“Ntshinyi tshindi ne bua kuenza?”

¹ Muudi nsonga ne wenda ukola mutangile ku bukulumpe, udi mua kudikonka ne: ‘Ntshinyi tshindi ne bua kuenza mu matuku anyi a muoyo?’ Bansonga bena Kristo batu bajinga kualabaja mudimu wabu wa Yehowa mu buambi. Kadi mmunyi muudi mua kuenza nunku eku wambula majitu a bukulumpe, adi akonga didipetesha bintu biudi ukengela ku mubidi? Bidi mua kuikala bikole bua kupeta diandamuna.

² Bamue bansonga badi bumvua buôwa padibu batangila nsombelu wa bubanji ne malu adi mua kuenzeka mu matuku adi kumpala. Badi badikonka ne: ‘Ndi ne bua kuya kule mu dilonga dia tulasa anyi? Ndi ne bua kutuadija diakamue mudimu wa ku dîba ne ku dîba anyi?’ Bua muntu kuangataye dipangadika dimpe, udi ne bua kuandamuna mu bululame ku lukonko elu: ‘Ntshipatshila kayi tshinene tshindi natshi?’ Udi ne bua kukonkonona tshidi tshimusaka mu muoyo wende.

³ Ntshipatshila kayi tshinene tshiudi mudifundile mu bunsonga buebe? Udi utamba kutuma lungenyi ku dikeba dia biuma anyi, peshi udi bushuwa musue kutuma bipatshila bia Bukalenge kumpala mu nsombelu webe? Kubuela mu bilongelu bibandile ki ntshijadiki tshia ne: mudimu neupeteke kakuyi lutatu to. Pamutu pa kulonga tulasa tubandile, bantu ba bungi mbapete mamanya adibu bakebela bantu ku mudimu ku diambuluisha dia ndongamu ya dilonga midimu, tulasa tua mudimu kampanda wa bianza, anyi malonga a tshikondo tshîpi mu tshilongelu kansanga adi alomba dîba ne madikolela makese.

⁴ Eyemena dilaya dia Yehowa: Bualu bua mushinga mukole menemene bua kuvuluka ndijadika dia kudi Yehowa Nzambi dia ne: neakumbaje majinga a badi bateka bipatshila bia Bukalenge pa muaba wa kumpala mu nsombelu wabu. (Mat. 6:33) Edi ki ndilaya dipange nshindamenu to. Bana betu ba bungi badi babuela mu Kalasa ka Dilongesha Mudimu bavua balonge mu bilongelu bibandile bangabanga ne kulongabu bulelela. Kadi mmudimu kayi wa ku mubidi uvuabu benza? Bakese patupu ke bavua benza mudimu uvuabu balonge mu tulasa. Ba bungi bavua badienzela midimu ya dilongolola bintu, bakumbaja biakane majinga abu a mfranga eku benza mudimu wa bumpanda-njila. Mu dialabaja mudimu wabu wa buambi, badi bapeta mabenesha a bungi kupita tshionso tshidi makuta mua kutuala.

⁵ Mu dipangadija tshiudi ne bua kuenza pawajikija tulasa tua tshikadilu, ukonkonone malu onso bimpe ne tshidi tshikusaka mu muoyo webe. Bua kuikala ne mmuenenu wa nkatshinkatshi mu disungula diwenza, bala mamanyisha adi mu Réveillez-vous! wa mu dia 8 Luabanya 1998, mabeji 19-21. Yukila ne baledi bebe, bakulu, mutangidi wenu wa tshijengu, ne bampanda-njila ba muaba uudi badi ne disanka mu mudimu wabu. Nebikuambuluishe bua kuangata dipangadika dia meji pa tshiudi ne bua kuenza mu nsombelu webe.​—Muam. 12:1, 13.