Babikilayi

¹ Badi bamanyisha mpindieu mu matunga 233 pa buloba bujima dibikila bantu divua lubila luadi luela kukadi nkama ya bidimu: ‘Luayi bienu, tubande ku mukuna wa Yehowa, bua yeye atuyishe bienzedi biende, ne bua tuetu tuende mu njila yende.’ (Yesh. 2:3) Kulombola bantu ku bulongolodi bua Yehowa ng’umue wa ku mishindu mitambe buimpe itudi mua kubambuluisha bua kudiundabu mu nyuma ne kufika ku muoyo wa kashidi.

² Bamue bamanyishi badi mua kuelakana bua kubikila bantu ku Nzubu wa Bukalenge bindila anu too ne padibu bamueneka bele ndambu wa bidia mu dilonga dia Bible dia ku nzubu. Kadi, imue misangu bantu badi mua kutuadija kulua mu bisangilu bia tshisumbu nansha kumpala kua kutuadijabu kulonga Bible. Katuena ne bua kujanguluka bua kuenza dibikila edi ne luya ne kukankamija bantu bua balue mu bisangilu to.

³ Bualu bua kuenza: Kuatayi mudimu bimpe ne tubeji tua dibikila bua kumanyisha bantu bua bisangilu bietu. Lejayi ne: kabatu balomba makuta bua kubuela mu bisangilu ne kakutu disangisha dia makuta to. Umvuijayi mutu bisangilu bienzeka. Bambilayi mu butoke ne: bisangilu ebi bitu dilonga dia Bible dia bushuwa ne kabidi batu bapetesha bantu bonso malu a kulonga bua balonde pamue dilonga. Kokayi ntema yabu ku dishilangana dia nshidimukilu ne nsombelu ya bantu badi babuelamu. Lejayi ne: badi batantshila bisangilu mbantu ba muaba unudi ne kabidi bana ba bukole buonso mbanyishibue bua kuluamu. Tudi ne bua kubikila batudi tulonga nabu, tuleja disua dia kubambuluisha mu mishindu yonso bua kubuela mu bisangilu.

⁴ Bumue bua ku malu a ndekelu maleja mu Bible ndibikila bantu ne musangelu bua kudia biakudia bia muoyo bilongolola kudi Yehowa: ‘Nyuma ne mukaji musela badi bamba ne: Lua! Ne udi ne nyota, alue biende; udi musue, angate mâyi a muoyo tshianana.’ (Buak. 22:17) Kakuena bualu budi mua kupingana pa muaba wa dibikila bantu bua kubuela mu bisangilu.

⁵ Yeshaya 60:8 udi uleja mu mulayi nkama ya binunu ya basamunyi bapiabapia badi balua mpindieu mu bisumbu bia bantu ba Yehowa bu nyunyu ya nkutshi, ‘baya lukasa bu ditutu, bu nyunyu ya nkutshi idi ibuela pa masoso a nzubu wayi.’ Buonso buetu tudi mua kubikila bapiabapia bua babuele mu bisangilu bietu ne kuenza bua badiumvue bakidila bimpe. Mu dienza nunku, netuenzejangane mudimu ne Yehowa udi wendesha lukasa mudimu eu wa disangisha dia bantu.​—Yesh. 60:22.