Tufilayi bumanyishi ku bikadilu bimpe

¹ Mu nsangilu wa bantu bena tshidi muoyo musue wa lelu’eu, bansonga bavule badi kabayi baditatshisha bua muoyo wabu badi baunyanga ne diangata bintu bia lulengu, buendenda, buntomboji ne tshinyangu. Bishilangane, bikadilu bia tshitembu bia bansonga bazanzamuke ba mu tshisumbu tshia bena nkristo bidi bisankisha bua kubimona ne bidi bushuwa bulengele ku mêsu kua Yehowa. Bidi bifila bumanyishi bukole budi mua kukoka bamue bantu ku bulelela.​—1 Pet. 2:12.

² Malu mavule adi aleja ne: bikadilu bimpe bia bansonga bena nkristo bivua bisankishe bavua babimone. Mu diakula bua umue wa ku balongi bende uvua Ntemu wa Yehowa, mulongeshi kampanda wakamba kumpala kua kalasa kajima ne: Nzambi wa nsongakaji eu, Yehowa, ke Nzambi mulelela. Bivua bualu nsongakaji au uvua misangu yonso ne bikadilu bia kanemu. Mulongeshi mukuabu wakafundila Société bualu budi bulonda ebu: “Ndi musue kunuela ka-lumbandi bua bansonga batambe buimpe banudi nabu mu tshitendelelu tshienu. . . . Bansonga benu mbitembelu bushuwa. Badi banemeka bakulu babu, mbamanye malu ne badi ne mvuadilu wa kanemu. Kabidi, mbamanye Bible wabu bimpe bitambe! Etshi, ke tshitendelelu!”

³ Munga mulongeshi uvua mulengibue ku muoyo pa kumona bikadilu bilenga bia mulongi kansanga wa bidimu muanda-mutekete wa mu kalasa kende, muikale muana wa Ntemu. Uvua mukokibue kudi bumuntu bupole ne bua dinanga bua muana eu, buvua bushilangane kule ne kule ne bua bana ba balume bakuabu. Tshivua tshimukemeshe ndishindama diende mu mitabuja ende a ntendelelu, pa kumona se: kavua ne bundu bua kuikala mushilangane ne bakuabu bua mitabuja ende. Kumonaye ne: uvua ne kuondo ka muoyo kalongesha ne uvua ne bukokeshi bua ‘kujingulula tshidi tshimpe ne tshidi tshibi.’ (Eb. 5:14) Pashishe, mamuende wa muana au wakakumbula mulongeshi eu, ne dilonga dia Bible diakatuadija. Kunyima kua matuku, mulongeshi wakatambula ne ndekelu wa bionso wakalua mpanda-njila wa pa tshibidilu!

⁴ Nsongalume kampanda uvua mukokibue pa kumona bikadilu bimpe bia nsongakaji kansanga muena nkristo uvua Ntemu wa Yehowa mu tshilongelu tshiabu. Uvua yeye wende mushindu: mumanye malu, wa meji mu kalasa, ne misangu yonso uvua anu ne mvuadilu wa kanemu; kabidi, mushilangane ne bansongakaji bakuabu, kavua useselangana ne bana ba balume nansha. Nsongalume eu uvua mumone se: uvua ulonda mêyi-maludiki a mu Bible mu nsombelu wende. Wakamuela nkonko pa mitabuja ende, ne biakumvuaye biakamulenga ku muoyo. Wakaditua mu dilonga, ne kakanenga bua kutambula to, ne pashishe wakalua mpanda-njila ne kufikaye ku dilua muena ku Betele.

⁵ Biwikala nsonga muena nkristo udi ujinga bua kufila bumanyishi bulenga kudi bakuabu, tabalela bikadilu biebe mu nseke yabi yonso. Kutetshi kudilekelela ku buteyi mu dianyisha lungenyi lua tshidi muoyo musue lua mu bulongolodi ebu, pa kuitaba mmuenenu wabu, ngenyi yabu anyi nsombelu yabu. Ikala tshitembelu tshitumbuke mu ngakuilu, mvuadilu, ndengejilu wa nsuki, ki ng’anu paudi upatuka mu buambi ne ubuela mu bisangilu, kadi ne paudi uya mu kalasa anyi mu bikondo biebe bia dijikija lutetuku. (1 Tim. 4:12) Ndisankapu kayi buebe pikala muntu mua kutuma ntema ku bulelela bualu udi ‘mukenkeshe butoke buebe’ ku bikadilu bilenga biebe!​—Mat. 5:16, NW.