Badi ne tshia ‘kuakidila dîyi ne mutshima wabu mujima’!
1 Miliyo ya bantu badi balonga Bible ne Bantemu ba Yehowa. Bikalabu basue kumueneka bakanyine muoyo wa kashidi, badi ne tshia ‘kuakidila dîyi ne mutshima wabu mujima,’ anu bu muakenza bantu 3 000 bakanyingalala ne kutambulabu mu Pentekoste wa mu 33 B.B. (Bien. 2:41, NW) Bidi bituambika bujitu kayi lelu’eu?
2 Tudi ne bua kuambuluisha bantu batudi tulonga nabu Bible bua balamate Yehowa. (1 Tim. 4:7-10) Bua nanku, tshisakidila tshia Mudimu wetu wa Bukalenge wa Kashipu 1996 tshidi tshifila mubelu eu mu tshikoso tshia 20 ne: “Munkatshi mua dilonga, keba mishindu ya kukolesha dianyisha [dia mulongi] kudi Yehowa bua ngikadilu yende. Leja didiumvua diebe diondoke diudi nadi bua Nzambi. Ambuluisha mulongi bua kuela meji pa mushindu udiye mua kudiundisha malanda a pa nkayende ne a luya ne Yehowa.”
3 Lutatu lutudi tupetangana nalu: Bantu ba bungi badi ku buenzeji bua bitendelelu bia dishima, badi basankidila ntendelelu udi ubalomba amu madikolela makese ne dîba dikese, kayi ubalomba mashintuluka malelela mu nsombelu wabu to. (2 Tim. 3:5) Butudi nabu mbua kuambuluisha batudi tulonga nabu Bible bua kujingululabu ne: ntendelelu mulelela udi ulomba bivule kupita dikala bateleji patupu ba dîyi dia Nzambi. Badi ne bua kuteka mu nsombelu wabu malu adibu balonga. (Yak. 1:22-25) Bikala bualu kampanda mu bikadilu biabu kabuyi busankisha Nzambi, badi ne tshia kumanya ne: badi ne bua ‘kuandamuka kabidi’ ne kuenza malu adi makane bua kumusankisha. (Bien. 3:19) Bua kupeta muoyo wa kashidi, bidi bikengela bua ‘badienzeje bikole’ ne bimane bashindame ku luseke lua bulelela.—Luka 13:24, 25, NW.
4 Panudi nukonkonona bitupa bishilashilangane bia nsombelu wa tshitembu, konka muntu uudi ulonga nende mushindu udiye bushuwa umona malu aa ne tshidiye mua kuenza bikalaye mumone se: bidi bikengela bua kuenzaye mashintuluka mu nsombelu wende. Koka ntema yende ku bulongolodi budi bumulongesha bulelela ne mukankamije bua kubuela mu bisangilu bionso.—Eb. 10:25.
5 Tudifundilayi tshipatshila tshia kulenga mitshima ya balongi patudi tulongesha. Netupete disanka mu disaka bapiabapia bua kuakidila dîyi dia Nzambi ne mutshima wabu mujima ne bua kutambula.—1 Tes. 2:13.