Mudi bena dîku bambuluishangana menemene​—Mu mudimu wa buambi

¹ Mbualu kayi budi mua kusanguluja bikole mutshima kupita kumona balume ne bakaji babu, baledi ne bana babu benza pamue mudimu wa bena Kristo, basamuna patoke dîna dia Yehowa? (Mus. 148:12, 13) Mêku onso adi ne bua kuikala ne ndongamu muimpe wa dipatuka pa tshibidilu mu mudimu wa buambi. Dîku diebe didiku ne dituku dijadika mu lumingu luonso dia kupatuka mu buambi anyi? Bikalabi nanku, muntu yonso mmumanye bimpe tshidi tshikengela kuenza ne udi mua kudifila bikole.​—Nsu. 21:5a.

² Bua tshinyi kubenga kuikala ne tshibidilu tshia kulongolola pamue maleja enza nawu dîku mudimu mu buambi kumpala kua dituku dijadika bua buambi? Bikondo bia diambulula bidi mua kuambuluisha bikole, ne bidi mua kujula lungenyi lulelela lua kueleshangana diboko mu dîku. Padi dîku diditatshisha bua mudimu wa buambi ne benamu bonso badiakaja bimpe, kudi difutu dilenga bushuwa.

³ Mutangidi kampanda muena ngendu wakapatuka ne dîku kansanga dijima mu mudimu wa difila bibejibeji. Pavuaye uyisha ku nzubu ne ku nzubu pamue ne umue wa ku bana ba bakaji ba mu dîku adi, yeye eu wakamukonka ne: “Neuyishe nanyi mutantshi bule kayi?” Ne pashishe kumvuijaye mutangidi ne: neapatuke ne tatuende kunyima. Bivua bimueneke ne: yeye ne tatuende bavua basue bushuwa dienza diabu dia mudimu pamue. Ndungenyi luimpe kayipu mu dîku edi!

⁴ Amue mêku adi mua kuikala ne mushindu wa kuenza pamue bumpanda-njila buambuluishi ngondo umue mu tshidimu. Peshi kudi mua kuikala mushindu bua muntu nansha umue mu dîku kutungunukaye ne kusadila bu mpanda-njila muambuluishi anyi mene kulua mpanda-njila wa pa tshibidilu. Padiku dilongolola dimpe dia malu ne diambuluishangana, pamu’apa bena mu dîku bonso badi mua kupeta mushindu wa kuvudija mudimu wabu mu buambi pa kukuatshisha muena mu dîku udi mpanda-njila. Dîku nedibeneshibue bushuwa bua mudimu muvule eu ne bua malu mamonamona mimpe mu buambi.​—Mal. 3:10.

⁵ Kudifila bikole mu mudimu wa dimuangalaja evanjeliyo nekuambuluishe bua kuikale malanda mimpe mu mêku, nekupeteshe benamu lukunukunu ne disanka mu mudimu wa Yehowa ne kabidi nekupatule bipeta bimpe mu mudimu eu!​—Tangila Filipoi 2:1, 2.