Didilongolola didi ne mushinga bua makumbula mapiamapia malenga
1. Bena Kristo ba kumpala bavua ne bua kuyisha too ne penyi?
1 Yezu uvua mulongolole bayidi bende bua kuikalabu bayishi bimpe ba ‘lumu luimpe lua bukalenge bua mu diulu.’ (Mat. 4:23; 9:35) Uvua ubalongesha pavuaye uyisha mu buloba bua Palestine. Kadi, kumpala kua Yezu kubanda mu diulu, wakamanyisha ne: bayidi bende bavua ne kuyisha buloba bujima bua ‘kuvuija ba bisamba bionso bayidi.’—Mat. 28:19, 20.
2. Kutumikila mukenji wa Yezu wa ‘kuvuija bayidi’ kudi kumvuija tshinyi?
2 Mudimu au udi ulomba kupinganyina bantu bavua banyishe lumu luimpe lua Bukalenge bua Nzambi ne kutungunuka ne kubalongesha mua kuenza malu onso avua Kristo muambe. Kadi bua kubapinganyina kuetu kupatula bipeta bilenga, tudi ne bua kudilongolola bimpe menemene.
3. Mmunyi muudi mua kulongolola njila wa kupinganyina muntu nansha bua musangu wa kumpala unudi nuyikila ne muntu?
3 Longolola malu: Bamue bamanyishi batu benza muabu muonso bua kushiya lukonko padibu bajikija kuyikila bua musangu wa kumpala, balaya muntu bua kupingana bua kuandamuna lukonko alu. Mbamone ne: kukebela diandamuna mu mukanda wa Bible ulongesha padibu bapingana nkubambuluishe bua kutuadija diakamue dilonga dia Bible.
4. Bua tshinyi katuena mua kuindila bibejibeji bipiabipia bua kushisha kupinganyina muntu?
4 Katuena ne kuindila difika dia bibejibeji bipiabipia bua ngondo udi panshi au bua kushisha kupinganyina muntu to. Bidi mua kuikala bimpe bua kuleja muntu bualu kampanda buimpe budi mu tshibejibeji tshikadiye natshi.
5. Bua tshinyi mbimpe kuikala ne kipatshila kampanda paudi upinganyina muntu?
5 Wikale ne kipatshila kampanda: Kumpala kua wewe kupinganyina muntu, wanji ubalulule malu auvua mufunde musangu mushale, wele meji bua tshiudi mua kuenza. Tshilejilu, nudi mua kuyikila bualu budi mu tshibejibeji tshiuvua mumushile. Anyi udi mua kumushila tshibejibeji nansha mukanda mukuabu udi wakula bua bualu bunuvua bayikila musangu mushale. Kadi biwikala uvua mushiye lukonko, kipatshila kebe nekikale ka kuandamuna lukonko alu. Pawudi wakula bua bualu kampanda bua mu Bible, wenze muebe muonso bua kubala mvese udi wamba bualu abu mu Bible.
6. Ntshipatshila kayi tshitudi natshi patudi tuya kutangila bantu?
6 Tshipatshila tshietu tshinene: Tshipatshila tshietu ntshia kutuadija kulongesha muntu Bible. Muanetu mukuabu wakalomba muntu kampanda bua kutuadija kulonga nende Bible pavuaye muye kumutangila, kadi muntu au wakabenga. Muanetu eu wakamupinganyina kabidi ne nimero wa ndekelu wa tshibejibeji, e kumuambila ne: “Patudi balue lelu, tudi tuenda tuandamuna bantu lukonko lumue lua mu Bible.” Yeye mumane kumvua diandamuna dia muntu au, muanetu wakamubadila mvese ne tshikoso tshivua tshimumvuija mu mukanda ututu tulongesha nawu bantu Bible. Muntu au wakitaba bua kuikala kulonga Bible lumingu luonso.
7. Mmushindu kayi uvua didilongolola dimpe dikuambuluishe bua kutuadija kulongesha muntu Bible?
7 Tuetu ne dîba dia kuikala kudilongolola bua kupinganyina bantu, netupatule bipeta bimpe. Disanka dietu nedivule, netuikale ne diakalenga dia kuambuluisha badi ‘badiakaje’ bua kuendela mu njila udi ufikisha ku muoyo wa tshiendelele.—Bien. 13:48, NW.