Tshitupa tshia 7: Tulombolayi malonga a Bible mimpe
Tusambile patudi tulonga ne bantu Bible
1. (a) Bua tshinyi mbimpe kusambila ku ntuadijilu ne ku ndekelu kua dilonga dia Bible? (b) Ndîba kayi ditudi mua kutuadija kusambila ne muntu utudi tulonga nende Bible?
1 Bua mulongi kudiunda bimpe mu nyuma, bidi bikengela Yehowa amuambuluishe. (1 Kol. 3:6) Nunku, mbimpe kutuadija ne kujikija dilonga dikadi dishindame bimpe ne disambila. Nansha bua musangu wa kumpala utudi tutuadija kulonga ne muntu, tudi mua kusambila nende bikalaye umueneka munange malu a Nzambi bikole. Bua balongi bakuabu, tudi mua kuanji kulonga munkatshi mua tshikondo kampanda bangabanga ne kutuadija kusambila nabu. Tshilejilu, udi mua kuangata Musambu 25:4, 5 ne 1 Yone 5:14 bua kuambuluisha mulongi bua amanye bua tshinyi tudi tusambila ne nubale nende Yone 15:16 bua kumumvuija tshitudi tusambidila Yehowa mu dîna dia Yezu Kristo.
2. Bikala muanetu wa bakaji baye kumufila bua kulonga Bible ne muntu kudi muanetu wa balume mutambule anyi udi kayi muanji kutambula, nnganyi udi mua kuenza disambila?
2 Nnganyi udi mua kuenza disambila patudi tulonga Bible ne muntu? Bikala muanetu wa balume mutambule muye kufila muanetu wa bakaji bua kulonga Bible ne muntu, muanetu wa balume eu ke wenza disambila, kadi muanetu wa bakaji yeye ke walombola dilonga diende musuika tshitambala ku mutu. (1 Kol. 11:5, 10) Kadi pikala muanetu wa bakaji baye kumufila kudi muanetu wa balume udi mumanyishi wa Bukalenge udi kayi muanji kutambula, muanetu wa bakaji eu ke wenza disambila. Pikalabi nanku, udi ne bua kuvuala tshitambala ku mutu padiye usambila ne padiye ulombola dilonga dia Bible.
3. Mmalu kayi atudi mua kubueja mu disambila patudi tulonga Bible ne muntu?
3 Tshia kuamba mu disambila: Masambila menza patudi tulonga Bible ne muntu, kaena ne bua kuikala male to, kadi adi ne bua kuikala matoke. Pa kumbusha dilomba Nzambi diambuluisha bua dilonga ne dimuela tuasakidila bua bulelela bunudi balonge, mbimpe kabidi kumutumbisha bualu yeye ke Mpokolo wa dilongesha edi. (Yesh. 54:13) Tudi kabidi mua kuela mu masambila etu mêyi adi aleja mutudi tuditatshisha ne muoyo mujima bua diakalenga dia mulongi, kuelamu kabidi makuabu adi aleja dianyisha dietu bua bulongolodi budi Yehowa wenza nabu mudimu. (1 Tes. 1:2, 3; 2:7, 8) Patudi tulomba Yehowa bua ambuluishe mulongi mu bionso bidiye wenza bua kutumikila malu adiye ulonga, bidi mua kumusaka bua kumona mushinga wa kuikala ‘muenji wa dîyi.’—Yak. 1:22.
4. Kutuadija ne kujikija dilonga dia Bible ne disambila kudi ne malu kayi mimpe?
4 Patudi tusambila ne mulongi wa Bible, kudi kumueneka malu mimpe a bungi. Tudi tupeta mabenesha a kudi Nzambi. (Luka 11:13) Tudi tubanga kuangata dilonga dia Dîyi dia Nzambi ne mushinga mukole. Padi mulongi uteleja mushindu utudi tusambila, udi ulonga pende mua kusambila. (Luka 6:40) Kabidi, masambila menza ne muoyo muule tente ne dinanga bua Nzambi wetu ne dianyisha bua ngikadilu yende minene adi mua kuambuluisha mulongi bua kukolesha malanda ende ne Yehowa.