TSHIBUTSHILU TSHIA MIKANDA TSHIA KU ENTERNETE tshia Watchtower
TSHIBUTSHILU TSHIA MIKANDA TSHIA KU ENTERNETE
tshia Watchtower
Tshiluba
  • BIBLE
  • MIKANDA
  • BISANGILU
  • km 12/98 dib. 3-4
  • Ashila nsombelu webe pa mudimu wa Yehowa

Kakuena filme nansha umue mu tshitupa etshi to.

Tshilema ntshienzeke mu diambula dia filme.

  • Ashila nsombelu webe pa mudimu wa Yehowa
  • Mudimu wetu wa Bukalenge—1998
  • Bintu bia muomumue
  • Enza programe muimpe bua dîku dienu
    Mudimu wetu wa Bukalenge—2005
  • Udi mua kuenza mudimu wa bumpanda-njila anyi?
    Mudimu wetu wa Bukalenge—1998
  • Mêku: Samunayi Nzambi mu tshisumbu tshiende
    Tshibumba tshia Nsentedi tshidi tshimanyisha Bukalenge bua Yehowa—1999
  • Mudi bena dîku bambuluishangana menemene—Mu dilonga dia Bible
    Mudimu wetu wa Bukalenge—1999
Tangila bikuabu
Mudimu wetu wa Bukalenge—1998
km 12/98 dib. 3-4

Ashila nsombelu webe pa mudimu wa Yehowa

1 Yezu wakafuanyikija bamuteleji bende ne bibaki babidi bashilangane. Umue wakashila nsombelu wende pa dibue dia butumike kudi Kristo ne wakakandamena tshipepele tshia buluishi ne makenga. Mukuabu yeye wakashila mu lusenga lua dipanga butumike dia budisui ne wakapanga bua kushala muimane pakamuluila ntatu. (Mat. 7:24-27) Mutudi ku nshikidilu kua ndongoluelu eu wa malu, tudi tupetangana ne bipepele bivule bia buluishi. Tudi mua kumona mavuba a dikenga dinene adi akuatshisha buôwa adikungija ne lukasa luonso. Netunanukile too ne ku nshikidilu mu ditabuja dietu dijima anyi? (Mat. 24:3, 13, 21) Bidi bilonda nangananga mushindu utudi tuasa nsombelu wetu mpindieu. Nunku, bidi bikengela kudiebeja ne mitalu ne: ‘Ndiku ngashila bikole nsombelu wanyi wa buena-nkristo pa mudimu wa butumike kudi Nzambi anyi?’

2 Kuashila nsombelu wetu pa mudimu wa Yehowa kudi kumvuija tshinyi? Mmuomumue ne: kuenza bua Yehowa ikale nshindamenu menemene wa nsombelu wetu. Kudi kumvuija kabidi kushindamena pa Bukalenge bu diditatshisha dietu dia kumpala. Kudi kulomba kutumikila Nzambi mu malu onso a mu nsombelu wetu wa dituku dionso. Bidi bilomba kudifila ne mutshima mujima mu dilonga dia Bible dia muntu pa nkayende, dia mu dîku, ne dia mu tshisumbu ne kudifila mu mudimu wetu wa budimi, kubivuija malu etu a kumpala mu nsombelu. (Muam. 12:13; Mat. 6:33) Nsombelu wa nunku mushindame ne wa butumike udi ulela ditabuja dikole bu dibue dikala kadiyi mua kubumbuka kumpala kua tshipepele kayi tshionso tshia buluishi.

3 Bidi bienza disanka bua kumona miliyo ya bantu bashila ne dieyemena dionso nsombelu wabu ne ditekemena diabu pa mudimu wa Nzambi, anu bu muakenza Yezu. (Yone 4:34) Mbalamate ku ndongamu mukumbane wa midimu ya teokrasi ne bu tshipeta badi bamona mabenesha a bungi. Mamu umue wakumvuija mudibu yeye ne bayende bakoleshe bimpe bana babu babidi ba balume mu mudimu wa Yehowa, wamba ne: “Tuvua buuje bulelela mu nsombelu wetu​—pa kubuela mu mpungilu yonso, kulongolola bisangilu ne kubuelamu, ne pa kuvuija mudimu wa budimi tshibidilu mu nsombelu wetu.” Bayende wakasakidila ne: “Bulelela ki ntshitupa tshia nsombelu wetu to, budi nsombelu wetu. Malu makuabu onso mmashindamenepu.” Udiku pebe muenze bia muomumue pa kuteka mudimu wa Yehowa kumpala menemene kua malu onso mu dîku diebe anyi?

4 Longolola ndongamu wa ku lumingu udi mukuakanyine: Bulongolodi bua Yehowa budi butuambuluisha bua kulonda ndongoluelu muimpe wa mu nyuma pa kuteka bisangilu bitanu ku lumingu. Bena nkristo badi bashila nsombelu wabu pa ntendelelu wa Yehowa badi bakaja midimu yabu ya ku mubidi ne ya mu dîku bua kumona mua kubuela mu bisangilu bionso ebi bia mushinga mukole. Kabena balekela malu a mushinga mukese apumbisha dibuela diabu mu bisangilu pa tshibidilu nansha.​—Filip. 1:10; Eb. 10:25.

5 Bena nkristo bapie mbamanye ne: anu mudibi ne mushinga bua kuikala ne tshibidilu tshia kudia biakudia pa dîba kampanda dituku dionso, bidi kabidi ne mushinga wa bungi bua kuikala ne ndongamu mujalame bua dilonga dia muntu pa nkayende ne dia mu dîku pamue ne didilongolola bua bisangilu. (Mat. 4:4) Udiku mua kuteka dituku dionso minute 15 anyi 20 ku luseke bua dilonga diebe nkayebe anyi? Nsapi munene mu bualu ebu ndibenga kulekela malu makuabu alua kuiba dîba diteka ku luseke bua dilonga. Divuija tshibidilu. Ebi bidi mua kukulomba bua kujuka dituku dionso pa dinda menemene kupita muutu wenza mpindieu. Bantu 17 000 bena mu dîku dia Betele pa buloba bujima batu bajuka pa dinda menemene bua kukonkonona mufundu wa dituku. Bushuwa, bua kujuka pa dinda bidi bikengela kuteka dîba diakanyine dia kulala butuku, bua kumona mua kutuadija bimpe dituku didi dilonda ne makanda a mubidi.

6 Biwikala mfumu wa dîku, angata dipangadika dia kuteka ne kulongolola ndongamu wenu wa mu dîku wa malu a teokrasi. Bena mu mêku makuabu batu babala pamue Bible, mukanda wa Annuaire, peshi mukanda mukuabu kunyima kua didia dia dilolo padibu biikisha. Baledi ba bungi bena bana badi bakole ne balue bena nkristo bashindame mu nyuma batu bamba ne: bualu bumue butu buambuluishe ku bipeta biabu bimpe buvua tshibidilu tshia mu dîku tshia kulama dilolo dimue ku lumingu divuabu bapitshisha pamue tshikondo tshimpe tshidi tshikolesha mu nyuma. Tatu umue wakamba ne: “Ndi mmona se: dikola dia mu nyuma dia bana betu balela divua nangananga bua dilonga dietu dia mu dîku dia pa tshibidilu mu Disatu dionso ku dilolo, dituadija kukadi bidimu bitue ku 30.” Bana bende bonso basatu bakatambula batshidi bana, ne pashishe bonso basatu bakaditua mu mudimu wa ku dîba ne ku dîba. Pa kumbusha dilonga dia mu dîku, nudi mua kuambulula midimu ya dienza mu bisangilu anyi maleja a mu mudimu wa budimi, ne nudi mua kuenza midimu mikuabu mimpe pamue.

7 Mu ndongamu webe wa ku lumingu, udiku ‘mudisumbile tshikondo’ bua kufila bumanyishi bua Bukalenge anyi? (Kolos. 4:5) Bavule ba kutudi tudi ne malu a bungi, tudi ne majitu a mu dîku ne a mu tshisumbu a kutabalela. Bituapanga bua kudilongolola biakane bua kudifila mu mudimu wa diyisha ne dilongesha lumingu luonso, nebipepele bua malu makuabu kutshiamakanawu kumpala kua mudimu eu wa mushinga mukole. Muntu kampanda muena muaba munene wa dimunyina nyama wakamba ne: “Mu 1944 ngakajingulula se: mushindu umuepele umvua mua kuenza bua kupatuka mu buambi uvua wa kulama dituku dimue ku lumingu bua mudimu eu. Too ne ku mpindieu ntu amu ngangata dituku dimue mu lumingu bua mudimu.” Mukulu umue muena nkristo wakamona se: kuikala ne ndongamu mujalame wa bumanyishi kudi kumuambuluisha bua kufika ku mêba 15 ku ngondo mu mudimu wa buambi. Padi bualu bukuabu bua kuenza bumufikila mu Disambombo, udi ulua kubuenza kunyima kua mumane kuenza mudimu wende wa buambi mu dinda. Wewe ne dîku diebe nudiku mua kuteka nansha dituku dimue ku lumingu bua mudimu, pa kuuvuija bu tshitupa tshia nsombelu wenu wa mu nyuma anyi?​—Filip. 3:16.

8 Konkonona bibidilu bia mu nsombelu webe: Kudi malu adi apumbisha diashila nsombelu wetu pa mudimu wa Yehowa. Malu kaayi matekemena adi mua kunyanga ndongamu wetu mulongolola ne ntema wa kulonga, wa bisangilu ne buambi. Ne muluishi wetu, Satana, neenze muende muonso bua ‘kutupumbisha’ ne kutunyangila malu. (1 Tes. 2:18; Ef. 6:12, 13) Kulekedi bipumbishi ebi bikutekesha mu maboko, bikufikisha ku dilekela nansha. Enza makajilula onso adi akengedibua bua kukumbaja midimu yebe milongolola ya teokrasi. Bidi bikengela dipangadika ne dinanukila bua kukumbaja bualu budi buikale bushuwa ne mushinga.

9 Katuena ne bua kulekela buenzeji bua bena panu ne bua mubidi wetu mupange bupuangane bibueja mu nsombelu wetu midimu idi kayiyi ya mu nyuma idi mua kutuadija kutujimijila dîba divule ne ntema yetu. Didikonkonona didi ne mushinga, mu didiela nkonko ya nunku: ‘Nsombelu wanyi udi wenda ujimija nkatshinkatshi peshi usesuka ku tshipatshila tshiende, bu muvuabi kumpala anyi? Ndi mutuadije kuashila nsombelu wanyi pa malu a panu adi enda apita anyi? (1 Yone 2:15-17) Ntu njimija dîba bule kayi mu malu anyi nkayanyi, mu ngendu ya dijikija mukodi, mu manaya, peshi mu malu makuabu a dijikija lutetuku​—bu mudi dîba dipitshisha mu ditangila televizion anyi dikebulula bintu mu Internet—​pa kuelekeja ne dîba dipitshisha mu midimu ya mu nyuma?’

10 Wewe mumone ne: nsombelu webe mmujingakaja kudi malu a bungi adi kaayi a mushinga, ntshinyi tshidi tshikengela kuenza? Anu bu muakasambila Paulo bua bana babu “balengejibue,” anyi “bapingane mu mulongo,” bua tshinyi kubenga kusambila Yehowa bua kupeta diambuluisha bua kushindamena kabidi pa mudimu wende? (Note kuinshi bua 2 Kol. 13:9, 11, NW) Pashishe wikale musuminyine bua kukumbaja dipangadika diebe ne kuenza makajilula adi akengedibua. (1 Kol. 9:26, 27) Yehowa neakuambuluishe bua wepuke disesuka ku dia balume anyi ku dia bakaji mu mudimu uudi umuenzela mu butumike.​—Fuanyikija ne Yeshaya 30:20, 21.

11 Ikala ne bia bungi bia kuenza mu mudimu wa disanka wa Nzambi: Bantu miliyo badi mu dikeba dia masanka kabayi ne ditekemena ne batu bafika anu ku dimona se: padi muoyo usemena ku nshikidilu kuawu, bintu bivuabu bakebakeba ne dizukila ki mbibatuadile disanka dia mutantshi mule to. Bivua anu ‘kuipata kua lupepele.’ (Muam. 2:11) Ku lukuabu luseke, bikala Yehowa ke udi mu tshialu mu nsombelu wetu, ‘tumuteka kumpala kuetu misangu yonso,’ tudi tupeta disankishibua diondoke. (Mus. 16:8, 11) Bidi nanku bualu tudiku anu bua Yehowa. (Buak. 4:11) Kabuyi buende yeye Mulongolodi Munene, muoyo kauvua mua kuikala ne tshipatshila nansha. Kusadila Yehowa kudi kuuja nsombelu wetu ne mudimu wa bunême, udi ne tshipatshila ne ukuatshisha bakuabu ne tuetu kabidi mu mushindu udi unenga, eyowa, bua kashidi.

12 Bidi ne mushinga bua kuepuka dinangila malu ne dijimija mmuenenu wetu wa mitalu pa bidi bitangila nshikidilu wa bulongolodi bua Satana udi usemena ne lukasa luonso. Mmuenenu wetu wa matuku atshilualua udi ne buenzeji pa nsombelu wetu wa dituku dionso. Bantu ba mu tshikondo tshia Nowa, bavua kabayi bele meji ne: mvula wa kabutu nealue pa buloba bujima, “kabakamanya bualu,” bakashindamijila nsombelu wabu wa ku dituku dionso pa malu abu nkayabu​—badia, banua, ne baselangana—​too ne pakalua mvula wa kabutu “kubabutula.” (Mat. 24:37-39) Lelu’eu, bantu badi bashindamijila nsombelu wabu pa malu a panu nebamone mudi matekemena abu bua matuku atshilualua avingutuka onso kumpala kuabu dîba dia kabutu katambe bunene katu bantu kabayi banji kumona, “dituku dia Yehowa.”​—2 Pet. 3:10-12, NW.

13 Tungunuka nunku mu diashila nsombelu webe pa Nzambi wa muoyo, Yehowa, ne mu dienza disua diende. Kakuena bualu butambe bulenga buudi mua kuenza mu nsombelu eu bu dikala ne Yehowa bu Mukuatshishi wa kueyemena. Kêna mua kushima to​—neakumbaje malaya ende. (Tito 1:2) Kêna mua kufua​—tshintu tshieyeka Yehowa ki ntshijimija nansha. (Hab. 1:12; 2 Tim. 1:12) Nsombelu wa butumike ne ditabuja utudi tuasa mpindieu udi anu mbangilu wa nsombelu washala bua kashidi mu mudimu wa musangelu wa Nzambi wa disanka!​—1 Tim. 1:11; 6:19.

[Lungenyi lunene lua mu dibeji 3]

“Bulelela ki ntshitupa tshia nsombelu wetu to, budi nsombelu wetu. Malu makuabu onso mmashindamenepu.”

    Mikanda ya mu Tshiluba (1982-2024)
    Patuka
    Buela
    • Tshiluba
    • Tumina bakuabu
    • Biudi musue
    • Copyright © 2025 Watch Tower Bible and Tract Society of Pennsylvania
    • Malu a kulonda
    • Mikenji ya mua kulama malu masokoka
    • Biudi witaba bua kuenzekabi mu tshiamu
    • JW.ORG
    • Buela
    Tumina bakuabu