Mmuenenu mulenga pa mudimu wa mitalu wa dienza bayidi

¹ Kumpala kua kumbuka pa buloba, Yezu wakatumina balondi bende dîyi bua ‘kuvuija bantu ba mu matunga onso bayidi.’ Bualu ebu buvua bulomba bua ne: batuadije kampanye kanene ka diyisha ne dilongesha ne balabaje mudimu wabu mu buloba buonso buasa. (Mat. 28:19, 20, NW; Bien. 1:8) Bakamonaku mudimu eu bu bujitu butambe kunema bua kubuambula anyi? Bua mupostolo Yone kabivua nanku to. Mumane kupitshisha bidimu 65 mu dienza bayidi, wakafunda ne: “Etshi ke tshidi dinanga dia Nzambi diumvuija: tulame mêyi-matuma ende; ne mêyi-matuma ende mene kaena bujitu.”​—1 Yone 5:3, NW.

² Muyuki wa mudimu wa bena nkristo ba kumpala udi mu Mifundu udi ujadika ne: bakenza ne mitalu mudimu wabu wa divuija bantu bayidi ba Yezu Kristo. (2 Tim. 4:1, 2) Bakenza nanku ki ng’anu bualu bivua mudimu mulomba to; kadi dinanga ke divua dibasaka bua kusamuna Nzambi ne kutuadila bakuabu ditekemena dia lupandu. (Bien. 13:47-49) Bu muvua bonso bavua balua bayidi baditua pashishe mu dienza pabu bayidi, tshisumbu tshia bena nkristo tshiakadiunda lukasa mu siekele wa kumpala.​—Bien. 5:14; 6:7; 16:5.

³ Mudimu wa dienza bayidi udi wenda lukasa: Mudimu mutambe bunene wa dienza bayidi wa katshia ne katshia udi wenda wenzeka mu siekele eu wa 20! Too ne mpindieu, bantu miliyo mivule mbitabe lumu luimpe ne mbenze malu mu diumvuangana ne lumu elu. (Luka 8:15) Bu mudi tshikondo tshidi tshishadile ndongoluelu eu wa malu tshipita lukasa, “mupika wa lulamatu ne wa budimu” udi utupesha bia-mudimu bidi biambuluisha bua bantu ba muoyo mululame balonge bulelela lukasa.​—Mat. 24:45, NW.

⁴ Mu 1995 tuakapeta mukanda wa Dimanya didi difikisha ku muoyo wa kashidi, mulonda mu 1996 kudi broshire wa Ntshinyi tshidi Nzambi utulomba? Bua mukanda wa Dimanya, Tshibumba tshia Nsentedi tshia dia 15 Tshiongo 1996, dibeji dia 14, tshiakamba ne: “Mukanda eu wa mabeji 192 udi mua kulongibua mu tshikondo tshidi mu bualabale kampanda tshîpi, ne aba badi ‘badiakaje bimpe bua muoyo wa kashidi’ badi ne bua kukumbana mua kulonga bivule ku diambuluisha diawu bua kuditshipa kudi Yehowa ne kutambuishibua.”​—Bien. 13:48, NW.

⁵ Tshiena-bualu tshia “Mushindu wa kuenza bayidi ku diambuluisha dia mukanda wa Dimanya” mu tshisakidila tshia Mudimu wetu wa Bukalenge wa Kashipu 1996 tshiakatupesha tshipatshila etshi: “Bilondeshile nsombelu ne makokeshi a mulongi, bidi pamuapa mua kukumbana bua kukonkonona nshapita mivule mu dilonga dia mu dîba dijima, pamutu pa kukosa dilonga pankatshi. Balongi nebadiunde bikole bikala mulongeshi ne bobo bine banemeka dîba dijadika bua dilonga dia lumingu luonso.” Tshiena-bualu etshi tshiakatungunuka ne: “Tudi batekemene se: muntu udi ufika ku ndekelu kua dilonga dia mukanda wa Dimanya aleje patoke muoyo wende muimpe ne dijinga diende diondoke dia kusadila Nzambi.” Kazubu ka “Mandamuna ku nkonko yenu” mu Mudimu wetu wa Bukalenge wa Kasuabanga 1996 kavua kumvuije ne: “Mbia meji bua kuela lungenyi se: pa tshibidilu mulongeshi mupiluke udi mua kuambuluisha mulongi muena muoyo mululame mu tshikondo tshîpi tshikumbanyine bua kulubulukaye bimpe ne kuangataye dipangadika dia kusadila Yehowa yeye muine mumanye kenzela.”

⁶ Mukanda wa Dimanya udi upatula bipeta: Pakatambula nsongakaji kampanda, wakamba muvuaye wela meji bua dilonga mukanda wa Dimanya. Tshikondo kampanda uvua ulonga mukanda wa Muoyo wa kashidi. Pakapatuka mukanda wa Dimanya, muanetu wa bakaji uvua ulonga nende wakashintulula mukanda kubuela mu mukanda mupiamupia eu. Katupa aka, mulongi eu wakamona se: bivua ne bua kumulomba bua angate dipangadika kampanda, ne biakamusaka kubangila pine apu bua kulubuluka lukasa. Nsongakaji eu, ukadi muanetu wa bakaji, udi wamba ne: “Mukanda wa Muoyo wa kashidi mmungambuluishe bua kunanga Yehowa, kadi mukanda wa Dimanya mmungambuluishe bua kuangata dipangadika dia kumusadila.”

⁷ Tangila muakalonga muntu mukaji mukuabu bulelela ne lukasa luonso. Panyima pa dilonga diende dibidi, wakabuela mu tshisangilu kampanda ku Nzubu wa Bukalenge mu dikumbula dia mutangidi wa tshijengu. Lumingu alu, mu dilonga disatu, wakambila mutangidi ne: ukavua mudilambule kudi Yehowa ne uvua ujinga bua kulua mumanyishi udi kayi mutambule. Wakayukila ne bakulu, ne bakamuanyishila. Lumingu luakalonda, wakabanga dipatuka mu budimi. Wakatamba kudifila mu dilonga diende dia Bible mu mushindu wa se: wakalomba diikisha ku mudimu wende bua kumona mua kulonga misangu ibidi anyi isatu ku lumingu ne kuenza mêba a bungi mu buambi. Imue misangu, bavua balonga nshapita ibidi anyi isatu ku musangu umue. Muntu mukaji eu wakatuadija kutumikila malu avuaye ulonga mu nsombelu wende yonso, kujikijaye mukanda wa Dimanya mu mbingu inayi, ne kulubulukaye too ne ku batismo!

⁸ Bayende wa muanetu wa bakaji kampanda udi udiamba muvuaye “tshilejilu tshia muena dibaka udi kayi muena kuitabuja.” Dimue edi, munga muanetu wa balume wakamulomba bua kulongabu Bible mu mukanda wa Dimanya, pa kumuambila se: uvua mua kulekela kunyima kua dilonga dia kumpala anyi dîba kayi dionso pashishe. Muntu eu wakitaba bua buobu kuteta, nansha muvuaye kayi mulongi muimpe menemene ku buana, ne kayi mulonge mukanda wa malu a Nzambi nansha umue mu bidimu bipite pa 20. Mmunyi muakandamunaye ku dilonga mukanda wa Dimanya? Wakamba ne: “Bivua disanka dilelela bua kumona mushindu mupepele uvuabu bafunde mukanda eu udi wambuluisha bua kulonga Bible. Malu malongesha avua mafunda mu mushindu mutoke ne wa lungenyi ne bua nunku, katupa kîpi kunyima, nkavua ngindila dilonga dietu divua dilonda ne muoyo mutambe kuikala kulukulu. Mulongeshi wanyi uvua ulonda ne meji ngenzelu mifila kudi Société bua dienza bayidi, ne ku diambuluisha dia spiritu wa Yehowa, ngakatambula kunyima kua ngondo inayi. Ndi mua kuamba bushuwa ne: bituadima dinanga bua kuenza bayidi, tutungunuka ne dikeba badi ne mitshima milulame mu buambi, tutumika ne mukanda wa Dimanya ne mikanda mikuabu idi yambuluisha bua kulonga Bible mifila kudi Société ne, kupita bionso, tusambila bua kupeta bulombodi bua Yehowa, tudi mua kupeta diakalenga dia pa buadi dia kuambuluisha mu mudimu wa divuija bantu bayidi.” Malu atuatedi aa adi bushuwa a pa buawu. Bavule ba ku balongi betu kabatu balua mu bulelela ne lukasa mushindu’eu to.

⁹ Balongi badi balubuluka mu mishindu mishilangane: Tudi ne bua kuitaba se: makokeshi a balongeshi ne a balongi ba Dîyi dia Nzambi adi mua kushilangana bikole menemene. Dikola dia mu nyuma didi mua kuenda bitekete anyi lukasa. Bamue balongi batu benza mu ngondo mikese dilubuluka didi mua kulomba bakuabu mutantshi mupite bule. Lubilu ludi muntu ukola nalu mu nyuma ludi lulondeshila tulasa tudiye mulonge, mushinga udiye wangata nawu malu a mu nyuma ne buondoke bua bulamate buende kudi Yehowa. Bonso batudi tulonga nabu kabena ne “mitshima mimana kulongolola” bua kulonga Mifundu dituku dionso, bu muvua bena Beloya ba kale bakalua bena kuitabuja benza nansha.​—Bien. 17:11, 12.

¹⁰ Ke bualu kayi tshiena-bualu tshia “Kudi dijinga dia malonga a Bible mavule” mu tshisakidila tshia Mudimu wetu wa Bukalenge wa Lumungulu 1998, tshidi tshifila dîyi edi diakanyine: “Bushuwa, balongi bonso ba Bible kabatu balubuluka mushindu wa muomumue. Bamue kabena batambe kudiina mu malu a mu nyuma bu bakuabu anyi kabena ne lumvu lua lukasa bua kukuata malu malongesha. Bakuabu badi ne nsombelu mûle tente ne malu ne badi mua kupanga kulama dîba didi dikengela bua kujikija nshapita mujima lumingu luonso. Nunku, mu nsombelu mikuabu bidi mua kukengela kulonga misangu mipite pa umue bua kujikija imue nshapita ne kuenza ngondo ya pa mutu bua kujikija mukanda.”

¹¹ Benji ba bayidi badi balama mmuenenu wa nkatshinkatshi: Bidi bikengela kuakaja dikasa dia dilonga pa nsombelu ne makokeshi a mulongi. Bu mutudi bakankamija bua kutuadija malonga mu broshire wa Utulomba, bidi mua kuangata ngondo ibidi anyi isatu bua kumujikija kumpala kua kutuadija mukanda wa Dimanya. Bituatumika ne ngenyi yonso mifila mu tshisakidila tshia Mudimu wetu wa Bukalenge wa Kashipu 1996, bidi mua kulomba ngondo mikuabu isambombo anyi tshitema bua kujikija mukanda wa Dimanya. Bamue bavua bafuma ku dituadija dilonga mu mukanda wa Dimanya bakashintulula kubuela mu broshire wa Utulomba bua kuambuluisha mulongi bua se: amone mua kumanya lukasa malelela a nshindamenu a mu Bible. Pashishe bakapingana ku dilonga mukanda wa Dimanya. Bikala dilonga dituadije mu mukanda wa Dimanya ne dikale ditungunuka bimpe, bidi mua kuikala ne dikuatshisha bua kulonga broshire wa Utulomba panyima pa dijikija mukanda mujima, bua kuambulula nenku lukasa malelela a nshindamenu a mu Dîyi dia Nzambi. Mu mishindu yonso, katuena basue bua kupangisha mulongi bua kumvua bimpe malongesha anu bualu tudi basue kuya lukasa to. Mulongi yonso udi ukengela tshishimikidi tshishindame bua ditabuja diende dipiadipia mu Dîyi dia Nzambi.

¹² Bamanye bimpe tshikondo tshitukadi, mbia mitalu kupita tshikondo kayi tshionso kumpala bua tuambuluishe bakuabu bua bamanye bulelela. Eku tutungunuka ne kusambila bua kutuadija malonga mapiamapia a Bible, tusambilayi bua aba badi bamane kuikala balonga netu. Nenku netupete disanka dia kutungunuka ne kutambuisha bayidi bavule “matuku onso too ne ku nkomenu wa ndongoluelu eu wa malu.”​—Mat. 28:20, NW.