Mpuilu Wa Pa Buende Wa Dituku Dimue Mupiamupia

¹ “Balongesha kudi Yehowa.” Etshi netshikale tshiena-bualu tshia dilondangana dipiadipia dia Mpuilu ya pa buayi ya dituku dimue yabanga kuenzeka mu Kabitende. (Yone 6:45, NW) Dilongesha dia Yehowa didi dituambuluisha bushuwa bua kuikala ne nsombelu udi usankisha. Didi dikolesha dianyisha diondoke dietu bua bumpianyi buetu bua mu nyuma. Madikolela atudi tuenza bua ne: bakuabu bumvue lumu luimpe adi atuenza bantu badi ne mushinga mu nsangilu wa bantu. Mpuilu eu wa pa buende wa dituku dimue nealeje mabenesha adi nawu aba badi balongesha kudi Yehowa.

² Masanka a dilongesha dia Nzambi neasulakajibue ne njiwu ya dimanya didi difumina mu bulongolodi ebu. Netujingulule bimpebimpe ne: Yehowa udi utupesha dilongesha dibandile, dilongesha dipatula mu Dîyi diende, Bible. Nebele kashonyi pa bitupa bisatu bia ntendelelu wetu mutudi ne disanka bua kuikala balongeshibue kudi Nzambi. Ku lukuabu luseke, bansonga nebakankamijibue bua kuidikija bilejilu bia mushinga bia mu Bible, bu mudi Davidi ne Timote, ne kuibaka nsombelu wabu pa midimu ya mu nyuma. Ditabuja dietu nedikoleshibue patuateleja bilejilu bia lulamatu bia Bantemu bakulakaje. Aba batshidi ne matuku makese mu diditshipa kudi Nzambi ne bakumbaja malu malomba nebikale mua kutambuishibua. Bikalabi dijinga diabu, badi ne bua kumanyisha mutangidi-muludiki matuku a bungi kumpala kua Mpuilu.

³ Muyuki wa nshindamenu wa Mpuilu eu wa pa buende wa dituku dimue udi ne tshiena-bualu etshi: “Balongesha kudi Yehowa bua kuenza disua diende.” Neutuleje bua tshinyi tudi ne bua kutungunuka bonso ne kulonga, kulua bonso bashindame mu ditabuja ne kutungunuka ne kudiunda. Netukankamijibue bua kuidikija Yehowa pa kulongesha bakuabu bulelela budi bufikisha ku muoyo wa kashidi. Malu menzeka adi mua kuibaka ditabuja dietu nealeje mushindu udi mikanda ya Société miambuluishe bantu bavule bua kupeta dilongesha dia Yehowa. Nebele kashonyi pa bipeta bimpe bia programe wa pa buloba bujima wa dilongesha dia Yehowa.

⁴ Tuangatayi mapangadika masunguluke bua kubuelamu. Tukankamijayi aba bonso badi baleja dijinga dia kumanya bia bungi bua kubuelamu. Tudianjilayi kusanka bua malu a bungi mimpe atulongesha Mulongeshi wetu Munene.—Yesh. 30:20.