Ndongamu mupiamupia wa mpuilu wa pa buende wa dituku dimue

Ndongoluelu wa mpuilu wa pa buende wa dituku dimue wakatuadija mu 1987. Masangila aa a dituku dimue atu akolesha ku muoyo bua basadidi ba Yehowa ne basankididi ba bulelela batu babuelamu. Kubangila mu Kabitende 1998, nekuikale ndongamu mupiamupia wa mpuilu wa pa buende wa dituku dimue. Neumone muikala miyuki tshitema ne dielangana nkonko kabidi ne malu mamonamona bifila dikuatshisha mu nyuma.

“Leja dianyisha bua mesa a Yehowa” ke tshiena-bualu tshia ndongamu eu mupiamupia. (Yesh. 65:14; 1 Kol. 10:21) Neakoleshe dipangadika dietu dia kuteka ntendelelu wa Yehowa pa muaba wa kumpala mu nsombelu wetu. (Mus. 27:4) Muyuki wa “Tukonkononayi kudi mitshima yetu mitambe kunemenena,” muenza kudi mutangidi wa tshijengu, newakule bua dibuela dietu mu bisangilu. Ngamba-malu mukumbudi neatuleje mutudi mua ‘kulama makanda a mu nyuma pa kudidiisha ku mesa a Yehowa.’ Nebapeshe kabidi bansonga badi mu bulongolodi bua Yehowa dikankamija dilelela bua kushalabu bashindame mu disadila Nzambi. Muyuki munene wa ngamba-malu mukumbudi, udi ne mutu wa bualu ne: “Bakoleshibue mu nyuma bua kufila bumanyishi ne dikima,” neuleje mudi ndongoluelu mienza mu tshisumbu ituambuluisha bua kufila bumanyishi ne dikima bua Bukalenge. Nnganyi udi kayi musue bua kupetela masanka ku ndongamu eu?

Bantu badi bafuma ku didilambula kudi Nzambi ne bikale bajinga bua kutambula badi ne bua kumanyisha mutangidi-muludiki bualu ebu pa lukasa. Tudi ne dieyemena dia se: patudi tubanga tshidimu etshi tshia 12 tshia ndongoluelu wa mpuilu wa pa buende wa dituku dimue, bonso babuelamu nebakoleshibue mu nyuma bua kuenza mudimu utshidi kumpala.