Mandamuna Ku Nkonko Yenu

◼ Bu mutukadi mpindieu ne mukanda wa Dimanya didi difikisha ku muoyo wa kashidi, dilonga dia Bible dia ku nzubu didi ne bua kulombodibua tshikondo bule munyi?

Mudimu wetu wa Bukalenge wa Kabitende 1993 wakafila mubelu bua kutungunuka ne dilonga dia Bible ne muntu mupiamupia too ne padi mikanda ibidi ijika. Bu mutukadi mpindieu ne mukanda wa Dimanya, bidi bia meji bua kushintulula ngenzelu eu, bilondeshile malu mafunda mu Tshibumba tshia Nsentedi tshia mu dia 15 Tshiongo 1996 mu dibeji dia 13 ne dia 14.

Mukanda wa Dimanya mmuenza bua kuambuluisha aba badi “ne mitshima miakaja bua kupeta muoyo wa kashidi” bua kulongabu bidibu bakengela bua kudilambula kudi Yehowa ne kutambuishibua. (Bienz. 13:​48, NW) Nenku, padi mukand’eu mupiamupia ujika, kabiakukengedibua bua kulonga mukanda muibidi nansha. Bilondeshile bungi bua matuku adi balongi betu benda bapeta bulelela, tudi mua kutungunuka ne kubakankamija bua kukumbajabu dimanya diabu pa kubuela mu bisangilu bia Bantemu ba Yehowa ne pa kubala Bible ne mikanda mishilashilangane ya Buena-nkristo.

Nebikale bia mushinga bua tuetu kuibidilangana ne nkonko ya mu mabeji 175-218 a mukanda wa Badilongolole bua kuenza mudimu wetu bimpe. Nansha bituikala katuyi tukonkonona nkonko eyi anyi tuyambulula ne mulongi wetu, nebikale bimpe bua tuetu kuela kashonyi pa tunungu tuamuambuluisha bua kusokolola ngumvuilu wende mujalame wa malelela a nshindamenu a mu Bible adi mu mukanda wa Dimanya dîba dikala bakulu bakonkonona nende bua ditambula diende.

Kabiena bikengela kusakidila malu makuabu ku aa adi mu mukanda wa Dimanya pa kutela makuabu peshi kusakidila ngenyi ya pa mutu bua kumvuija malongesha a mu Bible anyi bua kupisha malongesha a dishima. Ebi nebilepeshe dilonga patupu. Nebitambe kuikala bimpe bua mukanda kujikawu pa lukasa, imue misangu mu ngondo isambombo. Ke bua tshinyi bidi bikengela bua tuetu kudianjila kuulonga mu buondoke bua tuikale bakumbane mua kumvuija malongesha mu mushindu mutokesha ne mujalame. Mulongi udi ne bua kukankamijibua bua kudilongolola, kubala mvese mifila ne kuenza madikolela bua kumvua bimpe tshidi nshapita yonso ulongesha.

Tshibumba tshia Nsentedi atshi ntshizangike dikengedibua dia Bantemu ba Yehowa kulombola malonga a Bible mavule mu tshikondo tshîpi. (Tangila Yeshaya 60:22.) Pa kutumika bimpe ne mukanda wa Dimanya, netuikale mua kuambuluisha bapiabapia bua kupetabu dimanya didi difikisha ku muoyo wa kashidi ne kuditumikila.​—⁠Yone 17:⁠3.