Sambila Yehowa bua akuambuluishe
1 Yezu wakalamika mu lungenyi lua bayidi bende mushinga wa kukeba dibenesha dia Yehowa bua mudimu wabu. (Mat. 9:37, 38) Masambila etu menza ne muoyo mujima bua kusamuna Nzambi ne kumuela tuasakidila pamue ne milombu ne mitendekenu bidi bileja dieyemena dietu dijima kudi Yehowa bua atuambuluishe. (Filip. 4:6, 7) Mifundu idi itukankamija bua kusuminyina mu masambila “ne kulomba kuonso ne disengelela dionso,” ne tudi ne bua kuenza nunku mu masambila adi atangila mudimu wetu.—Ef. 6:18.
2 Tudi tusamuna Yehowa mu disambila bua ngikadilu yende kayiyi kuelekeja ne bua malu adiye wenza. Tudi kabidi tumusamuna bu mudiye Mufidi wa lumu luimpe lutudi tuyisha. Mmuakanyine bua tuetu kumusamuna bualu anu yeye ke udi upatuisha bipeta bimpe mu mudimu wetu.—Mus. 127:1.
3 Masambila etu a diela tuasakidila adi aleja dianyisha bua lumvu ludi Yehowa mutupeshe pa bidi bitangila disua ne dilongolola diende. Kabienaku bualu bua disanka mutudi tumanyisha bakuabu malelela a Bukalenge anyi? Tudi tuela Yehowa tuasakidila bua bionso bitudi tukumbaja mu mudimu wetu.—Mus. 107:8; Ef. 5:20.
4 Mbiakane bushuwa bua tuetu kulomba Yehowa bua atuambuluishe bua tupete bantu bikala mua kuitaba dilomba dietu bua kulonga nabu Bible, ne kumulomba diambuluisha bua kulenga mitshima yabu ne bulelela. Mu dienza milombu ya nunku, tudi tujadika ne: anu Nzambi ke udi mua kuenza ne: tupatule bipeta bimpe mu mudimu wetu.—1 Kol. 3:5-7.
5 Muanetu wa bakaji kampanda wakamona ne: muntu mukaji mukuabu uvua wangata Tshibumba tshia Nsentedi ne Réveillez-vous! mu njila wende wa difila bibejibeji kavua ubibala to. Bu muvuaye kayi musue ne: bibejibeji bia mushinga mukole ebi bijimine patupu, wakalomba Yehowa bua ne: bikala muntu mukaji eu kayi ubibala to, abibenge. Pakaya muanetu eu bua kumukumbula, bayende wa mukaji au wakamba ne: “Tuasakidila bua muudi ututuadila bibejibeji ebi pa tshibidilu. Ntu mbibala ne ndi mubinange bushuwa.”
6 Mu dilomba dienza ne muoyo mujima ne didipuekesha, tudi mua kusengelela Yehowa bua atuambuluishe bua kutantamena kalèngù ka bantu ne dituseka diabu ne bua kutshimuna buôwa bua muntu budi mua kutupangisha bua kutungunuka ne kuyisha bakuabu ne dikima. (Bien. 4:31) Bituatungunuka ne kuenza masambila ne “kulomba kuonso ne disengelela dionso” patudi tuenza mudimu wetu wa tshijila ne butumike buonso, tudi mua kutekemena bua kupeta diambuluisha dia Yehowa.—1 Yone 3:22.