Batangidi badi balombola—Mutangidi wa Kalasa ka Mudimu wa Teokrasi
1 Mutangidi wa Kalasa ka Mudimu wa Teokrasi mmukulu mupie mu nyuma udi wenza mudimu mukole wa diakula ne dilongesha, mmuakanyine bua tuetu kumunemeka ne kuenzejangana nende mudimu. (1 Tim. 5:17) Mmajitu kayi adiye nawu?
2 Udi ne bujitu bua kukuba tshilaminu tshia mikanda tshia Kalasa ka Mudimu wa Teokrasi tshidi ku Nzubu wa Bukalenge. Udi musue kukankamija bonso badi bakumbaje malu malomba bua badifundishe mu kalasa. Udi utabalela bua ne: tshilaminu tshia tubeji tua mibelu ya bungamba-malu tshikale tshilama bimpe bua kumona mua kufila midimu mu bulongame kumpala kua mbingu yoyi mikese ng’isatu. Udi ne bua kumanya bimpe tshisumbu, kumanya mulongi yonso ne makokeshi ende. Nansha muanetu mukuabu mua kumuambuluisha bua kulongolola ndongamu wa kalasa, udi utangila yeye muine bikala midimu miabanya biakane.
3 Bua kulongesha bimpe mu kalasa, mutangidi udi ne bua kudilongolola bikole lumingu luonso, pa kulonga bimpe menemene malu malongolola. Ebi bidi bimuambuluisha bua kujula ntema ya tshisumbu bua programe, bua kujadika bikala midimu mienza miangate tshitupa tshionso tshileja mu mikanda ne bua kuela kashonyi pa ngenyi ya mushinga ikala mu diambulula difunda.
4 Kunyima kua mudimu ne mudimu, mutangidi neele mulongi ka-lumbandi ne neumvuije bua tshinyi ngikadilu kampanda wa bungamba-malu uvua muenza bimpe anyi bua tshinyi bidi bikengela kumuakaja. Bikala muntu ne dijinga dia diambuluisha bua kulongolola midimu yende ya mu kalasa, mutangidi peshi muntu mukuabu wasungulaye neamuambuluishe.
5 Bua kupetela diambuluisha ku mudimu mukole muenza kudi mutangidi wa Kalasa ka Mudimu wa Teokrasi ne bafidi ba mibelu bakuabu badi ku bulombodi buende, tudi ne bua kubuela pa tshibidilu mu kalasa. Tudi kabidi ne bua kuenza midimu yonso mitupesha ne kutumikila mibelu itudi tupeta peshi mipesha bakuabu balongi. Pa kuenza nunku, netuakaje ku kakese ku kakese makokeshi etu a kumanyisha mukenji wa Bukalenge patoke ne ku nzubu ne ku nzubu.—Bien. 20:20; 1 Tim. 4:13, 15.