Tumika ne broshire bua kulenga mutshima ne lungenyi
1 Tudi ne bua kumanyisha bulelela bua mu Bible mu mushindu wa kulenga mutshima ne lungenyi. Pavua Yezu umvuija bateleji bende bulelela, uvua usungula biena-bualu bivua bibasankisha ne bibasaka ku dienza malu. (Luka 24:17, 27, 32, 45) Dilubuluka dia mudimu wetu ndisuikila bikole ku madikolela atudi tuenza bua kusunguluja bidi bateleji betu bakengela mu nyuma.
2 Broshire idi mua kuikala bia-mudimu bilenga bua kulenga mutshima ne lungenyi bia bantu batudi tupeta mu buambi. Dianjila kuela meji bua bantu badi mua kuandamuna bimpe ku mukenji udi mu broshire ne broshire yonso wa kufila mu Kabitende:
—Dieu se soucie-t-il vraiment de nous? Bantu badi mu dikenga dia mfranga anyi badi bamone mabika ne mala mu nsombelu nebanyishe mukenji eu wa busambi udi utangila matuku atshilualua kaayi ne dikenga.
—Quel est le but de la vie? Comment le découvrir? Bansonga badi bela meji bikole bua matuku abu atshilualua nebapetele dikuatshisha ku mandamuna a mu Bible adi mu broshire eu.
—Ikalayi ne muoyo wa kashidi ne disanka pa buloba! Bimfuanyi bivule ne mifundu mitela nebiambuluishe bana batekete ne bantu badi ne lutatu lua kubala bua kumanyabu malongolola a Nzambi.
—Bukalenge bualua kuasa Mparadizu. Muntu yonso udi mu malu a mbulamatadi anyi a nsombelu wa bantu mu tshinsanga udi mua kukokibua kudi mukenji eu udi wamba mualua Bukalenge bua Nzambi kujikija ntatu ya bukua-bantu.
—Padi muntu uudi munange ufua. Bena mudimu ba bungi batu balongolola bitalu bua dibijiika batu banyisha bua kupeta broshire eyi bua kuyabanyina mêku adi mafuishe muntu. Bamanyishi batu bayisha mu nkita batu batumika ne broshire eu bua kusamba badi bafuishe. Bana betu ba bakaji babidi bakayukila ne dîku kampanda dia bantu muanda-mutekete bavua basambila ku lukita. Bu tshipeta tshia diyisha mukenji wa busambi udi mu broshire eu, bakatuadija dilonga dia Bible ne mamu wa dîku dituku diakalonda!
—Tudi ne bua kuitabuja Busatu Bunsanto anyi? Muntu udi muditue bikole mu malu a Nzambi udi mua kuandamuna bimpe ku bulelela budi mu broshire eu udi wakula bimpe bua dilongesha dia nshindamenu dia Bukua-buena-nkristo.
3 Wibidilangane ne broshire yonso, ne ujadike mushindu mutambe bulenga wa kutumika nende mu teritware webe. Bua mishindu ya dileja broshire eyi, tangila dibeji dia ndekelu dia Mudimu wetu wa Bukalenge wa Tshimungu 1998. Yehowa abenesheku madikolela ebe menza bua kulenga lungenyi ne mutshima bia bantu.—Mâko 6:34.