Batangidi badi balombola—Mutangidi-muludiki
1 Kusadila bu mutangidi mu tshisumbu mbujitu bunene. (Bien. 20:28; 1 Tim. 3:1) Tshiena-bualu etshi ntshia kumpala mu mulongo wa ebi bialeja midimu mishilashilangane ya bakulu bena nkristo, bua yonso wa kutudi amone mua kuanyisha mudimu wa mushinga mukole udibu bakuata buetu tuetu.
2 Société utu uteka mutangidi-muludiki bua tshikondo katshiyi tshijadika. Bu mudiye ulombola malu, bidi biambuluisha bakulu bua kufilabu ntema miakanyine ku midimu yabu mibapesha. (Mudimu wetu, dib. 42) Mmidimu kayi idi mimupesha?
3 Mutangidi-muludiki udi upeta mikanda mitumina tshisumbu ne uyipesha sekretere ne lukasa luonso bua kuyendesha ne kuyilama. Mu dilongolola bisangilu bia bakulu, mutangidi-muludiki udi upeta ngenyi ya kudi bakulu bakuabu pa malu adibu ne bua kukonkonona ne ulongolola dibeji dia biena-bualu bua tshisangilu. Udi kabidi wambuluisha bu mulombodi mu bisangilu bia bakulu. Padibu bangata mapangadika, udi utabalela bua baakumbaje mu mushindu muakanyine. Udi utangila dilongolola dia Tshisangilu tshia Mudimu ne ndongamu wa miyuki ya patoke. Udi ufila dianyisha bua mamanyisha onso mafila mu tshisumbu, ne bua ditula mfranga bua malu onso a pa tshibidilu a tshisumbu, ne utabalela bua benze dikonkonona dia konte ya tshisumbu mu ngondo yonso isatu.
4 Muanetu eu udi mulombodi wa Komite wa Mudimu wa Tshisumbu ne udi uludika midimu ya komite eu. Padi mulongi wa Bible ulomba bua kumuitababu bu mumanyishi udi kayi mutambule anyi padi mumanyishi udi kayi mutambule usua kutambula, mutangidi-muludiki udi ulongolola bua bakulu bayukile nende. Mutangidi-muludiki udi kabidi ulongolola dikumbula dia mutangidi wa tshijengu bua tshisumbu kupetelatshi masanka a tshishiki ku lumingu lua pa bualu lua mudimu.
5 Mutangidi-muludiki udi ne midimu mishilashilangane ya bungi. Padiye ukumbaja majitu ende “ne disuminyina” ne budipuekeshi, yonso wa kutudi udi mua kuenza tshiende tshitupa mu dieleshangana diboko ne bakulu. (Lomo 12:8) Bituikala ‘tutumikila’ ne ‘tukokela’ badi balombola munkatshi muetu, badi mua kuenza mudimu wabu ne disanka dilelela ditambe bunene.—Eb. 13:17.