Ambuluishayi Mutangidi wenu wa Dilonga dia Mukanda dia Tshisumbu

¹ Tuetu bonso tutu tupeta diambuluisha dinene mu Dilonga dia Mukanda dia Tshisumbu. Ngondo mushale tuvua bakuile pa mushindu udi mutangidi wa Dilonga dia Mukanda dia Tshisumbu ukumbaja mudimu wende. Kadi tshitudi mua kuenza ntshinyi bua kumuambuluisha ne kutuambuluishabi tuetu bine ne bakuabu?

² Tuikalayi tubuelamu lumingu luonso: Bu mudi dilonga dia mukanda dikale ne bantu bakese, dilua dienu didi ne mushinga wa bungi. Kebayi bua kuikala kubuelamu lumingu luonso. Nudi mua kuambuluisha kabidi nuenu bikale nufika kumpala kua dîba, nunku nebipeteshe mutangidi wa dilonga dia mukanda mushindu wa kutuadija tshisangilu bimpe mu bulongame.​—1 Kol. 14:40.

³ Mandamuna adi akolesha mu nyuma: Mushindu mukuabu unudi mua kumuambuluisha mpa kudilongolola bimpe ne kufila mandamuna adi akolesha bakuabu mu nyuma. Mandamuna adi mashila pa bualu anu bumue busunguluke atu mimpe pa tshibidilu ne atu akankamija bakuabu bua kuandamunabu pabu. Epukayi dikeba mua kutela kantu ne kantu kuonso kadi mu tshikoso mu mandamuna enu. Bikala bualu kampanda budi mu dilonga bukufike ku muoyo, dîba adi udi mua kusakidila ngenyi yebe mu diandamuna bua diyukidilangana edi kutambadi kubotakana.​—1 Pet. 4:10.

⁴ Bikalabu bakusungule bua kubadila bantu bikoso, ikala ne tshisumi mu dikumbaja mudimu au. Dibala dimpe didi kabidi divuija dilonga dia nsongo, didi ditamba kusankisha bikole.​—1 Tim. 4:13.

⁵ Diyisha ne bena mu kasumbu ka dilonga dia mukanda: Bisangilu bia mudimu wa buambi bitu bienzeka miaba ya bungi itu dilonga dia mukanda dienzekela. Panudi nutua tshidibu balongolole etshi nyama ku mikolo bidi biambuluisha mutangidi bualu yeye ke udi ntunga-mulongo mu mudimu wa buambi. Angatayi ngenzelu eu bu mushindu muimpe udi wambuluisha bua nuenu kutamba kumanyangana ne bana benu ne kubakankamija.

⁶ Luapolo lua mudimu wa buambi: Kufila luapolo luenu lua mudimu wa buambi pa lukasa ku ndekelu kua ngondo yonso mmushindu mukuabu wa kuambuluisha mutangidi wenu wa dilonga dia mukanda. Nudi mua kumupesha luapolo yenu yeye nkayende ku bianza anyi kuyela mu kashete kalongolola bua luapolo ya mudimu ku Nzubu wa Bukalenge. Sekretere udi mua kuenza mudimu ne kashete aku bua kusangisha luapolo ya mudimu wa buambi ya kudi batangidi ba dilonga dia mukanda idibu belamu.

⁷ Dikuatshishangana dienu ne mutangidi wa Dilonga dia Mukanda dia Tshisumbu dienu kadiakupanga kumueneka to. Kupita bionso, nudi mua kushala bajadike se: Yehowa ‘neikale ne [lungenyi lunudi nuleja].’​—Filip. 4:23.