Tudi ne bua kukumbula misangu ne misangu
1 Uvua muandamune bimpe musangu wa kumpala wakakumanyishabu lumu luimpe anyi? Pikalabi kabiyi nanku, udi ne bua kuikala ne dianyisha bua muvua Bantemu ba Yehowa balue kukukumbula misangu ne misangu too ne pawakafika ku ditaba dilonga dia Bible. Mbimpe kuvuluka bualu ebu paudi wenza mudimu misangu ne misangu mu teritware webe.
2 Nsombelu ya bantu idi ishintuluka misangu yonso. Badi batuilangana ne ntatu peshi nsombelu mipiamipia, bateleja ngumu idi ilubakaja mu tshinsanga tshiabu anyi mu buloba bujima, badi bapetangana ne ntatu ya malu a lupetu, anyi disama peshi lufu mu dîku diabu. Malu a nunku adi mua kubafikisha ku disua bua kumanya kikadila ka tunyinganyinga etu. Tudi ne bua kujingulula malu adi abungamija bantu ne pashishe kuandamuna ne mukenji udi ukolesha ku muoyo.
3 Eu mmudimu wa dipandisha bantu: Elabi meji bua bena mudimu wa disungila bantu padi tshipupu tshienzeka. Nansha bamue mua kuikala bakeba bantu muaba udi bantu bapanduke anu bakese bapetshibua, kabena bateketa mu maboko ne balekela kukeba bualu bena mudimu nabu badi bapeta bantu bapanduke ba bungi muaba mukuabu. Mudimu wetu wa disungila bantu ki mmuanji kujika nansha. Tshidimu tshionso, nkama ya binunu bia badi basue kupanduka ku “dikenga dinene” badi bapeteka.—Buak. 7:9, 14.
4 “Yonso udi ubila dîna dia Yehowa neapandishibue.” (Lomo 10:13-15, NW) Mêyi aa adi ne bua kubueja mu lungenyi lua yonso wa kutudi dijinga dia kusuminyina mu diyisha. Katshia mudimu wa diyisha watuadija mu teritware wetu, bana bakadi bakole ne bakadi mpindieu bashindame bua kuela meji bikole bua matuku abu atshilualua ne bua tshipatshila tshia muoyo. Katuena mua kumanya muntu witaba mukenji kunyima to. (Muam. 11:6) Baluishi ba kale ba bungi mbitabe bulelela. Mudimu wetu ki ng’wa kulumbuluisha bantu to, kadi ng’wa kutungunuka ne kubapetesha mushindu wa kuteleja mukenji mulenga ne kusungidibua ku bulongolodi ebu bukulakaje. Anu bu muakenza bayidi ba Yezu ba kumpala, tudi ne bua ‘kuya amu kuya’ kudi bantu ne kuteta bua kujula dijinga diabu dia kumanya bia bungi pa mukenji wa Bukalenge.—Mat. 10:6, 7, NW.
5 Bu mutshidi njila anu mutunzuluila bua kuyisha, bidi bileja luse lua Yehowa. (2 Pet. 3:9) Patudi tupetesha bakuabu mushindu wa kuteleja misangu ne misangu, tudi tushindika dinanga dia Nzambi, ne mu dienza nunku tudi tumusamuna.