“Katuena mua kulekela kumanyisha”
1 Yezu Kristo ke udi utangila mudimu wa diyisha. (Mat. 28:20; Mâko 13:10) Nansha mukadi bungi bua bamanyishi bufike pabuipi ne miliyo isambombo mu matunga 234, katuena ne bua kuela meji ne: mudimu wetu wa buambi wajiki to. “Katuena mua kulekela kumanyisha” malu atudi balonge, too ne padi Nzambi nkayende wamba ne: mudimu awu wakumbanyi.—Bien. 4:20, Mukanda wa Mvidi Mukulu.
2 Tueyemenayi nyuma wa Nzambi: Satana udi utukebela ntatu mivule bua kututekesha mu mikolo. (Buak. 12:17) Mubidi wetu muine udi mupange bupuangane eu udi utukebela mikuabu ntatu ya bungi. Malu a nunku adi mua kutulembakaja ne kumbusha ntema yetu ku mudimu wa mushinga mukole wa diyisha. Nansha nanku, tuetu beyemene Yehowa, nyuma wende neatuambuluishe bua kutshimuna lutatu nansha baluamba munyi!
3 Pakakengeshabu bikole tshisumbu tshia bena Kristo ba mu bidimu lukama bia kumpala, bana betu aba bakasambila Nzambi bua abambuluishe batungunuke ne kuyisha dîyi diende ne dikima dionso. Yehowa wakandamuna disambila diabu, kubitshikijilaye nyuma wende ne kubapeshaye lukunukunu ne muoyo mukole bua kutungunuka ne kuyisha. Nenku bakapeta mushindu wa kutungunuka ne dikima dionso benda bamanyisha lumu luimpe kabayi balekela to.—Bien. 4:29, 31; 5:42.
4 Katutshinyi mêyi adi atekeshangana mu mikolo: Ngenyi idi nayi bantu anyi ngumu ya dishima idibu batumuangalajila idi mua kutukuatshisha buôwa. Kadi, tuvulukayi mêyi a dikima avua Petelo ne bapostolo bakuabu bambile bena ku kabadi ka Sanedren, mêyi adibu bafunde mu Bienzedi 5:29-32. Anu muakamba Gamaliele mulongeshi wa Mikenji, bantu kabena mua kutonkola mudimu wa Nzambi to. Katuena tuwenza ku bukole buetu to. Bu mudi Nzambi muikale ukuatshisha mudimu munene eu, nunku amu yeye ke udi mua kuenza bua tuetu kuwukumbaja!—Zek. 4:6.
5 Dituku dionso, tusengelelayi Yehowa Nzambi ne tumulombayi nyuma wende bua atuambuluishe tuambe lumu luimpe ne lukunukunu. Anu bu muakamba Yelemiya, tuambayi petu ne: mukenji wa Bukalenge udi bu kapia kadi kuosha munda mua mifuba yetu. (Yel. 20:9) Nansha bia munyi, katuenaku mua kushala bapuwe to!