Mmushindu kayi udibu ne bua kulombola bisangilu bia mudimu wa buambi?

¹ Tshisumbu ke tshidi ne bua kulongolola tshisangilu tshia mudimu wa buambi. Badi ne bua kutshienza mu bulongame ne kutshilombola bimpe. Badi babuelamu badi ne bua kuikala ne ngikadilu ne mvuadilu wa muomumue ne utubu nende mu bisangilu bikuabu bia tshisumbu. Nansha muikale bakuabu mua kufika kunyima, tshisangilu etshi tshidi ne bua kutuadija pa dîba. Muanetu udibu basungule bua kutshilombola udi ne bua kudilongolola bimpe bua kufila ngenyi miakanyine idi mua kuambuluisha bua mudimu wa buambi dituku adi. Mudimu wetu wa Bukalenge utu ufila mamanyisha ne ngenyi mimpe ya kulonda bua tshisangilu etshi.

² Kabiena anu bikengela kukonkonona mvese wa dituku mu tshisangilu tshionso tshia mudimu wa buambi to, kadi bikalaye muakanyine ne ukankamija bantu bua buambi, apu nudi mua kumukonkonona mu tshikoso. Tshisangilu etshi tshidi ne bua kuenzeka pa dîba bua kubenga kujimija patupu dîba didi bantu balongolole bua kuyisha. Katshiena ne bua kupita minite 10 anyi 15 to. Kadi nudi mua kutshipidija bikalatshi tshienzeka diakamue kunyima kua tshisangilu kampanda tshia tshisumbu. Bidi bikengela kunemeka ndongamu wa bampanda-njila; padi tshisangilu tshia mudimu wa buambi tshitamba kunenga anyi tshienzeka kushòò, bidi mua kupangisha bana betu badi bajinga kuenza mêba bungi kampanda mu buambi dituku adi bua kuenza.

³ Nudi ne bua kupesha mumanyishi yonso teritware. Nansha nanku, tudi bamanye ne: bamue badi mua kuikala badilongolole bua kupinganyina bantu anyi kulonga nabu Bible ne dîba adi kabayi dijinga ne teritware to.

⁴ Bantu bonso bikalamu badi ne bua kushala ne ntema ne kulonda bidibu babambila too ne padibu babanya bantu ne pashishe benza disambila. Badi badilongolole bua mudimu mukuabu badi ne bua kumanyisha mulombodi. Diabanya bantu bua mudimu wa buambi ne dibapesha teritware didi ne bua kuenzeka kumpala kua kujikija tshisangilu etshi. Kanuena ne bua kuenzela malu aa mu njila anyi muaba udi bantu ba bungi to. Tshisangilu tshia mudimu wa buambi tshidi ne bua kujika ne disambila. Tuetu batumikile ngenyi eyi, tudi mua kutekemena ne: Yehowa neabeneshe bikole mudimu wa buambi utudi tuenza.