Bamanyishi ba Bukalenge badi balonda

Midimu mimpe ìdì itumbisha Yehowa

MU MUYUKI wende wa pa Mukuna, Yezu wakambila bayidi bende ne: “Butoke buenu bukenke kumpala kua bantu, bua bamone midimu mimpe yenu ne batumbishe Tatu wenu udi mu diulu.” (Matayo 5:16, NW) Bia muomumue, bena nkristo balelela badi badifila mu “midimu mimpe” idi itumbisha Yehowa.

Midimu eyi mimpe mmidimu kayi? Idi ikonga buambi bua lumu luimpe, kadi nsombelu wetu wa tshitembu udi kabidi tshitupa tshiayi tshinene. Tshintu tshia kumpala tshitu tshikoka pa tshibidilu bantu ku tshisumbu tshia bena nkristo nnsombelu wetu muimpe. Malu mamona adi alonda aa adi aleja mudi Bantemu ba ku Martinique ‘bakenkesha butoke buabu kumpala kua bantu.’

◻ Pavuaye mudifile mu mudimu wa buambi bua ku nzubu ne ku nzubu, umue wa ku Bantemu ba Yehowa wakakumbula mukaji kampanda muena Katolike. Munkatshi mua bidimu 25 mukaji eu uvua musombe ne mulume kansanga uvua kayi bayende. Uvua muibidilangane ne malongesha a Bantemu ba Yehowa, bualu uvua, bidimu bu muanda-mutekete kumpala, mupete mukanda wa Udi mua kuikala ne muoyo wa kashidi pa buloba bukudimuna mparadizu.a Mukaji eu wakambila Ntemu ne: “Kudi bitendelelu bipite bungi. Tshiena mumanye wa kuitabuja munkatshi mua dikondakana dionso edi.” Ntemu eu wakumvuija ne: bulelela budi mua kusokolodibua anu mu Bible ne se: bua kubusokolola, uvua ne bua kulonga Mifundu ne ntema ne kusambila Nzambi bua kupeta spiritu wende ne buludiki buende.

Munkatshi mua tshikondo kampanda, nansha muvuaye musankidile dilonga dia Bible, mukaji eu wakabenga bungi kampanda bua mabikila a kubuela mu bisangilu bia bena nkristo ku Nzubu wa Bukalenge wa Bantemu ba Yehowa. Bua tshinyi? Uvua ne bundu bunekesha. Kadi, kunyima kua dipeta dibikidibua mu Tshivulukilu tshia lufu lua Kristo, wakatshimuna bundu buende ne kubuela.

Tshiakatamba kumukemesha pa bidi bitangila tshisangilu nnsombelu wa dinanga mu Nzubu wa Bukalenge. Katshia kavua muanji kumona bulunda bulelela bua mushindu’eu mu nzubu wende wa Nzambi! Kunyima kua tshisangilu atshi wakatuadija kubuela mu bisangilu bionso bilombola kudi Bantemu ba Yehowa ba muaba au, ne katupa kîpi kunyima bakaselangana ne mulume uvuaye musombe nende. Udi mpindieu muena mu tshisumbu mutambule.

◻ Midimu mimpe ya Ntemu mukuabu yakapatula bipeta bimpe. Uvua ne muanzu munene mu biro kampanda. Kunyima kua mulume kansanga muena tshidiila tshia Réunion mumane kuangatshibua ku mudimu bua tshikondo kampanda, bamue ba ku bena mudimu bakabanga kumuseka bua buîpi buende. Wakavua tshintu tshia diseka. Bishilangane, Ntemu uvua misangu yonso uleja mulume eu bulenga ne kanemu. Kabiakanenga bua kuebejaye bua tshinyi uvua mushilangane nunku.

Ntemu wakumvuija ne: nsombelu wende wa kanemu uvua tshipeta tshia mêyi-maludiki a mu Bible avuaye mulongele kudi Bantemu ba Yehowa. Wakamuleja kabidi tshidi Mifundu yamba pa bidi bitangila malongolola a Nzambi ne ditekemena dia bulongolodi bupiabupia. Mulume eu wakitaba dilonga dia Bible, kutuadija kubuela mu bisangilu bia bena nkristo, ne kuenza dibaka dimanyike kua mbulamatadi ne mukaji uvuaye musombe nende.

Ndekelu wa bionso wakapingana ku Réunion. Kale, wakapeta ntatu ne balela bende, nangananga ne dîku dia mukajende. Kadi mpindieu bavua balengibue bikole ku muoyo kudi nsombelu wende muimpe wa Buena-nkristo. Mulume eu wakatambuishibua ne mpindieu udi musadidi wa mudimu. Bena mu dîku diende bavule, pa kukonga ne mukajende ne bana bende babidi ba bakaji, badi pabu basadila mu tshisumbu tshia bena nkristo bu bamanyishi ba lumu luimpe lua Bukalenge bua Nzambi.

[Mêyi adi kuinshi]