Didianjila kudilongolola didi dituala disanka

¹ Didifila mu mudimu wa budimi didi ditutuadila disanka dinene. (Mus. 89:15, 16) Bushuwa, didilongolola ke bualu bunene budi bupetesha mushindu wa kupeta disanka edi. Patudi tudilongolola bimpe, tudi tukumbaja malu a bungi, ne patudi tuakumbaja, tudi tupeta disanka dia bungi.

² Kuata mudimu ne bia mudimu bidiku: Tuadija didilongolola diebe pa kubala ne kukonkonona malu mafunda mu Mudimu wetu wa Bukalenge. Mutu misangu mivule mayuki a lungenyi makanyine bua kukuambuluisha bua umanyishe bimpe ne bipepele mukenji wa Bukalenge. Neupetemu bilejilu bia mushindu wa kutshimuna milandu ya pa tshibidilu. Mudi ngenyi misunguluke pa mushindu wa kuenza dikumbulula didi dipatula bipeta bimpe, dikale ne tshipatshila tshia kutuadija dilonga dia Bible. Udi ne budikadidi bua kuakaja ngenyi mifila muaba uudi mumone ne: mbiakanyine kuenza nayi mudimu. Kudi kabidi broshire wa Mua kutuadija ne kutungunuka ne mayuki pa Bible, udi uleja mbuelelu kabukabu ne mushindu wa kuandamuna bantu batu bakosangana ku mêyi, nunku udi wambuluisha bua kutamba kupatula bipeta bimpe mu nsombelu mishilashilangane iudi upetangana nayi.

³ Tangila mukanda uwafila mu buambi ne sungulamu bualu bumue anyi abidi adi akoka ntema audi mua kuleja muntu. Bualu buamba mu ngumu budi bukoka ntema ya bantu buuvua mumvue peshi mubale budi mua kukupesha mushindu wa kutuadija diyuki. Dianjila kulongolola mandamuna ku milandu ya pa tshibidilu idi bantu mua kujula ne kuata ngenyi kampanda pa mushindu uudi mua kuandamuna. Pashishe wenze minite mikese ya diambulula biwikala mua kuamba ku tshiibi.

⁴ Buela mu tshisangilu tshia mudimu tshionso: Teleja ne ntema mu Tshisangilu tshia Mudimu padibu bakula bua ngenyi mifila mu Mudimu wetu wa Bukalenge, bayikonkonona ne benza manaya a tshilejilu. Funda ngenyi iudi mumone ne: udi mua kuyibueja mu diyuki diebe. Vuluka imue nsombelu ya pa tshibidilu iutu mupete mu buambi ne ela meji pa mishindu iudi mua kutamba kuyisha bimpe. Yukila pa malu aa ne bamanyishi bakuabu kumpala ne panyima pa tshisangilu.

⁵ Ikala mujadike ne: biwikala ‘mulongolola bua mudimu muimpe wonso,’ neupete difutu dia disanka ditambe bunene ne newambuluishe bakuabu bimpe bua kupeta njila udi ufikisha ku muoyo.​—2 Tim. 2:21.