Mandamuna Ku Nkonko Yenu

◼ Tudi ne bua kulonga ne muntu mu mukanda wa Dimanya mu tshikondo bule kayi?

Yehowa udi ubenesha tshisamba tshiende lelu’eu. Tudi ne tshijadiki pa bualu ebu tshidimu tshionso padi binunu bia bapiabapia baditeka ku luseke lua bulelela. Malu mamonamona adi aleja ne: mukanda wa Dimanya ntshiamu tshitue tshia kulongesha natshi bulelela. Tshibumba tshia Nsentedi, mu nimero watshi wa mu dia 15 Tshiongo 1996, tshiakakoka ntema yetu pa bualu bua se: mukanda eu mmuenza bua kuambuluisha mulongi wa Bible bua kulubulukaye lukasa lukasa; imue misangu ngondo mikese mmikumbane bua kufikaye ku batismo.

Ke bua tshinyi nimero umue umue eu wa Tshibumba tshia Nsentedi uvua ushindika mu dibeji dia 17 ne: “Panyima pa muntu kampanda mumane kujikija dilonga diende dia Bible mu mukanda wa Dimanya ne mutambuishibue, kabiena ne dikuatshisha bua kulombola dilonga kampanda dilongolola nende mu mukanda kansanga muibidi.”

Tshituenza ntshinyi bikala mukanda wa Dimanya mujike ne mulongi kayi muanji kudiakaja bua batismo? Mudimu wetu wa Bukalenge wa Kashipu 1996, dibeji 6, tshik. 23, uvua uvuluija mubelu mufila kudi Tshibumba tshia Nsentedi wa kubenga kulonga mukanda muibidi panyima pa dilonga dia mukanda wa Dimanya. Mmuomumue ne: tudi ne bua kulekela kuambuluisha mulongi bua kudiundaye anyi? Tòo. Tudi basue bua bantu bapete dimanya dia nshindamenu dia bulelela. Kadi, mbia meji bua kuela lungenyi se: pa tshibidilu mulongeshi mupiluke udi mua kuambuluisha mulongi muena muoyo mululame mu tshikondo tshîpi tshikumbanyine bua kulubulukaye bimpe ne kuangataye dipangadika dia kusadila Yehowa yeye muine mumanye kenzela. Bidi mua kuenzeka ne: bamue balongi badi mua kulonga misangu mivule ku lumingu bilondeshile nsombelu wabu.

Bidi bikengela kumanya se: bamue balongi batu balubuluka bitulu bitulu bashilangane ne bakuabu. Kadi panyima pa dilonga dia mukanda wa Dimanya, dìdì mua kuangata ku misangu tshikondo tshile, bikala muntu kayi muangate dipangadika dia kudisangisha ku tshisumbu, mumanyishi neayukile bualu ebu ne mukulu kampanda wa mu Komité wa Mudimu. Diambuluisha dia pa mutu nedikale mua kufidibua, pikalabi bikengela nanku, bilondeshile dîyi-diludiki dileja mu Tshibumba tshia Nsentedi tshia mu dia 15 Tshiongo 1996, dibeji dia 17, bik. 11-12.

Mulongi udibu bambuluishe bua kumanya bulelela, nansha bikale pa kushindamena pa malu manene udi ne bua kudiumvua musakibue kudi dianyisha bua kubuela mu bisangilu bia bena nkristo. Ebi nebimufikishe imue misangu ku dileja patoke ne: udi ujinga kusadila Yehowa. Bikala mulongi kayi uleja ne: ùdi wangata malu a mu nyuma ne mushinga, panyima pa mumane kulonga tshikondo tshile mukanda wa Dimanya, bidi mua kuikala bitambe buimpe bua kuimanyika dilonga.