‘Ndi mua . . . munyi, bikala muntu kayi mundeje?’

¹ Pavua Filipo (muyishi wa Evanjeliyo) muebeje muntu mutungula muena Atiopa bua kumanya nne uvua mujingulule malu avuaye ubala mu Dîyi dia Nzambi, muntu eu wakandamuna ne: ‘Ndi mua kujingulula munyi, bikala muntu kayi mundeje?’ Filipo wakamuambuluisha ne disanka bua kumvuaye lumu luimpe lua malu a Yezu, ne anu pine apu muntu au wakatambula. (Bien. 8:26-38) Filipo uvua utumikila dîyi dishiya kudi Kristo dia ‘kuvuija ba bisamba bionso bayidi, kubabatiza ne kubayisha.’​—Mat. 28:19, 20.

² Tudi ne bua kutumikila dîyi edi didibu batulomba bua kuvuija bantu bayidi, anu bu muakenza Filipo. Kadi, mushindu uvua muntu mutungula muena Atiopa eu mukole mu nyuma lukasa ki ng’utudi tutamba kumona lelu kudi bantu batudi tulonga nabu Bible to. Muntu au uvua mulondi wa Buena-Yuda uvua mumanye bimpe malu a mu Bible, kabidi uvua witaba bivuabu bamuambila ne kuvua kumushadile anu bua kuitaba ne: Yezu ke Masiya uvuabu balaye. Bidi bifila lutatu lukole padi bantu batudi tulonga nabu kabayi bamanye Bible bimpe, padi malongesha a dishima a mu bitendelelu biabu bikuabu mabapambule, peshi padibu ne ntatu mikole mibanemene bujitu. Ntshinyi tshiatuambuluisha bua kufikisha bimpe balongi ba Bible ku didilambula ne ditambula?

³ Jingulula majinga a mu nyuma a mulongi wa Bible: Tshisakidila tshia Mudimu wetu wa Bukalenge wa Kabitende 1998 tshivua tshiakule bua bungi bua matuku atudi mua kulonga ne bantu ku diambuluisha dia broshire wa Utulomba ne mukanda wa Dimanya. Tshivua tshifile mubelu eu: “Bidi bikengela kuakaja dikasa dia dilonga pa nsombelu ne makokeshi a mulongi. . . . Katuena basue bua kupangisha mulongi bua kumvua bimpe malongesha anu bualu tudi basue kuya lukasa to. Mulongi yonso udi ukengela tshishimikidi tshishindame bua ditabuja diende dipiadipia mu Dîyi dia Nzambi.” Nunku, ki mbia meji bua kuya lubilu lubilu ne dilonga dia mukanda wa Dimanya ne tshipatshila tshia kuujikija mu ngondo isambombo to. Bidi mua kulomba matuku a bungi kupita pa ngondo isambombo bua kushisha kufikisha bamue bantu ku dikola mu nyuma ne pashishe kuangatabu dipangadika dia kutambula. Ku lumingu luonso, paudi ulonga ne muntu, pamutu pa kuya lukasa lukasa, angata dîba dionso didi dikengela bua kumuambuluisha bua kumvuaye ne kufikaye ku ditaba malu adiye ulonga mu Dîyi dia Nzambi. Bua bakuabu bantu, bidi mua kukengela mbingu ibidi anyi isatu bua kujikija nshapita umue mu mukanda wa Dimanya. Apu nudi mua kupeta dîba dikumbane dia kubala ne kumvuija mvese ya bungi idi mitela mu bikoso.​—Lomo 12:2.

⁴ Kadi, newenze tshinyi wewe mumone se: kunyima kua nuenu bamane kujikija dilonga dia mukanda wa Dimanya, muntu unudi nulonga nende ki mmuanji kumvua bulelela bimpe peshi ki mmuanji kudiumvua bimusaka menemene bua kunanga bulelela ne kudilambula kudi Nzambi? (1 Kol. 14:20) Ntshinyi tshikuabu tshiudi mua kuenza bua kumulombola mu njila udi ufikisha ku muoyo?​—Mat. 7:14.

⁵ Kumbaja majinga a mu nyuma a mulongi wa Bible: Padibi bimueneka patoke ne: muntu udi wenda ukola mu nyuma, nansha bitulu bitulu, ne muikale uleja mudiye wanyisha malu adiye ulonga, nutungunuke ne dilonga dia Bible mu mukanda mukuabu panudi nujikija broshire wa Utulomba ne mukanda wa Dimanya. Kabiena bikengela kuenza nanku bua bantu bonso to, kadi pikalabi bikengela kulonga nabu mukuabu mukanda, tungunukayi ne dilonga mu mukanda wa Ditalala, wa Bobumue mu Tshitendelelu, anyi wa Parole de Dieu. Bamanyishi ba bungi badi ne mikanda eyi badi mua kuyangata bua kulonga nayi ne bantu bikalayi kayitshiyi mu stoke wa tshisumbu. Anu mukanda wa Parole de Dieu ke unudi mua kulombesha kudi Société. Kadi, broshire wa Utulomba ne mukanda wa Dimanya ke bidi muntu yonso ne bua kulonga kumpala. Nudi ne bua kubala mu luapolo luenu dilonga dia Bible, misangu inudi nuya kamutangila ne mêba anudi nuangata bua kutungunuka ne kulonga ne muntu eu, nansha yeye mufike ku ditambula bangabanga ne kujikijaye mukanda muibidi.

⁶ Mbuena kuamba ne: aba badi batambule matuku adi panshi aa kadi bikale balonge anu mukanda umue patupu badi mpindieu ne bua kulonga nabu mukanda muibidi anyi? Kabiena ne mushinga to. Kadi, pamu’apa kabatshiena banange bulelela bu kumpala peshi ki mbaye kumpala mu nyuma ne pamu’apa bajinga bua babaleje mua kutumikila menemene bulelela mu nsombelu wabu. Bidi bikengela kuanji kukuatshila mutangidi wa mudimu bualu ebu kumpala kua kutuadijilula dilonga ne mumanyishi ukadi mutambule. Nansha nanku, wewe mumanye bantu bavua balonge mukanda wa Dimanya kale kadi kabayi bafike ku didilambula ne ditambula, udi mua kuya kubatangila bua kumona bikalabu basue kutuadijilula dilonga dia Bible.

⁷ Bidi bileja dinanga dia buena Kristo patudi tutuma lungenyi luetu luonso kudi muntu yonso udi munange bulelela utudi tulonga nende. Tshipatshila tshietu ntshia kuambuluisha mulongi bua amanye menemene bulelela bua mu Dîyi dia Nzambi. Nunku udi mua kunanga kashidi bulelela ne kudilambula kudi Yehowa, kutambula mu mâyi bua kuleja patoke ne: mmudilambule.​—Mus. 40:8; Ef. 3:17-19.

⁸ Udi muvuluke tshiakenzeka kunyima kua ditambula dia muntu mutungula muena Atiopa anyi? ‘Wakaya mu njila usanka’ bua muvuaye mulue muyidi mupiamupia wa Yezu Kristo. (Bien. 8:39, 40) Tuetu ne bantu batudi tuleja njila wa bulelela tuikalayi ne disanka dia bungi dia kusadila Yehowa Nzambi, mpindieu ne bua kashidi!