Mandamuna ku nkonko yenu

▪ Nnganyi udibu mua kuanyishila bua kuenza disambila mu bisangilu bia tshisumbu?

Disambila dia mu tshisumbu ntshitupa tshinene mu ntendelelu wetu. Kulomba Yehowa kumpala kua bana betu mbualu bua mushinga mukole ne kabidi mbujitu bunene. Bu mudi disambila dikale bualu bua mushinga mukole, bakulu badi ne bua kujingulula malu bimpe padibu basungula bana betu badi bakumbane mua kuenza disambila mu bisangilu. Bana betu batambule badi basambila kumpala kua bantu mu tshisumbu badi ne bua kuikala bena Kristo badi bapie mu nyuma ne bamanyike bu bantu ba tshitembu ne kabidi badibu banemeka kudi bena mu tshisumbu. Masambila abu a kanemu adi ne bua kuleja malanda mimpe adibu nawu ne Yehowa Nzambi. Tshiena-bualu tshia ne: “Masambila menza kumpala kua bantu ne mutshima wa budipuekeshi,” tshidi mu Tshibumba tshia Nsentedi (Mfual.) tshia dia 15 Lumungulu 1986, tshidi tshileja mêyi a mushinga adi nangananga ambuluisha aba batu basambila kumpala kua bantu bua tshisumbu.

Bakulu kabena mua kusungula muanetu udi mumanyike mutuye ne tshikadilu tshibi peshi udibu babanda mu malu kampanda mabi bua kuenzaye disambila to. Kabena ne bua kusungula muanetu utu kayi ne dianyisha peshi utu wangata disambila bu mushindu wa kuela patoke bilumbu bidiye nabi ne bakuabu to. (1 Tim. 2:8) Nansha bikala muanetu kampanda mumane kutambula kadi mutshikale nsongalume, bakulu badi ne bua kujadika bikalaye mukumbane mu nyuma bua kusambilaye kumpala kua bantu mu tshisumbu.​—Bienzedi 16:1, 2.

Imue misangu mu bisangilu bia mudimu wa buambi, muanetu wa bakaji udi mutambule udi mua kuenza disambila padiku kakuyi muanetu wa balume udi mukumbane mua kudienza. Udi ne bua kuvuala tshitambala. Bia muomumue kabidi pikalabi ne: mu bimue bisangilu bia mudimu wa buambi kamuakuikala muanetu wa balume mukumbane udi mua kubilombola, bakulu badi ne bua kusungula muanetu wa bakaji mupiluke bua kulombolaye tshisangilu etshi; ikale ne tshitambala ku mutu.

Pa tshibidilu muanetu utu unzulula tshialu bua kumanyisha Muyuki wa Patoke ke utu wenza disambila dia mbangilu. Kadi, mu bisangilu bikuabu bia tshisumbu, padi bana betu ba balume bakumbane bikaleku ba bungi, badi mua kulomba muanetu mukuabu pa kumbusha mulombodi wa tshisangilu anyi eu wenza tshitupa tshia ndekelu mu tshisangilu, bua kuenza disambila dia mbangilu anyi dia nkomenu. Dîba ni ndîba kayi dionso, nudi ne bua kudianjila kumanyisha muanetu udibu basungule bua kuenza disambila mu tshisangilu tshia tshisumbu bua amone mua kuelela meji pa malu aluaye kuamba. Nunku bidi mua kumuambuluisha bua kuenza disambila dibotakane, kudienza ne muoyo umue bilondeshile tshisangilu atshi.

Masambila a nunku kaena ne bua kuikala male to. Pa tshibidilu, dîba didi muanetu wenza disambila kumpala kua bantu, nebamuteleje bimpe bu yeye mua kuikala muimane kuulu, wakula ne dîyi dikumbanyine ne upatula miaku idi bantu mua kumvua bimpe. Nebiambuluishe bantu bonso badi mu tshisangilu bua kutelejabu disambila ne ku ndekelu kuambabu ne muoyo mujima ne: “Amen.”​—1 Kul. 16:36; 1 Kol. 14:16.