Divuluka lufu lua Kristo pa buloba bujima
1 Yehowa mmutulokeshile mapa a bungi a dikema. Tshipeta tshinene tshia buimpe buende ne bulenga buende bua dinanga ntshiumvuija ne bukole buonso bu ‘kupa kuende kudi kakuyi mua kuambibua.’ Eyowa, “bulenga bukena butuakanyine bua Nzambi” mbua dikema ne kubumvuija nkupite makokeshi etu.—2 Kol. 9:14, 15, NW.
2 Dipa diende ditambe bunene: Yezu Kristo, Mupikudi wa bukua-bantu, ke udi dipa ditambe bunene ku onso. Mu dileja dinanga diende dinene bua bukua-bantu, Yehowa wakafila Muanende munanga ne umuepele mulela. (Yone 3:16) Dibenesha dikena dituakanyine dia mushindu’eu dia kudi Nzambi ndiakanyine bua kudivuluka pa buloba bujima. Netudivuluke tshikondo kayi ne mushindu kayi? Mu dilolo dia Dinayi dia 1 Tshisanga 1999, bena Kristo nebavuluke pa buloba bujima Didia dia Dilolo dia Mukalenge, basekelela Tshivulukilu tshia mulambu mutambe bunene ku yonso.—1 Kol. 11:20, 23-26.
3 Kristo wakafua bua bualu buetu “tuetu batshikale benji ba bibi,” ne tudi mua kuleja dianyisha dietu pa kusekelela Tshivulukilu tshia lufu luende ne pa kubikila bakuabu bua kuikalabu pamue netu mu tshikondo atshi tshia mushinga mukole.—Lomo 5:8, Mukanda wa Mvidi Mukulu.
4 Bualu bua mushinga mutambe bukole: Disekelela lufu lua Kristo didi nangananga diela kashonyi pa bualu bua ne: wakabingisha bumfumu bukulu bua Nzambi bimpe menemene. Didi kabidi dituvuluija ne: tudi mua kumueneka bakezuke ku mêsu kua Yehowa pa kuleja ditabuja mu mulambu wa Yezu, nunku tutuishibua bua kupeta lupandu. (Bien. 4:12) Bushuwa, ebu mbualu bua mushinga mutambe bukole bua tshidimu!
5 Tudi tuleja dinanga bua bantu netu mu dibabikila bua kulua kusekelela pamue netu Didia dia Dilolo dia Mukalenge. Masanka a tshia-bupikudi adiku bua miliyo ya bantu badi balonga bua kumanya mushinga watshi mulenga. (Filip. 3:8) Aba badi baleja ditabuja mu mulambu wa Kristo badi mua kupeta ditekemena dishindame dia muoyo wa kashidi.—Yone 17:3.
6 Tshikondo tshia Tshivulukilu tshidi tshitupetesha mishindu ya pa buayi ya kuleja dianyisha bua bulenga bukena butuakanyine bua Nzambi budi bupite bionso. Etshi ntshikondo tshimpe menemene tshia kudifila ne lukunukunu mu diyisha lumu luimpe lua Bukalenge bua Nzambi. Masanka manene mmindile bonso badi bela meji ne muoyo umue bua dipa diende dia mushinga mupite bukole ne badi badiakaja bua kuikalaku mu disekelela dia Didia dia Dilolo dia Mukalenge tshidimu etshi.