Longeshayi bakuabu bua bapete diakalenga
1 Yehowa mmusue bua bantu bonso bapete diakalenga. (Yesh. 48:17) Mmumanye tshidi tshitupetesha disanka dilelela. Dijinga diende dikole ndia ne: bantu bepuke dikenga ne basombe bimpe pa kuteya ntema ku mêyi-matuma ende. Tudi tupeta diakalenga dia bungi patudi tulonda njila wa Nzambi mu nsombelu wetu. (Mus. 34:8) Mmunyi mutudi mua kulongesha bakuabu bua benze pabu nunku?
2 Ntshinyi tshitu bantu basue? Ntshinyi tshidi tshitatshisha bantu bautu uyukila nabu muaba uudi? Kabienaku mua kuikala bukubi bua nzubu yabu, dikolesha dibaka, nsombelu wa bana padibu bakola, ne malu makuabu a buena aa anyi? Padibu ne ntatu, nkuepi kudibu bakebela diambuluisha? Badi mua kueyemena makokeshi abu nkayabu, ndongamu ya dilongeshangana midimu anyi malu makuabu, anyi buludiki bua bakuabu. Tuamba eku tuela eku, ba bungi mbalubakaja ne ngenyi kayiyi dikuatshisha dijalame ne kayiyi miakanyine bua kubapetesha diakalenga. Tudi ne bua kubatuisha ne: buludiki budi Dîyi dia Nzambi difila mbuimpe butambe. (Mus. 119:98) Tudi mua kuenza nunku mu dibaleja mushindu udibu mua kulengeja nsombelu wabu kutuadijila ku mpindieu bu buobu mua kudienzeja bua kulonga Bible ne kutumikila bidiye wamba.—2 Tim. 3:16, 17.
3 Nsombelu wa mu dîku mulengeja: Bantu bakese ke badi bamanye mudi mibelu ya mu Efeso 5:22–6:4 idi mifunda ku spiritu yambuluisha bua kujikija ntatu mu dîku. Ke tshiakafikila bena dibaka babidi. Kunyima kua bidimu dikumi bia dibaka, bakangata dipangadika dia ne: bavua ne bua kulekelangana. Kadi mukaji wakatuadija kulonga Bible ne bakamulongesha mêyi-maludiki a mu Mifundu pa nsombelu wa mu dibaka. Mulume kakanenga bua kumona mashintuluka avua mukaji wenza bu muvuaye utumikila mêyi-maludiki a mu Bible, ne wakaditua pende mu dilonga. Kunyima kua matuku wakamba ne: “Mpindieu tudi bapete tshishimikidi tshia nsombelu wa disanka dilelela mu dîku.”
4 Tshipatshila tshilelela mu nsombelu: Pakakeba nsonga umue uvua munu wa bintu bia lulengu diambuluisha kudi Bantemu, bakamulongesha ne: Yehowa uvua umutabalela. Wakamba ne: ‘Ndi mulonge ne: Mufuki udi ne dilongolola kampanda bua muntu ne udi ulaya badiye wanyisha muoyo wa kashidi. Kanuena mua kumanya disanka dimvua mumvue bua bualu ebu. Lelu’eu ndi ne makanda mimpe a mubidi, ditalala dia mu lungenyi, ne malanda mashême ne Nzambi.’
5 Kakuena muntu udi mua kupanga kupetela diakalenga ku diambuluisha diakanyine didi mu Dîyi dia Nzambi to. Pa kuangata dîyi edi bu muludiki wetu, tudi tujadika ne: njila wa Yehowa mmupite njila ya panu bulenga. (Mus. 116:12) Tudi ne disanka dia kumanyisha bakuabu mukenji eu, pa kubalongesha bua bapete diakalenga. Mu dienza nanku, bipeta bimpe bivule nebipatuke.