Batangidi badi balombola​—Mutangidi wa mudimu

¹ Mutangidi wa mudimu udi utabalela ne muoyo mujima bualu buonso budi butangila dilubuluka dia mudimu wa dimuangalaja mukenji mu teritware mupesha tshisumbu. Nunku udi ne mudimu wa mushinga mukole mu dituambuluisha bua kukumbaja bujitu buetu bua kuyisha lumu luimpe. Bu mudiye mumuangalaji wa evanjeliyo wa lukunukunu, udi ntunga-mulongo mu dilongolola dia malu onso adi atangila mudimu. Bu mulongeshi mukumbane, udi wambuluisha mumanyishi yonso bua kuakaja ngenzelu wende wa mudimu.​—Ef. 4:11, 12.

² Mukulu eu udi utangila buludiludi mudimu wa basadidi ba mudimu batekibue ku mikanda, ku bibejibeji, ne teritware. Udi ne bujitu bua kujadika bikalaku bungi bukumbane bua mikanda, bibejibeji, ne formilere ya mudimu ngondo yonso bua tuetu kutumika nabi. Musangu umue ku tshidimu udi ukontolola dosié wa teritware bua kumona nzubu yonso ivuabu batubele bua katukumbudi, ne udi utumaku bana betu bapiluke bua kuyikumbulabu.

³ Mutangidi wa mudimu udi ne bujitu bua kutangila mishindu mishilangane ya dienza buambi, bu mudi buambi mu turtié tua bungenda, mu misesu, ne ku telefone. Mmudiakaje dîba dionso bua kuenza malongolola makanyine bua bisangilu bia mudimu mu lumingu, ne mu matuku a diikisha. Udi utabalela bikole mudimu wa dilombola malonga a Bible. Udi ukeba mishindu ya kufila diambuluisha dia mu nyuma kudi aba badi batumpika ngondo mu dienza dia mudimu peshi badi bajimija luya mu mudimu. Udi uditatshisha ne muoyo mujima bua mudimu wa bampanda-njila, ne utangila ndongamu wa Bampanda-njila badi bambuluisha bakuabu.

⁴ Bu mudiye muena mu Komite wa Mudimu wa Tshisumbu, mutangidi wa mudimu udi uleja makajilula adi akengela kuenza mu tusumbu tua Dilonga dia Mukanda dia Tshisumbu. Padiye ukumbula kasumbu kenu, ikalayi badilongolole bua kuikalaku ne kuenza nende mudimu wa budimi.

⁵ Muntu yonso mu tshisumbu udi ne bua kuanyisha ne muoyo umue bua kufila diende dikuatshisha ku bulombodi bufila kudi mutangidi wa mudimu. Kuenza nunku nekutuambuluishe bua kulengeja ngenzelu wetu wa mudimu wa dienza bayidi ne kumona masanka mavule mu mudimu wetu.