Badi mua kumona ne: tudi bashilangane
1 Tshidimu tshishale, bantu bapiabapia bapite pa 300 000 bakadisanga kutudi pa kutambula. Bantu aba bakamona tshinyi kudi Bantemu ba Yehowa tshiakabasaka bua kubuela mu bulongolodi bua Nzambi? Bua tshinyi tudi bashilangane ne bitendelelu bikuabu bionso? Mona amue mandamuna adiku:
—Tudi tulamata Bible pamutu pa kulamata ngenyi yetu nkayetu: Tudi tutendelela Yehowa Nzambi “ne spiritu ne bulelela,” anu bu muakamba Yezu Kristo bua kuenza. Ebi bidi biumvuija dibenga mashimi a bitendelelu ne dinemeka Dîyi difunda dia Nzambi.—Yone 4:23, 24, NW; 2 Tim. 3:15-17.
—Tudi tuya kudi bantu pamutu pa kuindila ne: balue kutudi: Tudi bitabe mudimu mutupesha kudi Kristo wa kuyisha ne kulongesha, ne tudi tuidikija tshilejilu tshiende tshia kukeba bena mitshima milulame. Tudi tubakeba ku nzubu yabu, mu misesu, anyi miaba mikuabu itudi mua kubapeta.—Mat. 9:35; 10:11; 28:19, 20; Bien. 10:42.
—Tudi tufila dilongesha dia mu Bible kudi muntu yonso kakuyi difutshisha makuta: Tudi tuenza mudimu ne bintu bietu ne makanda etu katuyi tufutshisha bantu mfranga, tufila mêba mapite pa muliyare mujima tshidimu tshionso mu mudimu wa Nzambi. Tudi tulonga Bible ne bantu ba mishindu yonso kakuyi kansungasunga.—Mat. 10:8; Bien. 10:34, 35; Buak. 22:17.
—Tudi balongesha bimpe bua kuambuluisha bantu mu nyuma: Ku diambuluisha dia dilonga dietu dia Bible dia muntu pa nkayende ne dishidimuja difila mu bisangilu bia tshisumbu, mu mpuilu, ne mu mpungilu, tudi tupeta dilongesha ditungunuke dia teokrasi didi kadiyi kutua mushinga ne didi dituambuluisha bua kukenkesha bakuabu mu nyuma.—Yesh. 54:13; 2 Tim. 2:15; 1 Pet. 3:15.
—Tudi tuangata bulelela ne mushinga, tubutumikila mu nsombelu wetu wa dituku dionso: Bua dinanga ditudi nadi bua Nzambi, tudi tuenza mashintuluka, tuenza bua nsombelu wetu umvuangane ne disua diende. Bumuntu buetu bupiabupia bufuane bua Kristo budi bukoka bantu bakuabu ku bulelela.—Kolos. 3:9, 10; Yak. 1:22, 25; 1 Yone 5:3.
—Tudi tudienzeja bua kusomba ne kuenza mudimu ne bakuabu mu ditalala: Kukolesha ngikadilu ya buena Nzambi kudi kutuambuluisha bua kudikanda mu bienzedi bietu ne mu ngakuilu wetu. Tudi ‘tukeba ditalala ne tudilonda’ ne bantu bonso.—1 Pet. 3:10, 11; Ef. 4:1-3.
2 Bilejilu bia nsombelu mulenga wa Buena-nkristo bidi bantu bamona mu bulongolodi bua Yehowa bidi bisaka bavule ku ditaba bulelela. Tshilejilu tshietu tshikaleku ne buenzeji bua muomumue kudi bantu badi batumanye ne badi batumona.