Tupetayi Dikima Bua Kuenza Makumbulula

¹ Utu munange bua kuenza makumbulula anyi? Ke tshitu bamanyishi bavule benza. Pamu’apa uvua ne buôwa ku ntuadijilu, nangananga pauvua walukila bua kutangila bantu bavua kabayi batambe kuleja disankidila dia bulelela mu dipetangana dia kumpala. Kadi muudi ‘upeta dikima ku butuangaji bua Nzambi wetu bua kuakula bua lumu luimpe’ pa kuenza makumbulula, udi mukemeshibue bua kumona muvua mudimu eu mua kuikala mupepele ne ufila bia bungi. (1 Tes. 2:​2, NW) Mmunyi mutudi mua kufika ku dienza nanku?

² Bushuwa, dikumbulula ndishilangane bikole ne dimonangana dia kumpala. Mu dikumbulula tudi tuyukila ne muntu mumanya, ki mmuenyi to, ne pa tshibidilu bitu bitambe kupepela bua kuyukila ne muntu utukavua bamone. Bidi bipetesha masanka mavule pa kudifila mu mudimu eu: makumbulula adi mua kufikisha ku malonga a Bible adi alubuluka.

³ Patutu tuyisha ku nzubu ne ku nzubu, tutu tumonangana pa tshibidilu ne bantu bavua kabayi basankidile mukenji mu dipita dietu dia matuku mashale. Nunku bua tshinyi tutu amu tutungunuka ne diya kubatangila? Tudi bamanye se: nsombelu wa bantu utu ushintuluka ne bitu bienzeka ne: muntu uvua umueneka muikale ne kalèngù, pamu’apa ubenga mukenji, aleje disankidila musangu udi ulonda. Bamanye nanku, tudilongololayi bimpe ne tusambilayi bua kupeta bulombodi bua Yehowa bua bantu kuteyabu matshi ku bituamba.

⁴ Bituikala badiakaje bua kuyisha bantu bavua bangabanga kabayi baleje disankidila nansha dikese mu mudimu wa ku nzubu ne ku nzubu, katuenaku ne kabingila kakole ka kuanyisha bua kulua kutangilula aba bonso bavua bateye ntema ku mukenji wa Bukalenge anyi?​—⁠Bien. 10:34, 35.    

⁵ Bavule ba kutudi badi lelu’eu mu bulelela bualu mumanyishi kampanda wakabakumbula ne lutulu luonso misangu ne misangu. Bikalabi nanku, tudiebeje ne: ‘mmuenenu kayi ungakaleja mumanyishi eu bua musangu wa kumpala? Ngakanyisha mukenji wa Bukalenge diakamue pangakauteleja anyi? Mvua mudileje ne kalèngù anyi? Tuvua ne bua kuikala ne disanka muvua mumanyishi wakalukila bua kututangila mutumone se: tuvua bakanyine dikumbulula, muikale ‘mupete dikima ku butuangaji bua . . . Nzambi,’ mulue kumbelu kuetu ne mutuadije kutulongesha bulelela. Tudi mua kuamba tshinyi bua badi baleja disankidila kampanda ku ntuadijilu kadi bamueneka pashishe basue kutuepuka? Bidi ne mushinga bua tuikale ne mmuenenu muimpe wa malu, bu mudibi bileja mu bualu bumona budi bulonda ebu.

⁶ Ne dinda dionso, bamanyishi bakaji babidi bavua bafila bumanyishi mu musesu e kusambakenabu ne mukaji kampanda nsonga muikale wendesha ka-ditempu. Wakangata tshibejibeji ne kubikidishaye bana betu ba bakaji aba kumbelu kuende mu Dia lumingu diakalonda. Bakafika pa dîba diumvuangana, kadi mamu muena nzubu kubambilaye ne: kavua ne dîba dia kuyukila nabu. Apu, wakalaya bua kudiakaja lumingu luvua lulonda. Bana betu ba bakaji kabavua batuishibue se: neanemeke diumvuangana edi, kadi pakalukilabu bakasangana mukaji eu mubindile. Dilonga diakatuadija, ne dilubuluka dia mukaji eu diakabakemesha. Kakanenga bua kubuela mu bisangilu pa tshibidilu ne bua kuditua mu buambi. Ukadi mpindieu mutambule.     

⁷ Tuasayi tshishimikidi anu ku diyukidilangana dia kumpala: Misangu mivule, batu basa tshishimikidi tshia dikumbulula dienza biakane mu diyukidilangana dia kumpala. Tutelejayi ne ntema mutuyukidishi. Ntshinyi tshidiye wamba? Udiku ne dinyikibua ku malu a Nzambi anyi? Udiku utabalela malu a mu nsombelu wa bantu anyi? A sianse? A miyuki ya bantu? A nyunguluilu anyi? Ku ndekelu kua diyukidilangana, tudi mua kujula lukonko ludi lunanyisha lungenyi ne kulaya muntu bua kuakula bua diandamuna didi Bible ufila.

⁸ Tshilejilu, bikala mutuyukidishi muikale usankidila dilaya dia mu Bible dia Mparadizu wa pa buloba, diyukidilangana dikuabu pa tshiena-bualu etshi didi mua kuikala diakanyine. Kumpala kua kuya, tudi mua kuebeja ne: “Mmunyi mutudi mua kujadika ne: Nzambi neakumbaje dilaya diende?” Pashishe kusakidila ne: “Pamu’apa nengikale mua kualukila pikala dîku dijima popu ne kunuleja diandamuna didi Bible ufila.”

⁹ Bikala muntu kayi muleje dianyisha bua tshiena-bualu kampanda, tudi mua kujula lumue lua ku nkonko mipeta mu eyi ya mu dibeji dia ndekelu dia Mudimu wetu wa Bukalenge ne kutumika nayi bu nshindamenu wa diyukidilangana dietu dialonda.

¹⁰ Tuangatayi note mijalame: Note yetu ya ku nzubu ne ku nzubu idi ne bua kuikala mijalame ne mikale ne malu onso. Tufunde dîna ne adrese bia mutuyukidishi anu patudi tushiyangana nende. Katufundi ku ditshinka patupu nimero ya nzubu ne dîna dia musesu: tukomonone se: mamanyisha aa mmalelela. Tufunde bimue bimanyinu bia muntu, tshiena-bualu tshituvua bayukidilanganepu, mvese ituvua babale, mikanda ituvua pamu’apa bashiye ne nkonko ituandamuna mu dikumbula dietu dialonda. Tufunde kabidi dituku ne dîba dia diyukidilangana dietu ne tshikondo tshitudi balongolole bua kualukila. Bu mudi mpindieu fishi mûle ne malu, katumujimiji! Tumuteke pa muaba utudi bajadike se: netumupete. Tuele meji kudi muntu eu ne ku mushindu utuikala mua kuyukila nende musangu udi ulonda.

¹¹ Katupu muoyo tshipatshila tshietu: Tshia kumpala, pa kuikala ne luya ne bulunda, tuenze muetu muonso bua mutuyukidishi adiumvue mudilekelele. Tuleje ne: tudi tumutabalela bu muntu yonso, katutambi kueleshangana nende bilele. Pashishe, tumuvuluije nkonko ituvua bajule musangu mushale. Tuteleje ne ntema yonso mmuenenu wende ne tumuele tuasakidila ne muoyo mujima bua mumvuija ende. Pashishe tumuleje mudi lungenyi lua mu Bible luikale lua mushinga. Pikalaku mushindu, tumulombole ku lungenyi lua muomumue mu mukanda wa Dimanya didi difikisha ku muoyo wa kashidi. Tuvuluke bimpe ne: tshipatshila tshietu tshia kumpalampala mu dikumbulula ntshia kutuadija dilonga dia Bible.

¹² Ngakuilu wa buludiludi wa mukanda wa Dimanya mmuambuluishe bavule ba kutudi bua ‘kupetabu dikima’ mu malonga a Bible bua kukankamija balongi bua kubuelabu mu bisangilu ne mu bulongolodi bua Yehowa. Kale, tuvua ne dinyikibua dia kuindila ne: bantu banji balonge munkatshi mua tshikondo kampanda kumpala kua kubabikila bua kudisangishabu netu. Mpindieu, balongi ba bungi batu babuela mu bisangilu anu patshidibu batuadijilapu dilonga ne nunku balubuluka lukasa.

¹³ Bena dibaka kampanda bakafila bumanyishi bua mu mpukapuka kudi muena mudimu nabu. Bu muvuaye muleje dianyisha bua bulelela, muanetu wa balume ne mukajende bakamulomba bua kulongabu nende Bible ku diambuluisha dia mukanda wa Dimanya. Mu tshikondo tshimuetshimue etshi, bakamukankamija bua kubuela mu bisangilu, muvuaye mua kupetela diandamuna ku nkonko yende mivule. Muntu eu kakanyisha anu dilonga patupu, kadi wakatuadija kulonga misangu ibidi ku lumingu ne kubuela pa tshibidilu mu bisangilu ku Nzubu wa Bukalenge.

¹⁴ Tutumikayi ne broshire wa Ntshinyi tshidi Nzambi utulomba?: Mu Mpuilu wa Distrike: “Batuadi ba mukenji wa ditalala dia Nzambi,” tuakapeta broshire wa Ntshinyi tshidi Nzambi utulomba? Broshire eu udi wambuluisha bua kutuadija malonga a Bible ne bantu badi batshina Nzambi kabiyi kutangila dimanya-mukanda diabu. Udi ne dilongesha dijima didi diambulula malongesha a nshindamenu a mu Bible. Broshire eu ntshiamu tshikuatshishi bua kufila dimanya dia Nzambi. Udi umvuija bulelela mu mushindu mutokesha ne mupepele utudi bonso ne bua kuikala ne mushindu wa kutumika nende bua kulongesha tshidi Nzambi utulomba. Bamanyishi ba bungi nebikale ne disanka dia kulombola dilonga dia Bible ku diambuluisha dia broshire eu.

¹⁵ Bamue bantu badi bela meji ne: kabena ne dîba dia kulonga mukanda wa Dimanya nebanyishe pamu’apa bua kumonangana mu mêba makese bua kulonga broshire wa Utulomba. Nebasanke bua malu alongabu. Anu mu mabeji abidi peshi asatu patupu, nebapete diandamuna ku nkonko itu bantu badiela kukadi nkama ya bidimu: Nzambi nnganyi? Diabolo nnganyi? Nzambi udi ne dilongolola kayi bua buloba? Bukalenge bua Nzambi ntshinyi? Mmunyi mutudi mua kupeta tshitendelelu tshilelela? Nansha mudi broshire uleja bulelela mu miaku mipepele, mukenji udimu ng’wa tshivuma. Udi ne malu manene ikala bakulu mua kukonkonona ne balumbidi ba batismo ne udi mua kuambuluisha bu tshitumpikidi bua dilonga diondoke ku diambuluisha dia mukanda wa Dimanya.

¹⁶ Bua kulomba dilonga dia Bible kudi muntu mu dikumbulula, bidi bitukengela amu kuamba ne: “Udi mumanye se: wewe mua kudilamina minute mikese patupu udi mua kupeta diandamuna ku lukonko lua mushinga mukole lua mu Bible anyi?” Pashishe ela lukonko lumue lua ku eyi idi ku mbangilu kua dimue dia ku malongesha a mu broshire eu. Tshilejilu, biwakula ne muntu mukulakaje newikale mua kuamba ne: “Tudi bamanye se: kale Yezu wakondapa bantu. Kadi tshienzaye ntshinyi mu matuku atshilualua bua badi basama? Bua bakulakaje? Ne bua bafue?” Tudi tupeta diandamuna ku nkonko eyi mu dilongesha 5. Dijinga dia kumanya bia bungi dia muntu udi utabalela malu a Nzambi nedikale imue misangu mua kujudibua ku lukonko elu: “Nzambi utu uteleja masambila onso anyi?” Dilongesha 7 didi diandamuna ku lukonko elu. Bena mu dîku kampanda nebajinge bua kumanya tshidi Nzambi ulomba baledi ne bana nebatshimanye pa kulonga dilongesha 8. Kudi nkonko mikuabu bu mudi: “Bafue badiku mua kuenzela ba-muoyo bibi anyi?” (dilongesha 11); “Bua tshinyi kudi bitendelelu bivule nunku bidi bidiamba mudibi bia Buena-nkristo?” (dilongesha 13); ne “Ntshinyi tshiudi ne bua kuenza bua kulua mulunda wa Nzambi?” (dilongesha 16).

¹⁷  Katuindidi bua kutuadija makumbulula: Ntshikondo bule kayi tshidi muntu ne bua kuindila kumpala kua kuenza dikumbulula? Bamue bamanyishi batu balukila dituku dimue peshi abidi panyima pa dimonangana diabu dia kumpala. Bakuabu batu balukila amu dituku dimuedimue panyima pa lupolo lua mêba kampanda! Nkumpala kua dîba anyi? Pa tshibidilu, mbimueneke ne: bantu kabatu bakema nansha. Misangu mivule, mumanyishi ke udi ukengela kuikala ne mmuenenu mutambe buimpe wa malu ne kupeta ndambu wa dikima. Tumonayi amue malu mamona.

¹⁸ Mumanyishi kampanda wa mvula 13 uvua uyisha ku nzubu ne ku nzubu e kumonaye bakaji babidi bendakana. Muvuluke ne: tudi bakankamija bua kuyisha bantu muaba kayi wonso udibu, wakabanga diyukidilangana ne bakaji aba mu njila. Bonso babidi bakasankidila mukenji wa Bukalenge ne kuitababu mikanda ibidi ya Dimanya. Muanetu nsongalume eu wakangata adrese yabu, kuyaye kubatangila panyima pa matuku abidi ne kutuadijaye dilonga dia Bible ne yonso wa kudibu.

¹⁹ Muanetu wa bakaji mukuabu, yeye, utu wangata mapangadika bua kualukila bua kuyukidilangana ne mumuyukidishi lumingu ludi lulonda. Kadi dituku dimue anyi abidi panyima pa dimonangana dia kumpala, udi uya kumutangila bua kumupesha tshibejibeji tshidi tshiakula pa tshiena-bualu tshiyukidilanganapu musangu mushale. Utu wambila muntu ne: “Tshiena-bualu etshi ntshikoke ntema yanyi ne mvua muele meji se: newanyishe kutshibala. Tshiena mua kuyukila nebe mpindieu kadi nengalukile mu Disatu mu mapingaja bu mutuvua bumvuangane. Bidi’amu nanku anyi?”

²⁰ Padi muntu uleja dianyisha bua bulelela, tudi mua kujadika se: neatuilangane ne buluishi mu mushindu umue anyi mukuabu. Pa kualukila ne lukasa luonso panyima pa dimonangana dietu dia kumpala, netumukoleshe bua kumuambuluisha bua kukandamenaye buluishi bua bena mu dîku diende, bua balunda bende ba pa muoyo, ne bakuabu.

²¹ Dikima nngikadilu mukengedibue bua kupatula bipeta bimpe mu makumbulula. Mmushindu kayi wa kudipeta? Mupostolo Paulo udi wandamuna pa kuamba ne: tudi ‘tupeta dikima’ bua kumanyisha bakuabu lumu luimpe “ku diambuluisha dia Nzambi wetu.” Bituajinga kulubuluka mu muanda eu, tusambile bua kupeta diambuluisha dia Yehowa. Pashishe, mu diumvuangana ne masambila etu, tulondayi disankidila dionso. Yehowa neabeneshe bushuwa madikolela etu!

[Box on page 3]

Mushindu wa kupatula bipeta ku diambuluisha dia makumbulula

■ Tuleje ne: tuetu bine tudi tutabalela bantu ne muoyo mujima.

■ Tusungule tshiena-bualu tshia mu Bible tshidi tshikoka ntema bua diyukidilangana.

■ Ku musangu wonso tuase tshishimikidi bua dikumbulula didi dilonda.

■ Tutungunuke ne kuela meji kudi muntu panyima pa bamane kushiyangana nende.

■ Tualukile panyima pa dituku dimue peshi abidi bua kulonda disankidila.

■ Tuvuluke ne: tshipatshila tshietu ntshia kutuadija dilonga dia Bible.

■ Tusambile ne tulombe diambuluisha bua kupeta dikima mu mudimu eu.