“Dîyi dia mulayi dia Nzambi” Mpungilu wa Distrike wa Bantemu ba Yehowa bua 1999
1 Pavua bena Isalele mu tshipela, Yehowa wakatumina Mose dîyi bua kuenzaye mpungi ibidi ya tshiamu tshia argent. Pavuabu bela mpungi anu umue, bamfumu ba bisa bavua ne bua kudisangisha ku tshibueledi tshia ntenta wa kusambakena. Pavuabu bela mpungi ibidi, bena Isalele bonso bavua ne bua kudisangisha. (Nom. 10:1-4) Lelu’eu, katuenaku ne musangelu bua kumvua dimanyisha dia mpungilu wetu wa distrike, didi bu mpungi muela anyi? Mu mpungilu yetu, Yehowa utu utushidimuja ne utupa mibelu ku diambuluisha dia Dîyi diende ne dia baleji-mpala bende batekibue. Ditushidimuna edi didi dituambuluisha bua kushala balamate ku mudimu wa Nzambi. Katuenaku ne disanka dia kumona binunu, pamu’apa mene makumi a binunu bia batendeledi ba lulamatu badisangisha mu dinanga ne ditalala anyi? Kakuyi mpata bidi nanku!—Mus. 122:1, 7, 8.
2 Mu Tshimungu too ne Kabitende 1998, Mpungilu ya Distrike 58 ya “Njila wa muoyo wa Nzambi” ivua milongolola bua kuenzekayi mu misoko 56 ya mu teritware wetu. Bua nsombelu udi mu République démocratique du Congo, kabavua benze mpungilu 7 mu tshikondo tshimana kulongolola. Ne diambuluisha dia Yehowa, tudi batekemene bua kuenza mu matuku makese emu mpungilu 7 idi mishale. Tudi tunuela kalumbandi ne muoyo mujima bua dikima dienu bua kudisangisha nansha munkatshi mua ndululu ne ntatu bidiku mpindieu. Luapolo idi ileja ne: bantu ba bungi, nansha mêku majima ne balema kabidi, bavua benze ngendu mile ku makasa bua kubuelamu. Bamue bavua bende matuku a bungi, pamu’apa mene mbingu. Muanetu kampanda wa balume udi mpofo uvua muende kilometre 260 ku makasa bua kubuela mu mpungilu wa distrike ku Mbuji-Mayi. Utu wenza nunku tshidimu tshionso. Madikolela avuaye muenze aa avua ne mushinga anyi? Eyowa! Bateleji bonso bavua ne disanka dia ‘kukoleshangana mitshima, batamba kuenza nunku bualu bua badi bamona dituku disemena pabuipi.’ (Ebelu 10:24, 25) Muanetu mukuabu wa balume wakamba ne: “Masangisha aa a mu nyuma avua makankamije bantu bonso.” Mu 1999, mu mpungilu wetu wa distrike, netuikale kabidi ne bikondo bikuabu bia disanka pamue ne bawetu ba mushinga mukole ne kuela Yehowa tuasakidila bua buobumue budiye utupesha.
3 Dianjilayi kudilongolola bimpe bua kuikalaku mu matuku asatu a didia edi dilenga dia mu nyuma, kutuadijila ku musambu wa mbangilu too ne ku disambila dia nkomenu. Misangu mivule, mpungilu udibu banulomba bua kubuela ng’udi pabuipi ne muaba unudi basombele. Société mmuenze madikolela a bungi bua kunupepejila malu pa muanda eu. Mbasakidile miaba mipiamipia inayi yenzekela mpungilu ku eyi ya tshidimu tshishale bua kupetesha yonso wa kutudi mushindu wa kudia biakudia bia mu nyuma ebi pamue ne bena diende bonso. (Dut. 31:12) Miaba ayi ng’eyi: Nyabihanga ku Burundi, Luiza mu Kasaï Occidental, Basankusu ne Bosondjo ku Équateur. Mpindieu ke tshikondo tshia kuela meji ku tshinudi mua kuenza bua kukumbaja makuta adi akengedibua bua luendu luenu bonso. Bua kuleja dianyisha bua madikolela menza kudi Société, tudi batekemene se: muntu yonso neabuele mu mpungilu udi tshijengu tshiende tshibikila. Kadi biwikala ne kabingila kampanda kakanyine bua kuya kubuela mu mpungilu mukuabu, udi mua kuya.
4 Pawangata mapangadika bua kubuela mu mpungilu, uleje dinanga pa kuvuluka aba badi bakengela diambuluisha, nangananga aba badi batuadije kusankidila bulelela mu matuku makese, bua kubuelabu pabu mu bitupa bionso. Mbiakane bua kukonkonona mamanyisha adi mu tshisakidila etshi ne bantu badi balonga nebe Bible ne badi badilongolola bua kubuela mu mpungilu. (Gal. 6:6, 10) Mu Ditanu ne mu Disambombo, mpungilu neatuadije ne mijiki pa dîba 9:30 mu dinda ne neajike pa dîba 5 mu mapingaja. Tshitupa tshia mu Dia lumingu mu dinda netshituadije pa dîba 9:30 ne mpungilu neajike pa dîba 4 mu mapingaja. Mamanyisha adi alonda aa neanuambuluishe mu didilongolola dienu.
5 Pa tshibidilu, miaba ya kulala idi ifidibua ku nzubu ya bantu. Tudi ne bua kuleja dianyisha kudi bana betu badi bitaba bua kutupesha miaba ya kulala. Kabidi, kabiakuikala bimpe pikala aba badibu bakidile mushindu eu banyanga malu pa kulomba bua kubatekabu matuku a bungi kumpala anyi kunyima kua mpungilu. Miaba ya kulala mmifila anu bua matuku a mpungilu. Aba badibu bapeshe miaba ya dilala badi ne bua kunemeka bintu bia muena nzubu, kabanyangi tshintu, kabikadi baya mu miaba idibu kabayi babikidibue, ne nebatabalele bua bana babu benze bia muomumue. Bikala bena nzubu bapete lutatu kampanda pa bualu ebu, badi ne bua kumanyisha diakamue tshibambalu tshia miaba ya kulala, tshine etshi netshikale ne disanka dia kufila diambuluisha. Dienda bimpe ne bipeta bimpe bia mudimu wa tshibambalu tshia miaba ya kulala mbishindamene pa dieleshangana diboko dia bantu bonso. (Eb. 13:17) Tuvua bapete luapolo ne: bamue badi babenga ku budisuile miaba ya kulala mibapesha ne baya miaba mikuabu idi pamu’apa mulunda kampanda anyi muntu kansanga mumanyangana nende. Ebi bidi bikondakaja mudimu wa bana betu ba mu tshibambalu tshia miaba ya kulala. Tudi tunulomba bonso bua kuambuluishangana ne tshibambalu etshi.
6 Bakulakaje peshi balema, basadidi ba ku dîba ne ku dîba ne bakuabu badi pamu’apa dijinga ne diambuluisha bua kubuela mu mpungilu. Bena mu mêku abu, bakulu peshi bena mu tshisumbu badi bamanye nsombelu wabu badi mua kuleja dinanga mu dienza tshidi tshikengedibua, kadi ki mbimpe kushila bana betu badi balombola mpungilu bujitu ebu to.—Tangila 1 Timote 5:4.
7 Kakuyi mpata, Yehowa udi ukuatshisha malu menza bua mpungilu ya ku tshidimu. Bu mudibi ne: bana betu ba bungi batu benza luendu bua kuya ku mpungilu wa distrike batu dijinga ne miaba ya kulala, tudi mua kuikala ne dishindika dia se: Yehowa neakumbaje majinga abu mudibi biakanyine. Bu mudi malu aa masuikakaja ku ntendelelu mulelela, tudi ne bua kulonda ne disanka mêyi-mashidimunyi mafila. Tulejayi ne: tudi bena lulamatu mu bidi bikese; nenku netuikale mua kupeta masanka a bungi adi mindile badi Yehowa munange.—Luka 16:10.
8 Tudi tunukankamija bua kuangata mapangadika anu ku mpindieu bua kuikalaku matuku asatu a Mpungilu wa Distrike wa “Dîyi dia mulayi dia Nzambi” bua 1999. Anu bu nuenu, tudi bindile ne muoyo kulukulu bua kuteleja ‘mbila ya disanka ne misambu ya kutumbisha nayi’ Yehowa ya kudi batendeledi bende badi mu buobumue. (Mus. 42:4) Yehowa abenesheku malongolola onso menza bua kutuvuija babanji mu nyuma!
[Kazubu mu dibeji 3]
Ndongamu
Ditanu ne Disambombo
9:30 mu dinda – 5:00 mu mapingaja
Dia lumingu
9:30 mu dinda – 4:00 mu mapingaja
[Kazubu mu dibeji 5]
Amue malu a kuenza bua kubuela mu mpungilu ya “Dîyi dia mulayi dia Nzambi”
1. Biwikala ne bua kuenza luendu lule bua kubuela mu mpungilu, ubangishe kulama makuta a kudifutshila njila pamue ne dîku diebe, ne kabidi a kudia.
2. Ela kabidi meji a kuambuluisha ku dilongolola dia mpungilu ne mapa ebe a budisuile. ‘Kumueneki ku mêsu kua Yehowa bianza bitupu,’ kadi ‘umutumbishe ne biuma biebe.’—Dut. 16:16; Nsu. 3:9.
3. Netutumbishe kabidi dîna dia Yehowa pa kuikala ne bienzedi bimpe, mvuadilu mulenga ne muakanyine dîba dia mpungilu.—1 Kol. 10:31.
4. Ikala mupangadije bua kueleshangana diboko ne bana betu badi benza mudimu wa bulongame. Kulami miaba patupu to, kadi udi mua kulamina bena dîku diebe ne baudi muende nabu miaba.
5. Mêba a diikisha, mbimpe kudia bintu bipepele bua kumona mua kuteleja bilenga tshitupa tshia mu mapingaja tshia ndongamu. Kudia kukuta bikole kutu kufila tulu.—Luka 8:18.
6. Mankenda atu apa Yehowa lumu. Ku ndekelu kua tshitupa tshionso, muntu yonso neafile diambuluisha bua muaba wa mpungilu ushale ne mankenda pa kuangula mabeji ne bintu bikuabu bia bukoya ne kubiela mu miaba mibilongoluela.—1 Pet. 1:15, 16.