambila bua balue ne balonge nende Bible. Dilonga diakatuadija, wakabanga kubuela mu bisangilu, ne wakenza dilubuluka dia lukasa.

¹¹ Muanetu wa bakaji, uvua mutambule kukadi bidimu 25, wakapesha mamuende mukanda wa Dimanya matuku aa. Mamuende, uvua muena mu tshitendelelu tshikuabu, wakatuadija dibala mukanda. Pakajikijaye kubala nshapita ibidi, wakabikila muanende wa bakaji eu, ne yeye wakakema pa kuteleja mamuende wamba ne: “Ndi musue kulua umue wa ku Bantemu ba Yehowa!” Mamu eu wakatuadija kulonga ne ukadi mpindieu mutambule.

¹² Teta ngenyi-mifila eyi: Ukadiku mutete dileja dia buludiludi bua dituadija malonga anyi? Udi mua kuamba anu patupu ne: “Biwanyisha bua kuikala ne dilonga dia Bible dia ku nzubu, kakuyi difuta mfranga, ndi mua kukuleja anu mu minute mikese mushindu utudi dienzeka. Bikaladi dikusankishe, udi mua kutungunuka.” Bantu ba bungi kabatu belakana bua kuitaba dilomba dia nunku, ne badi bitaba ku budisuile bua kumona mutu dilonga dia Bible dienzeka.

¹³ Mu matuku a ntuadijilu a dilonga, uleje mulongi mushindu wa kudianjila kudilongolola pa kubala mvese mitela ne kuela kashonyi muinshi mua miaku idi mikale diandamuna ku nkonko ya mu mukanda. Shindamena anu pa malu manene. Nansha bikale bitukengela kuikala bajoboke bua misangu ya kumpala itudi tupetangana, bidi ne mushinga bua dilonga dia Bible dikale dienzeka pa tshibidilu. Lama mu lungenyi mushindu uwabueja disambila mu dilonga bu mudidi tshitupa tshia mushinga tshiadi ne mushindu uwakaja mulongi ku buluishi ku diambuluisha dia Mifundu. Mu mishindu yonso, uvuije dilonga dia musangelu!

¹⁴ Bushuwa, balongi bonso ba Bible kabatu balubuluka mushindu wa muomumue. Bamue kabena batambe kudiina mu malu a mu nyuma bu bakuabu anyi kabena ne lumvu lua lukasa bua kukuata malu malongesha. Bakuabu badi ne nsombelu mûle tente ne malu ne badi mua kupanga kulama dîba didi dikengela bua kujikija nshapita mujima lumingu luonso. Nunku, mu nsombelu mikuabu bidi mua kukengela kulonga misangu mipite pa umue bua kujikija imue nshapita ne kuenza ngondo ya pa mutu bua kujikija mukanda. Imue misangu tudi mua kulonga kumpala broshire wa Utulomba ne pashishe kutungunuka ne mukanda wa Dimanya. Ebi, bisakidila ku dibuela diabu mu bisangilu bia tshisumbu, nebiambuluishe balongi bonso bua kushindama bikole mu bulelela.

¹⁵ Kupita bionso ebi, sambila bua kupeta dilonga dia Bible! (1 Yone 3:22) Bumue bua ku malu mamonamona adi atamba kupetesha muena nkristo difutu mmudi Yehowa utumika netu bua kuambuluisha muntu bua kuluaye muyidi wa Yezu Kristo. (Bien. 20:35; 1 Kol. 3:6-9; 1 Tes. 2:8) Mpindieu ntshikondo tshia kuleja lukunukunu luvule mu mudimu wa malonga a Bible, bikale ne dieyemena dikole bua mabenesha mavule a Yehowa pa madikolela etu bua kutuadija malonga mavule!

[Lungenyi lunene lua mu dibeji 5]

Utu usambila bua kutuadija dilonga dia Bible dipiadipia anyi?