Programe Wa Mpuilu Wa Pa Buende Wa Dituku Dimue Wa Musangu Udi Ulonda

“Tuenze malu onso bualu bua lumu luimpe,” ke tshikala tshiena-bualu tshia mpuilu wa pa buende wa dituku dimue wenzeka biangatshile mu ngondo eu wa Kabitende. (1 Kol. 9:23) Lumu luimpe lua Bukalenge ke lumu lua mushinga mukole lutudi tumvua lelu’eu. Mpuilu neatuambuluishe bua kuvuluka disanka dia pa buadi ditudi nadi dia kuikala batuadi ba lumu elu lua dikema. Kabidi, neatupeshe muoyo mukole bua kutungunuka ne kumanyisha lumu luimpe, katuyi tulekela.​—⁠Bien. 5:42.

Programe neatuleje mushindu wa kutumika tshishiki ne ndongeshilu wetu wa teokrasi bua kuenza bivule mu mudimu. Netuteleje bamue bana betu badi benze mashintuluka bua kualabaja mudimu wabu, tshilejilu bansonga badi badifile mu dilubuluja dia lumu luimpe.​—⁠Tangila Filipoi 2:22.

Muyuki munene, wenzabu kudi ngamba-malu mukumbudi, neuzangike mushinga wa kuikala “bakanyine bua kutuomekelabu lumu luimpe.” (1 Tes. 2:​4, NW) Netumone se: bua kulama disanka dia kumanyisha lumu luimpe, bidi bitukengela kutungunuka ne dikumbaja malu-malomba ne mêyi-makulu bia Nzambi mu lungenyi ne mu bikadilu. Nebazangike kabidi mabenesha adi afuma ku ngikadilu wa nunku.

Katupangidi programe eu wa pa buende. Bantu badi bafuminaku ku didilambula kudi Yehowa ne bajinga bua kutambula mu mpuilu eu badi ne bua kumanyisha kutshidi ku mpindieu mutangidi-muludiki. Tubikile bonso batudi tulonga nabu Bible. Tupeshe Yehowa mushindu wa kutukolesha bua kuenza malu onso bualu bua lumu luimpe ne bua kukumbaja nunku mudimu eu munene kumpala kua Armagedone.